‏ Matthew 18

Ким буюкче?

1 ^aО вакъытта шегиртлер, Исанынъ алдына келип:

– Кок Падишалыгъында энъ буюк адам ким оладжакъ? – деген суальни бердилер.

2Иса янына бир баланы чагъырып, оны оларнынъ арасына къойды ве:

3 ^b– Сизлерге догърусыны айтам: эгер сиз денъишмесенъиз ве балалар киби олмасанъыз, Кок Падишалыгъына кирмезсиз. 4Ким бу бала киби озюни ашада тутып юрсе, Кок Падишалыгъында энъ муим оладжакъ, – деди. 5 ^c– Адым огъруна бойле балалардан бирисини къабул эткен Мени де къабул эте.

6 ^dКим исе Манъа инангъан бу кучюклерден бирисини ёлдан урса, онынъ бойнуна эшек айландыргъан дегирмен ташыны асып денъизнинъ чукъур еринде богъсалар, о ичюн яхшыджа олур эди.

Ёлдан ургъан шейлер акъкъында

7 ^eБу дюньянынъ алына беля, чюнки инсанны гунагъа тюшюрген шейлер чокъ! Бойле шейлер олмакъ керек. Амма гунагъа себепчи олгъан адамнынъ алына беля! 8 ^fЭгер къолунъ я да аягъынъ сени ёлдан урса, оны кесип, озюнъден узакъча ташла. Сен чолакъ я да топал олсанъ да, эбедий аяткъа киреджексинъ. Бу, эки къолнен, эки аякънен эбедий атешке ташлангъанынъдан яхшыдыр. 9 ^gЭгер козюнъ сени ёлдан урса, оны чыкъарып ал да, озюнъден узакъча ташла. Сен бир козьнен олсанъ да, эбедий аяткъа киреджексинъ. Бу, эки козьнен джеэннем атешине ташлангъанынъдан яхшыдыр.

10– 11 ^hБакъынъыз, бу кучюклерден бирисини биле ред этменъиз. Мен сизге айтам: оларнынъ мелеклери эр вакъыт Меним Коктеки Бабамнынъ огюнде туралар.

12Сизлернинъ фикиринъиз насыл? Эгер бир адамнынъ юз баш къою олып, олардан бириси адашса, о, докъсан докъузыны дагъларда къалдырып, адашкъан союны къыдырмагъа бармазмы? 13Оны тапкъанда исе, сизге догърусыны айтам: шу бир къой ичюн адашмагъан докъсан докъузындан зияде къуванаджакъ. 14 ⁱОйле де Коклердеки Бабанъыз бу кучюклерден бирисининъ биле ольгенини истемей.

Гуна япкъан дин къардаш акъкъында

15 ^j‌ ^kЭгер сенинъ дин къардашынъ санъа къаршы гуна япса, онынъ алдына барып, тек юзь-юзьге лаф этип, къабаатыны онъа косьтер. О сени динълесе, сен агъанъны озюнъе къайтардынъ. 16 ^lЭгер сени динълемесе, озюнънен даа бир я да эки адамны алып бар. Эр бир олгъан шей эки я да учь шаатнен тасдыкъланмакъ керек. 17 ^mЭгер оларгъа да къулакъ асмаса, иманлыларнынъ топлашувына айт. Эгер иманлыларнынъ топлашувына да къулакъ асмаса, о санъа Аллагъа инанмагъан я да салым топлайыджы киби олсун.

Ясакъ этмек ве разылыкъ этмек кучю

18Сизге догърусыны айтам: ер юзюнде сизлер нени ясакъ этсенъиз, кокте де ясакъ этиледжек. Нени ер юзюнде рухсет этсенъиз, кокте де рухсет этиледжек. 19 ⁿСизге даа айтам: эгер экинъиз мында, бу дюньяда бир шей акъкъында дува окъумагъа келишсенъиз, Меним Коктеки Бабам шуны беджерир. 20Меним ичюн эки я да учь адам топланса, шу ерде оларнынъ арасында Мен де олурым.

Борджкъа берген мераметсиз адам акъкъында кинаели икяе

21 ^oШу вакъытта Пётр Исагъа келип:

– Раббим, эгер дин къардашым манъа къаршы гуна япса, мен къач кере оны багъышлайджам? Еди кереми? – деди. 22Иса онъа:

– Ёкъ, еди кере дегиль, етмиш кере едишер, – деди. 23– Бунынъ ичюн Кок Падишалыгъы бунъа ошай: бир падиша озь хызметчилеринден борджларыны алмагъа истеген. 24Пара сайып башлангъанда, онъа он бинъ чувал алтын ▼

▼Он бинъ чувал алтын – къ. юн. «он бинъ талантон».

борджу олгъан бир адамны онынъ алдына кетирдилер. 25 ^qБорджуны одемеге бир шейи олмагъаны ичюн, падиша онъа озюни, апайыны, балаларыны ве бутюн мал-мулькюни сатып, борджуны бермесини буюрды. 26Хызметчи исе ерге йыкъылып, падишагъа ялварды: «Сабыр этинъ, мен сизге эписини къайтарырым!» – деди. 27Озь хызметчисини аджып, падиша оны йиберди ве борджуны багъышлады. 28Хызметчи исе кетип, озюне юз динар борджу олгъан бир аркъадашыны тапты ве онынъ богъазына япышып: «Менден алгъан борджунъны къайтар!» – деп богъып башлады. 29Аркъадашы исе онынъ аякълары янына ерге йыкъылып: «Сабыр эт, мен санъа эписини къайтарырым!» – деп ялварды. 30 ^rАмма о бунъа разы олмады, барып, борджуны къайтармагъандже аркъадашыны зиндангъа къапаттырды. 31Бу вакъианы корьген башкъа хызметчилернинъ джанлары пек агъырды, ве олар барып, падишагъа олгъан шейни айттылар. 32О вакъыт падиша хызметчисини алдына чагъырып: «Эй, ярамай къул! Манъа ялваргъанынъ ичюн, мен сенинъ бутюн борджунъны багъышладым. 33Мен сени аджыгъаным киби, сен де аркъадашынъны аджысанъ олмаз эдими?» – деди. 34Сонъ бутюн борджуны тёлемегендже, ачувлангъан падиша хызметчисини аписхане джезалайыджыларнынъ къолуна берди. 35 ^sБойледже, эгер сизлернинъ эр биринъиз озь аркъадашынъызны джан-юректен багъышламасанъыз, Меним Коктеки Бабам да сизлерге ойле япар.