‏ Matthew 24

Иса Алланынъ Сарайы бозуладжагъы акъкъында эвельден айта

1 ^aИса Алланынъ Сарайындан чыкъып кетеяткъанда, Онынъ янына шегиртлери келип, Сарайнынъ биналарына дикъкъатыны джельп эттилер.

2 ^bИса оларгъа:

– Буларнынъ эписини коресизми? Сизге догърусыны айтам: бу ерде таш устюнде таш къалмайджакъ, эписи бозуладжакъ, – деди.

Беля ве къувгъунлыкълар акъкъында

3 ^cИса бир Озю Зейтюн дагъында отургъан вакъытта шегиртлери Онынъ янына келип, сорадылар:

– Бизлерге айт: бу шейлер не вакъыт оладжакъ? Сенинъ келишинъни ве ахыр заман якъынлашкъаныны косьтерген бельги насыл оладжакъ?

4 ^dИса джевап берип оларгъа:

– Ич кимсе сизлерни алдатмасын деп, сакът олунъыз! 5 ^eЧокъ адамлар Меним Адым иле келип: «Мен Месихим», – деп, чокъ адамларны алдатаджакълар, – деди. 6 ^f– Сиз якъын дженк шаматасыны ве узакъ дженк акъкъында хаберлерни эшитирсиз. Амма къоркъманъыз: ойле олмакъ керек. Лякин бу даа сонъу дегиль. 7 ^gХалкъ халкъкъа къаршы, падишалыкъ падишалыкъкъа къаршы котериледжек. Тюрлю топракъларда ачлыкълар ве ер тепренювлери оладжакъ. 8Буларнынъ эписи исе – тек буюк азапларнынъ башланувы. 9 ^hО вакъытта сизлерни къыйнайджакълар ве ольдюреджеклер. Мен ичюн эписи халкъларнынъ адамлары сизлерден нефретленеджек. 10 ⁱЧокъ адам иманындан вазгечеджек, бир-бирини сатаджакъ, бир-бирини кореджек козьлери олмайджакъ. 11 ^jЧокътан-чокъ ялан пейгъамберлер пейда олып, чокъ адамларны алдатаджакъ. 12Адалетсизлик чокълашкъаны себебинден чокъусынынъ севгиси пек азлашаджакъ. 13 ^kЛякин сонъунадже сабыр эткен адам къуртарыладжакъ. 14 ^lОндан эвель исе бутюн дюньяда Алла Падишалыгъы акъкъында бу Къуванчлы Хабер илян этиледжек. Бу хабер эписи халкъларгъа шаатлыкъ оладжакъ. О вакъыт сонъу келеджек.

Буюк беля

15 ^m‌ ⁿШунынънен, Даниял пейгъамбер айткъан «пис арамлыкъ» Азиз Ерде тургъаныны корьсенъиз (окъугъан адам озю анъласын!), 16Еудиеде олгъан адамлар дагъларгъа къачсынлар. 17 ^oДам устюнде тургъан адам эвинден бир шей алмакъ ичюн ашагъа тюшмесин. 18Тарлада олгъан адам усть урбасыны алмагъа къайтып бармасын. 19 ^pО куньлерде юклю ве бала эмиздирген къадынларгъа беля оладжакъ! 20Къачувынъыз къышта я да раатлыкъ куню олмасын деп, дувалар окъунъыз. 21 ^qО вакъытта, дюньянынъ биринджи куньлерден башлап бу куньлерге къадар олмагъан ве даа бир кере олмайджакъ буюк белялар оладжакъ.

22 ^rЭгер о куньлернинъ сайысы азлаштырылмагъан олса, ич бир джан къуртулып оламаз эди. Лякин сайлангъан адамлар ичюн о куньлернинъ сайысы азлаштырыладжакъ. 23 ^sЭгер о вакъыт кимдир сизге: «Бакъынъыз, Месих мында!» я да «О, анда!» – десе, инанманъыз. 24 ^tЯлан месихлер ве ялан пейгъамберлер пейда олып, имкяны олса, сайлангъанларны биле ёлдан урмакъ ичюн, буюк аджайип шейлер япаджакълар ве бельгилер косьтереджеклер. 25 ^uМына, Мен буны сизлерге эвельден айтып бердим. 26Шунынънен, эгер сизлерге: «Бакъса, О сахрада», – деселер, анда барманъыз. Я да «Бакъса, О бу эв ичинде», – деселер, инанманъыз. 27 ^vИнсан Огълунынъ къайтып келиши шаркътан гъарпкъадже кокте яшнагъан йылдырым киби оладжакъ.

