‏ Mark 8

Иса дёрт бинъ адамны тойдура

1 ^aШу куньлерде кене чокътан-чокъ адам топланды. Ашамагъа бир шей къалмагъаны ичюн, Иса шегиртлерини янына чагъырып:

2 ^b– Халкъны аджыйым. Учь кунь Меним алдымда туралар, ашамагъа исе ич бир шейлери ёкъ. 3Эгер оларны эвлерине ач къалдырып йиберсем, ёлда такъаттан кесилирлер. Базылары узакъ ерлерден кельгенлер, – деди. 4 ^cШегиртлери бунъа:

– Оларны тойдурмакъ ичюн бу сахрада ким, къайдан шу къадар отьмек аладжакъ? – деп, джевап бердилер.

5– Не къадар отьмегинъиз бар? – деп сорады Иса.

– Еди дане, – деди шегиртлер.

6Сонъ Иса халкъкъа ерге отурмакъны буюрды. Еди отьмекни алып, шукюр этип парчалады ве даркъатмакъ ичюн шегиртлерине берди. Шегиртлер халкъкъа даркъаттылар. 7Оларда бир къач балыкъ да бар эди. Иса шукюр дувасыны окъуп, оларны да даркъаттырды. 8Халкъ ашап тойды. Артып къалгъан кесеклерни джыйып, еди сепет толдурдылар. 9Шу ерде дёрт бинъге якъын адам бар эди. Сонъ Иса адамларны йиберип, 10Озю шегиртлеринен берабер тез-тез къайыкъкъа отурып, Далманута юртуна кельди.

Фериселер бельги талап эте

11 ^d‌ ^eФериселер чыкъып, Онен давалашып башладылар. Оны сынамакъ ичюн, коктен бир бельги косьтергенини истей эдилер. 12Лякин Иса, агъыр нефес алып, оларгъа:

– Не ичюн бу несиль бельги талап эте? Сизлерге догърусыны айтам: бу несильге ич бир бельги косьтерильмейджек! – деди.

13Сонъ, оларны къалдырып, кене къайыкъкъа минди ве къаршы ялыгъа ёл алды.

Ирод ве фериселернинъ «маясы» акъкъында

14 ^fИсанынъ шегиртлери ёлгъа отьмек алмагъа унуткъанлар. Къайыкъта бир отьмектен башкъа бир шей къалмады. 15 ^gШу арада Иса, шегиртлерине эмирлер берип:

– Манъа бакъынъыз, фериселернен Ироднынъ маясындан сакъынынъыз! – деди. 16Олар исе бир-бирине: «Буны отьмек алмагъанымыз ичюн айтты», – дедилер. 17 ^hИса, буны билип, оларгъа:

– Сиз не ичюн озьара, янымызда отьмек ёкъ, дейсиз? Даа бир шей анъламайсынъызмы? Бунъа акъылынъыз етмейми? Юреклеринъиз даа кёрмы? 18 ⁱКозьлеринъиз бар, амма корьмейсизми? Къулакъларынъыз бар, амма эшитмейсизми? – деди. – Сиз хатырлап оламайсызмы? 19 ^jМен беш отьмекни парчалап, беш бинъ адамгъа болип бергенимде, сизлер ашап битирильмеген отьмекни къач сепетке джыйдынъыз?

– Он эки сепет, – деди олар.

20 ^k– Мен еди отьмекни парчалап, дёрт бинъ адамгъа болип бергенимде, къач сепет отьмек къалды?

– Еди сепет, – дедилер.

21– Ондан сонъ да анъламайсынъызмы? – деди оларгъа Иса.

Иса Бетсайдада кёр адамны тедавийлей

22 ^lИса Бетсайда коюне кельгенде, Онынъ алдына бир кёр адамны кетирип, онъа тийгенини истедилер. 23 ^mИса, сокъурнынъ къолундан тутып, койнинъ ичинден алып чыкъты. Козьлерини тюкюриклеп, къолларыны онынъ башына къойды да:

– Бир шейлер коресинъми? – деп сорады.

24Сокъур башыны котерип:

– Адамларны корем, олар тереклерге ошайлар, амма юрелер, – деди.

25Иса даа бир кере кёрнынъ козьлерине къолларыны тийгизди. Кёр дикъкъатнен бакъып, эр шейни ачыкъ коре башлады. О энди бутюнлей тедавийленди. 26Иса оны эвине ёллагъанда:

– Койге кирме, – деди.

Пётр Исагъа Месих дей

27 ⁿИса озь шегиртлеринен берабер Филипнинъ Кайсареясы этрафындаки койлерге кетти. Ёлда шегиртлеринден:

– Адамлар Мени ким деп саялар? – деп сорады.

28 ^oШегиртлери:

– Базылары Сени Сувгъа Батырыджы Ягъя, башкъалары – Ильяс, дигерлери исе – пейгъамберлерден бириси деп саялар, – дедилер.

29 ^pИса олардан:

– Я сиз Мени ким деп саясыз? – деп сорады. Пётр Онъа:

– Сен Месихсинъ, – деди.

30 ^qБундан сонъ Иса шегиртлерине Озю акъкъында кимсеге айтмагъа кесен-кес ясакъ этти.

Иса Озюнинъ азаплары, олюми ве тириледжеги акъкъында эвельден айта

31 ^r‌ ^sИса шегиртлерини огретип башлады ки, Инсан Огълу чокъ азап чекмек, акъсакъаллар, баш руханийлер ве Къанун оджалары тарафындан ред этильмек, ольдюрильмек, амма учюнджи куню тирильмек керек. 32 ^tИса буны ачыкъ-айдын айта эди. Буны эшиткен Пётр, Исаны четке чекип, Оны азарлап башлады. 33 ^uАмма Иса, айланып, шегиртлерине бакъты да, Пётрнынъ сёзюни болип:

– Ёкъ ол козюмден, Шейтан! Сен Алланынъ ишлерини дегиль, адам ишлерини тюшюнесинъ, – деди.

34 ^vСонъ Иса халкъны ве шегиртлерини янына чагъырып:

– Ким Меним артымдан кетмеге истесе, озюнден вазгечип, озь хачыны котерип, Меним артымдан юрсюн. 35 ^wКим озь джаныны къуртармагъа истесе, оны джояджакъ. Ким Мен ве Къуванчлы Хабер ичюн джаныны берсе, джаныны къуртараджакъ. 36 ^xЭгер инсан бутюн дюньяны запт этип, озь джанына зарар кетирсе, онъа бундан файда бармы? 37 ^yИнсан, озь джаныны къуртармакъ ичюн, не берер? ^zКим бу ороспу ве гунакяр несиль арасында Менден ве Меним сёзлеримден утанса, Инсан Огълу да, Алланынъ мукъаддес мелеклеринен берабер Бабасынынъ Шурети иле кельгенде, ондан утаныр, – деди.38