‏ Matthew 12

Раатлыкъ куню акъкъында

1 ^a‌ ^bБир раатлыкъ куню Иса богъдай тарласындан кечип кетеята эди. Онынъ шегиртлери ач олып, богъдай башакъларыны къопарып ашамагъа башладылар. 2 ^cФериселер буны корип, Исагъа:

– Бакъ, Сенинъ шегиртлеринъ раатлыкъ кунюнде япмагъа мумкюн олмагъан шейни япалар! – дедилер.

3 ^d– Я сиз Давут озю ве онынъ адамлары ач къалгъанда, не япкъанлары акъкъында окъумадынъызмы? – деди оларгъа Иса. 4 ^e– Алланынъ Эвине кирип, Давут озю ве янындакилери тек руханийлерге ашамагъа мумкюн олгъан теклиф пителерини ашагъанлар. 5 ^fАлланынъ Сарайында руханийлер раатлыкъ кунюни бозсалар да, гуналы сайылмагъанлары акъкъында Мусанынъ Къанунында окъумадынъызмы? 6 ^gМен сизлерге айтам: бу ерде Алланынъ Сарайындан да буюк Адам бар. 7 ^hЭгер сизлер «Мен къурбан истемейим, мерамет истейим» деген сёзлернинъ манасыны бильген олсанъыз, къабаатсыз адамларны къабаатламаз эдинъиз. 8Инсан Огълу – раатлыкъ кунюнинъ Раббисидир.

Иса сакъат адамнынъ къолуны тедавийлей

9 ⁱИса о ерден кетип, оларнынъ синагогасына кельди. 10 ^jАнда къолу сакъатланып къуругъан бир адам бар эди. Исадан:

– Къанунгъа коре, раатлыкъ куню хастаны тедавийлемек мумкюнми? – деп сорадылар. Керчектен, Оны къабаатламагъа бир себеп къыдыра эдилер.

11Иса оларгъа:

– Тасавур этинъиз: сизде бир къой бар, ве о, раатлыкъ куню къуюгъа тюшип кете. Аранъызда оны барып тартып чыкъармагъан адам тапылырмы? – деди. 12 ^k– Инсан исе къойдан не къадар чокъ къыйметлидир! Шунынъ ичюн, Къанун боюнджа раатлыкъ кунюнде яхшылыкъ япмагъа мумкюн.

13 ^lСонъ Иса о адамгъа:

– Къолунъны узат! – деди. Адам сакъат къолуны узаткъанынен, къуругъан къолу экинджи къолу киби сагълам олды. 14Фериселер исе кетип топлаштылар ве Исаны насыл этип ольдюрмеге акъыл таныштылар.

Алла сайлагъан Къул

15Иса буны билип, о ерден кетти. Онынъ пешинден чокъ адам юрди. О эписини тедавийледи, 16 ^mамма Озю акъкъында кимсеге бир шей айтмагъа ясакъ этти. 17 ⁿШунынънен Ешая пейгъамбер аркъалы айтылгъан сёзлер мейдангъа кельди: 18Мына – Мен сайлагъан Къулум,
севгилим ве джанымнынъ чырагъы!
Мен Онъа Озь Рухумны береджегим,
О, эписи халкъларгъа адалетликни илян этеджек.
19Давалашмаз О ве къычырмаз,
кимсе Онынъ сесини эшитмейджек.
20Адалетликни гъалебеге кетирмегендже,
къопармаз О чатлакъ къамышны,
сёндюрмез тютеп тургъан фитильни.
21Халкълар Онынъ Адына умют багълар.

Иса ве фериселер

22 ^oШундан сонъ Исанынъ алдына бир адамны кетирдилер. О кёр ве сагъыр тильсиз эди, чюнки оны джин ургъан. Иса оны тедавийледи, ве шу адам лаф этмеге ве корьмеге башлады. 23 ^pБуны корьген адамлар шашып къалдылар. Олар бир-бирине:

– Бу – Давутнынъ Огълу дегильми? – дедилер.

24 ^qФериселер буны эшитип:

– О, джинлерни тек джинлернинъ башлыгъы Беэльзебулнынъ къуветинен къувып чыкъара, – дедилер.

25Оларнынъ фикирлерини билип, Иса деди:

– Озь ичинден болюнген эр бир падишалыкъ йыкъылып бошар. Озь ичинде болюнген эр бир шеэр я да эв аякъта туралмаз. 26Эгер Шейтан Шейтанны къувып чыкъарса, о болюнип озь озюнен дженклеше. Сонъ онынъ падишалыгъы насыл тураджакъ?

