‏ Matthew 27

Исаны аким Пилатнынъ огюне алып баралар

1 ^aСаба эрте баш руханийлер ве халкънынъ акъсакъаллары, Исаны ольдюрмек къарарыны чыкъармакъ ичюн, бирлешип топландылар. 2 ^bОны багъладылар ве аким Пилатнынъ огюне алып бардылар.

Иуданынъ олюми

3 ^cИсаны саткъан Иуда исе, Онынъ олюмге укюм этильгенини билип, пешман этти ве отуз кумюшни баш руханийлер ве акъсакъалларгъа къайтарып:

4– Мен гуна яптым, къабаатсыз адамны саттым, – деди. Олар исе:

– Бундан бизлерге не? О сенинъ ишинъ! – дедилер.

5 ^dИуда исе акъчаларны Сарайда котерип атты ве о ерден кетип, озюни асты.

6 ^eБаш руханийлер акъчаны алып: «Бу парада къан бар, оны хазинеге къоймагъа Къанун разылыкъ бермей», – дедилер. 7Озьара анълашып, бу акъчагъа чет адамлар комюледжек мезарлыкъ ичюн чёльмекчининъ тарласыны сатын алдылар. 8Шунынъ ичюн о тарла бу куньлерге къадар «Къан Тарласы» деп адлана. 9 ^fШунынънен Йирмея пейгъамбернинъ агъзындан айтылгъаны беджерильди: Исраиль огъуллары Онъа фият къойгъан отуз кумюшни алды.
10 ^gАлла манъа буюргъан киби, чёльмекчининъ тарласыны сатын алдылар.

Пилат Исаны соргъу япа

11 ^h‌ ⁱИса исе акимнинъ огюнде турды. Аким Ондан:

– Еудийлернинъ Падишасы Сен оласынъмы? – деп сорады.

– Буны сен озюнъ айтасынъ, – деди онъа Иса.

12Баш руханийлер ве акъсакъаллар Исаны къабаатлагъанда, О ич бир шей айтмай эди. 13 ^jПилат Онъа:

– Эшитмейсинъми, Санъа къаршы не къадар шаатлыкъ япалар! – деди.

14Лякин Иса бу лафларгъа бир сёз биле джевап къайтармады. Аким пек шашты.

Халкъ Бараббаны сайлай

15 ^kЭр Песах Байрамында акимнинъ халкъ истеген бир мабюсни азат эткен адети бар эди. 16Бу сефер зинданда намлы бир айдут бар эди, онынъ ады Иса Барабба эди. 17Халкъ топлангъанда, Пилат олардан:

– Сизлер кимни азат эткенимни истейсиз? Иса Бараббаны, я да Месих деп адлангъан Исанымы? – деп сорады.

18 ^lО, олар Исаны пахыллап теслим эткенлерини анълай эди. 19Пилат къады курсюсине отургъанда, апайындан хабер кельди: «О инсафлы адамгъа ич бир шей япма. Бугунь мен тюшюмде О ичюн пек азап чектим».

20 ^mБаш руханийлер ве акъсакъаллар халкъны къандырдылар, ве халкъ Бараббаны азат этмесини ве Исаны ольдюрильмесини талап эттилер. 21Аким олардан:

– Сизлер экисинден къайсы бирини азат эткенимни истейсиз? – деп сорады.

– Бараббаны! – деп джевап бердилер.

22Пилат оларгъа:

– Я Месих деп адлангъан Исанен не япайым? – деди.

– Хачкъа мыхлансын! – деди олар.

23 ⁿ– О не яманлыкъ япты? – деп сорады аким. Лякин олар даа зияде багъырып:

– Хачкъа мыхлансын! – дедилер.

24 ^oПилат ич бир шей ярдым этмегенини, аксине исьян котериледжегини корип:

– Мен бу адамнынъ къаны тёкюледжегинде къабаатлы дегилим. Бу ишни озьлеринъиз бакъынъыз! – деди де, халкънынъ козю огюнде сув кетиртип, эллерини ювды.

