‏ Matthew 22

Той акъкъында кинаели икяе

1 ^a‌ ^bИса оларгъа даа кинаели икяелер айтты:

2 ^c– Кок Падишалыгъы бунъа ошай: бир падиша озь огълуна никях тою япа. 3Тойгъа давет этильген адамларны чагъыртмакъ ичюн, хызметчилерини ёллай. Мусафирлер исе кельмеге истемейлер. 4Падиша башкъа хызметчилерини ёллап: «Давет этильгенлерге айтынъыз ки, мен зияфет софрасыны азырладым, огюзлерим ве башкъа бесленген айванларым союлгъан, эписи азыр. Никях тоюна келинъиз!» – дей. 5Амма мусафирлер даветке къулакъ асмай, озь ишлерини япалар: бириси озь тарласына, башкъасы – тюкянына кете. 6 ^dКъалгъанлары исе падишанынъ хызметчилерини тутып, хорлап ольдюрелер. 7 ^eПадиша пек ачувлана. Аскерлерини ёллап, адам ольдюрген джинаетчилерни ёкъ этип, шеэрни кульге чевире.

8 ^fСонъ хызметчилерине: «Никях тою азыр, лякин мусафирлер бунъа ляйыкъ дегиль экенлер. 9Ёллар айырылгъан ерлерге барып, кимни расткетирсенъиз, тойгъа чагъырынъыз», – деп буюра. 10Хызметчилер ёлгъа чыкъып, расткельгенлернинъ эписини алып келелер: яхшы адамларны да, яманларны да. Бутюн той одасы мусафирлерге тола. 11Падиша мусафирлерни корьмек ичюн киргенде, той урбасыны киймеген бир адамны коре. 12О онъа: «Достум, сен не ичюн бу ерге той урбасыз кельдинъ?» – деп сорай. Адам исе индемей. 13 ^gО вакъыт падиша хызметчилерине: «Онынъ къол-аякъларыны багълап, тышарыгъа, къаранлыкъкъа, агълав ве тиш гъыджыртысы ерине ташланъыз», – дей. 14Давет этильгенлер чокъ, амма сайлангъанлар аздыр.

Салым берюв акъкъында суаль

15 ^h‌ ⁱШундан сонъ фериселер кетип, Исанынъ айткъан сёзюне насыл илишеджеклерини анълаштылар. 16 ^jИсанынъ алдына озь шегиртлеринен берабер Ироднынъ тарафдарларыны ёлладылар. Олар Исагъа:

– Оджа, биз билемиз ки, Сен догъру адамсынъ ве Алланынъ ёлуны догъру огретесинъ. Адамлар Сенинъ акъкъынъда не тюшюнгенлери, адам муим олгъаны я да муим олмагъаны Санъа эп бир. 17 ^kЭнди бизлерге айт. Сенинъдже, Къанун боюнджа Римнинъ императорына салым бермек мумкюнми я да мумкюн дегильми? – деп сорадылар.

18 ^lЛякин Иса оларнынъ яманлыгъыны билип:

– Экиюзьлюлер! Сиз Мени не ичюн сынайсыз? 19Къана, Манъа салым бериледжек параны косьтеринъиз, – деди. Олар Исагъа бир динар кетирдилер.

20– Бу ресим ве язылар кимнинъки? – деп сорады Иса.

21 ^m– Императорнынъ, – деди олар.

– Ойле олса, императорнынъ акъкъыны императоргъа, Алланынъ акъкъыны Аллагъа беринъиз, – деди Иса. 22Олар, бу сёзлерни эшитип, шаштылар ве Исаны къалдырып кеттилер.

Олюлернинъ тирилюви акъкъында суаль

23 ⁿ‌ ^oШу куню де олюлер тирильмей деген саддукийлер Исанынъ алдына келип, Онъа суаль бердилер:

24 ^p– Оджа! Муса бизге деди ки, эгер бир адам, бала корьмейип, ольсе, къардашы агъасынынъ апайына эвленсин ве агъасынынъ ерине онъа бала берсин. 25Мында еди агъа-къардаш бар экен. Биринджиси эвленип, бала корьмей ольген, апайыны исе къардашына къалдыргъан. 26Экинджисинен, учюнджисинен ве единджисинедже эписинен ойле олгъан. 27Олардан сонъ къадын да ольген. 28Тирилюв куню кельгенде, бу къадын едисинден къайсы бирисининъ апайы оладжакъ? Оларнынъ эписи де онъа эвленген эдилер!

29Иса оларгъа джевап берип:

– Сизлер пек янълышасыз. Не Языларны, не Алланынъ къудретини билесиз. 30Тирилюв куню кельгенде, адамлар не эвленеджеклер, не акъайгъа чыкъаджакълар. Олар коктеки мелеклер киби оладжакълар. 31Олюлернинъ тирилювини алсакъ исе, Алла сизге айткъаныны окъумадынъызмы? 32 ^qО: «Мен Ибраимнинъ Алласым, Исхакънынъ Алласым ве Якъупнынъ Алласы олам», – деген. Алла олюлернинъ дегиль, тирилернинъ Алласыдыр, – деди.

33Халкъ буны эшитип, Исанынъ огретювине пек шашты.

Энъ муим эмир

34 ^rФериселер, Иса саддукийлернинъ агъызларыны къапаткъаныны билип, эписи топландылар. 35Олардан бириси, Къанун оджасы, Исаны сынамакъ ниетинде Ондан:

36– Оджа! Къанунда энъ муим эмир къайсыдыр? – деп сорады. 37 ^sИса онъа:

– Рабби-Таалянъны бутюн юрегинънен, бутюн джанынънен ве бутюн акъылынънен сев. 38Мына бу биринджи ве энъ муим эмирдир. 39 ^tЭкинджиси де шойле: якъын адамны озюнъни севгенинъ киби сев. 40 ^uШу эки эмирде бутюн Къанун ве Пейгъамберлернинъ Язылары тура, – деп джевап берди.

Месих акъкъында суаль

41 ^vФериселер Исанынъ янында топлангъанда, О олардан:

42 ^w– Месих акъкъында насыл фикиринъиз бар? О, кимнинъ огълу? – деп сорады.

– Давутнынъ, – деп джевап бердилер. 43Иса оларгъа:

– Ойле олса, не ичюн Давут Мукъаддес Рухтан ильхамланып, Онъа «Рабби» дей? О бойле деген: 44 ^xРАББИ меним Раббиме айтты:
– Душманларынъны аякъларынъ астына йыкътырмагъанымдже,
Меним онъ тарафымда отур!

45Демек, Давут Онъа «Рабби» дей. Насыл олып О, Давутнынъ огълу олур? – деди.

46 ^yКимсе Исагъа бир сёз айтып джевап берип оламады. Шу куньден башлап, ич бир адамнынъ Онъа суаль бермеге джесарети етмеди.