27 ^rЭгер Мен джинлерни Беэльзебулнынъ кучюнен къувсам, сизинъ огъулларынъыз оларны кимнинъ кучюнен къувып чыкъаралар? Шунынъ ичюн, сизлерни озьлери укюм этеджеклер. 28Эгер Мен Алланынъ Рухунен джинлерни къувып чыкъарсам, демек, Алланынъ Падишалыгъы сизлерге етип кельген. 29 ^sЭвнинъ саиби кучьлю бир адам олса, онынъ эвине хырсыз насыл тюшеджек? Амма башта кучьлю адамны багъласа, бутюн мал-мулькюни хырсызлап кетер.

30 ^tКим Меннен берабер олмаса, Манъа къаршы олур. Ким Меннен берабер джыймаса, о дагъыта. 31 ^uШунынъ ичюн сизлерге айтам: инсанларнынъ эр бир гунасы ве куфюр сёзлери биле багъышланыр. Лякин Мукъаддес Рухкъа къаршы айтылгъан куфюр сёзлер багъышланмаз. 32Ким Инсан Огълуна къаршы сёз айтса, багъышланыр. Лякин куфюр сёзни Мукъаддес Рухкъа къаршы айтса – не бу дюньяда, не келеджек дюньяда багъышланаджакъ.

Терек ве онынъ мейвалары

33 ^v‌ ^wЭр бир терек озь мейвасындан танылыр. О вакъытта терекни ве мейвасыны яхшы я да ярамай, деп сайынъыз.

34 ^xЭй, йыланлар сойлары! Сиз яман олып, яхшы сёзлерни насыл айтып олурсынъыз? Адамнынъ юрегинде не олса, оны тили айта! 35 ^yЯхшы адам яхшылыкъ хазинесинден яхшылыкъ чыкъара. Яман адам озюнинъ яманлыкъ хазинесинден яманлыкъ чыкъара. 36 ^zМен сизге шуны айтам: Ахирет куню инсанлар агъызларындан чыкъкъан эр бир бош сёз ичюн джевап береджеклер. 37 ^aaСёзлеринъиз иле сизни акълайджакълар я да къабаатлайджакълар.

Бельги косьтерюв талаплары

38 ^ab‌ ^acО вакъытта бир къач Къанун оджасы ве ферисе Исагъа:

– Оджа, бизге бир бельги косьтергенинъни истеймиз, – дедилер.

39 ^adИса оларгъа джевап берип, шойле деди:

– Ярамай ве ороспу несиль бельги къыдыра, лякин Юнус пейгъамбернинъ бельгисинден гъайры оларгъа бельги берильмейджек. 40 ^aeЮнус учь кунь ве учь гедже буюк балыкънынъ къурсагъы ичинде олгъаны киби, Инсан Огълу да шойле учь кунь ве учь гедже топракънынъ юрегинде оладжакъ. 41 ^afНиневе шеэринде яшагъанлар Ахирет кунюнде бу несильнен берабер котерилип, оны къабаатлайджакълар. Олар Юнуснынъ огреткенини эшитип, тёвбе эткенлер. Мында исе Юнустан буюкчеси бар! 42 ^agДженюп къыраличеси Ахирет кунюнде бу несильнен берабер котерилип, оны къабаатлайджакъ. О, Сулейманнынъ икметли лафларыны динълемек ичюн, дюньянынъ о бир четинден кельген. Мында исе Сулеймандан буюкче Сою бар!

Арам рухнынъ къайтувы

43 ^ahАрам рух инсандан чыкъкъан сонъ, сувсуз ерлерде быралкъыланып юре, озюне раатланмагъа ер къыдыра, амма тапалмай. 44Сонъ озюне: «Мен чыкъкъан эвиме къайтып барайым да», – дей. Къайтып кельгенде исе, эвини бош, сипирильген ве джыйыштырылгъан алда тапа. 45 ^aiО вакъыт джин бара да, озюнинъ янына башкъа, даа бетер еди джинни ала ве оларнен эвге кирип ерлеше. Сонъра, о адамнынъ алы эвелькисинден бетер ола. Бу ярамай несильнинъ алы да шойле оладжакъ.

Иса анасы, огълан ве къызкъардашлары акъкъында

46 ^aj‌ ^akИса адамларнен субетлешип тургъан вакъытта, Онынъ анасынен къардашлары эвнинъ огюнде, тышта турмакъта эдилер: олар Исанен лаф этмеге истегенлер. 47Кимдир Исагъа:

– Анда, тышарыда, ананънен къардашларынъ, Сеннен лаф этмеге истейлер, – деди.

48Иса буны айткъан адамгъа джевап берип:

– Меним анам ким? Къардашларым ким? – деди 49ве къолунен шегиртлерини косьтерип:

– Мына, Меним анам ве къардашларым! – деди. 50 ^al– Ким Коклердеки Бабамнынъ ирадесини беджерсе, о Меним къардашым, къызкъардашым ве анамдыр.