‏ Matthew 10

Он эки шегирт

1 ^aИса Озюнинъ он эки шегиртини янына чагъырып, оларгъа джинлернинъ устюнден укюм этмеге къудрет берди. Буны, адамлардан джинлерни къувып чыкъармакъ, чешит хасталыкъларны ве дертлерни тедавийлемек ичюн япты.

2Бу он эки эльчининъ адлары шойле: биринджиси Пётр адынен белли олгъан Симон ве онынъ къардашы Андрей, сонъ Зебедайнынъ огъуллары Якъуп ве онынъ къардашы Юхан, 3Филип, Бартоломай, Тома, салым топлайыджы Матта, Алфейнинъ огълу Якъуп ве Фадда, 4Ветанпервер Симон ве сонъундан Исагъа хаинлик япкъан Иуда Искариот.

Он эки шегиртке насиат

5 ^bИса он экини ёллагъанда, оларгъа бойле насиат берди:

– Башкъа миллетлернинъ топракъларына барманъыз ве самариелилернинъ шеэрлерине кирменъиз. 6 ^cЛякин ёлуны джойгъан къойларгъа – Исраиль халкъынынъ алдына барынъыз. 7 ^dКетинъиз ве: «Кок Падишалыгъы якъынлашты», – деп илян этинъиз. 8 ^eХасталарны тедавийленъиз, олюлерни тирильтинъиз, лепра хасталыгъына огърагъанларны эляллап тедавийленъиз, джинлерни къувып чыкъарынъыз. Бедава алдынъыз – бедава беринъиз.

9Къушагъынъызгъа алтын, кумюш ве бакъыр акъча биле алманъыз. 10 ^fЁлгъа не торба, не эки дане урба, не аякъкъап ве таякъ биле алманъыз. Чалышкъан адам озь отьмегини къазаныр. 11Шеэр я да къасабагъа келип, о ерде ляйыкъ бир адам тапынъ ве шу ерден чыкъмагъандже, онынъ эвинде къалынъыз. 12Эвге киргенде, селям беринъиз. 13Эгер о эв бунъа ляйыкъ олса, тилеген барышыгъынъыз анда кирсин, ляйыкъ олмаса исе, сизге къайтып кельсин. 14 ^gКим исе сизни къабул этмесе ве сёзлеринъизге къулакъ асмаса, о эвден я да шеэрден чыкъып кетеяткъанда, аякъларынъыздан тозны биле къакъып кетинъиз. 15 ^hСизге айтам: Ахирет кунюнде бойле шеэрнинъ алына коре, Содом ве Гоморанынъ алы енгиль олур.

Оладжакъ къувгъунлыкълар акъкъында

16 ⁱ‌ ^jМына, Мен сизлерни къашкъыр сюрюсине къойлар киби ёллайым. Сиз йыланлар киби акъыллы ве гогерджинлер киби саде олунъ. 17Инсанлардан сакът олунъыз. Сизлерни акъсакъаллар шурасында махкеме этеджеклер, синагогаларда къамчылайджакълар. 18 ^kМеним Адым ичюн сизни акимлер ве падишаларнынъ алдына алып бараджакълар. Сиз оларнынъ огюнде ве Алланы бильмеген халкъларнынъ огюнде Меним шаатларым оладжакъсыз. 19Сизнен бу шейлерни япкъанларда, не айтайым ве насыл айтайым, деп къасевет этменъиз. О вакъытта айтыладжакъ сёзлеринъиз белли оладжакъ. 20 ^lОзьлеринъиз дегиль, ичинъиздеки Бабанъызнынъ Руху айтаджакъ. 21 ^mАгъасы – къардашыны, бабасы – огълуны олюмге береджеклер. Балалар озь ана-бабаларына къаршы баш котерип, оларны ольдюреджеклер. 22 ⁿМеним Адым ичюн эписинде сизлерни кореджек козю олмаз. Лякин сонъунадже сабыр эткен адам къуртуладжакъ. 23 ^oЭгер сизлерни бир шеэрден къувсалар, башкъасына къачынъ. Сизге догърусыны айтам: сиз Исраильнинъ эписи шеэрлерини айланып чыкъкъандже, Инсан Огълу ер юзюне къайтып келеджек.

24 ^pШегирт озь оджасындан юкъары олмаз, хызметчи исе – озюнинъ эфендисинден. 25 ^qШегирт озюнинъ оджасы киби, хызметчи эфендиси киби олсалар, етерлик.

Эгер эв саибини Беэльзебул адынен адландырсалар, эв сакинлери акъкъында даа бетер сёзлер айтмазлармы? 26 ^r‌ ^sАмма олардан къоркъманъыз! Эр бир сакъланылгъан шей озь вакътында ачыладжакъ, ве эр бир сыр белли олур. 27Сизге къаранлыкъта айткъанларымны ярыкъта айтынъыз. Къулагъынъызгъа фысылдап айткъанларымны эвлернинъ дамлары устюнден илян этинъиз. 28 ^tБеденини ольдюрип, джаныны исе ольдюрип оламагъанлардан къоркъманъыз. Амма джаныны да, беденини де джеэннемде гъайып этмеге кучю еткен Алладан къоркъунъыз. 29Эки торгъай бир капикке сатылмаймы? Лякин Бабанъыз разы олмаса, оларнынъ бириси биле ерге тюшмез. 30Сизлерде исе башынъыздаки сачларынъыз эписи сайылгъан. 31 ^uШунынъ ичюн къоркъманъыз, сизлер чокъ торгъайдан паалысынъыз!

Месихни танув ве Ондан вазгечюв акъкъында

32 ^v‌ ^wМени адамларнынъ алдында таныгъан эр бир адамны Мен Коклердеки Бабамнынъ алдында таныйджам. 33 ^xМенден инсанлар алдында вазгечкен адамдан исе Мен Коклердеки Бабамнынъ алдында вазгечеджем.

Барышыкъ дегиль, къылыч

34 ^y‌ ^zМени ер юзюне барышыкъ кетирмек ичюн кельген, деп тюшюнменъиз. Мен барышыкъ дегиль, къылыч кетирмек ичюн кельдим. 35Огълуны бабасындан, къызыны анасындан, келинни къайнанасындан айырмакъ ичюн кельдим. 36 ^aaАдамгъа озь эвдекилери душман оладжакъ.

37Бабасыны я да анасыны Менден зияде севген Манъа ляйыкъ дегиль! Огълуны я да къызыны Менден зияде севген Манъа ляйыкъ дегиль! 38 ^abКим озь хачыны алмаса ве Меним артымдан кетмесе, о Манъа ляйыкъ дегиль. 39 ^acОзь джаныны къуртармагъа истеген адам оны джояджакъ. Мен ичюн джаныны берген адам исе оны тападжакъ.

Мукяфатлар акъкъында

40 ^ad‌ ^aeСизни къабул эткен адам Мени де къабул эте. Мени къабул эткен исе Мени Ёллагъанны къабул эте. 41 ^afКим пейгъамберни, о – пейгъамбер олгъаны ичюн, къабул этсе, пейгъамбер киби, мукяфатланаджакъ. Ким инсафлы адамны, о – инсафлы олгъаны ичюн, къабул этсе, инсафлы адам киби, мукяфатланаджакъ. 42 ^agВе ким бу адий ве кучюк адамларнынъ бирисине, о – Меним шегиртим олгъаны ичюн, бир мешребе сув берсе, сизге догърусыны айтам: о, мукяфатсыз къалмаз.