28 ^wОлю беден къайда олса, леш къарталлары да шу ерде топланаджакълар.

Инсан Огълунынъ келюви

29 ^x‌ ^yБирден шу куньлернинъ буюк мусибетинден сонъ «Кунеш къара оладжакъ,
ай да ярыкъ бермейджек.
Йылдызлар коктен тюшеджеклер
ве коклердеки кучьлер сарсыладжакълар».

30 ^zО вакъытта кокте Инсан Огълунынъ бельгиси пейда оладжакъ. Ер юзюндеки эписи миллетлер окюр-окюр агълайджакълар, коктеки булутлар устюнде къудрет ве буюк шан-шурет иле келеяткъан Инсан Огълуны кореджеклер. 31 ^aaО, Озюнинъ мелеклерини ёллайджакъ. Олар, кучьлю бору чалдырып, сайлагъан адамларыны кокнинъ бир четинден башкъа четинедже, дюньянынъ дёрт тарафындан топлап келеджеклер.

Инджир терегининъ орьнеги

32 ^abИнджир тереги сизге кинаели дерс олсун: онынъ пытагъы къабарып, япракълары ачылгъанда, яз якъынлашкъаныны билесиз. 33Сиз де буларнынъ эписини корсенъиз, билинъиз: О энди якъын, босагъада тура.

34 ^acСизлерге догърусыны айтам: шимдики несиль ёкъ олмаздан эвель, буларнынъ эписи оладжакъ. 35 ^adКок ве ер из къалдырмайып кечерлер, лякин Меним сёзлерим кечмез.

Кунь ве саат акъкъында кимсе бильмей

36 ^ae‌ ^afБу къайсы куню ве саат къачта оладжагъы акъкъында не Огъул, не коклердеки мелеклер билелер. Тек Баба биле. 37 ^agНух куньлеринде насыл олгъан олса, Инсан Огълу келеджек куньлеринде де ойле оладжакъ. 38Сув ташкъыны кельмезден эвель олгъан куньлерде, Нух сандыкъкъа кирмегендже, адамлар ашап-иче, эвлене ве акъайгъа чыкъа эдилер. 39 ^ahСув ташкъыны келип, эр кесни ёкъ этмегендже, асыл да тюшюнмей эдилер. Инсан Огълу келеджек кунюнде тамам ойле де оладжакъ.

40 ^aiО вакъытта эки адам тарлада олгъанда, Алла бирисини аладжакъ, экинджисини исе къалдыраджакъ. 41Дегирмен ташында ун чеккен эки къадындан бириси алынаджакъ, бириси къалдырыладжакъ. 42 ^ajБунынъ ичюн эр заман азыр олунъыз. Раббинъиз не заман келеджегини бильмейсинъиз. 43 ^akЛякин шуны билинъиз: эв саиби хырсыз гедженинъ къайсы саатинде келеджегини бильсе, юкъламайып, хырсызгъа эвине кирмеге ёл бермез эди. 44 ^alБойледже, сизлер де азыр олунъыз. Инсан Огълу сиз беклемеген саатте къайтып келеджек.

Ишанчлы ве яман къуллар акъкъында

45 ^amИшанчлы ве акъыллы къул ким? Эфендиси оны эв къуллары устюнде башлыкъ этип, оларгъа керек вакътында ашларыны бермеге къойды. 46 ^anЭфендиси кельгенде, онынъ бойле япкъаныны корьсе, о къул не къадар бахтлы! 47Сизге догърусыны айтам: эфенди оны озюнинъ бутюн мал-мулькюне бакъыджы этип къояр. 48 ^aoЭгер де бу яман къул озь гонълюнде: «Эфендим якъын арада кельмейджек», – деп тюшюнсе, 49башкъа къулларны урмагъа башласа, ичкиджилернен берабер ашап-ичсе, 50о къулнынъ эфендиси бекленильмеген бир куньде, тюшюнмеген бир саатте къайтып келир 51 ^apве оны къылычнен экиге болип, онъа экиюзьлюлернинъ арасында ер береджек. Анда агълав ве тиш гъыджыртысы оладжакъ.