25 ^pБутюн халкъ бунъа джевап берип:

– Онынъ къаны бизим ве балаларымызнынъ башында олсун! – деди.

26 ^qБундан сонъ Пилат Бараббаны чыкъарып йиберди, Исаны исе къамчылап хачкъа мыхламагъа эмир берди.

Исаны масхара этелер

27 ^rАкимнинъ аскерлери Исаны преториягъа ▼

▼Претория – укюмдар Пилатнынъ яшагъан ве римли аскерлер яткъан ер.

алып бардылар. Исанынъ этрафында бутюн арбий болюкни ▼

▼Арбий болюк – къ. юн. «спейра» – «легион»нынъ он пайындан бир пайы, 600 аскер.

топладылар. 28Онынъ урбаларыны чыкъарып, устюне къырмызы тюслю урба ▼

▼Бунъа ошагъан урбаны тек падишалар кие эдилер.

кийдирдилер. 29Тикенлерден тадж орип, башына такътылар. Онъ къолуна таякъ берип, Онынъ алдында тиз чёктилер ве:

– Яшасын еудийлернинъ Падишасы! – деп масхара эттилер. 30 ^vСонъ Онынъ устюне тюкюрип, таякъ алып башына урдылар. 31Масхаралап тойгъан сонъ, устюнден урбасыны чыкъарып, Озюнинъ урбаларыны кийдирдилер ве хачкъа мыхламакъ ичюн алып кеттилер.

Исаны хачкъа мыхлайлар

32 ^wОлар чыкъып кетеяткъанларда, киренели Симон деген бир адамны расткетирдилер. Оны Исанынъ хачыны котерип бармагъа меджбур эттилер. 33«Къафа Ери» манасыны анълаткъан, Голгофа деген ерге кельдилер. 34 ^xАнда Исагъа ичмек ичюн оть къарыштырылгъан шарап ▼

▼Шарап – агърыгъа чыдамагъа енгильдже олсун деп, юзюм шарабына аджджы бир илядж къоша эдилер.

бердилер. Иса оны дудакъларына тийдирди, амма ичмеге истемеди.

35 ^zСонъ Оны хачкъа мыхлап къойдылар. Урбалары ичюн джереп чекип, озьара пайлаштылар 36ве отурып, Оны къаравулладылар. 37Онынъ башы тёпесинде: «Бу – Иса, еудийлернинъ Падишасы», – деп, къабаатыны косьтерген языны къойдылар.

38Исанен даа эки айдутны – бирисини онъ тарафында, экинджисини сол тарафында хачкъа мыхлап къойдылар. 39 ^aaКечип кетеяткъанлар башларыны саллап, Исагъа куфюр сёзлер айта эдилер:

40 ^ab– Эй, Сен, Алланынъ Сарайыны йыкъкъан ве учь кунь ичинде къургъан адам! Озюнъни къуртарса! Эгер Сен Алланынъ Огълу олсанъ, хачтан тюшсе!

41Баш руханийлер, Къанун оджалары ве акъсакъаллар да Оны мыскъыллай эдилер:

42 ^ac– Башкъаларны къуртара эди, Озюни исе къуртарып оламай! О – Исраильнинъ Падишасы! Хачтан тюшсюн, о вакъытта биз Онъа инанырмыз! 43О, Аллагъа ишанды. Эгер Алла Оны истесе, Оны къуртарсын! О: «Мен Алланынъ Огълу олам», – деген!

44Исанен берабер хачкъа мыхлангъан айдутлар да Оны шойле сёге эдилер.

Исанынъ олюми

45 ^adУйледен башлап саат учьке къадар бутюн дюньяны къаранлыкъ басты. 46 ^aeСаат учьлерде Иса къатты сеснен къычырып:

– Эли, Эли, лема савахтани? – деди. Бу сёзлернинъ терджимеси: «Аллам, Аллам! Сен не ичюн Мени къалдырып кеттинъ?» – демектир.

47О ерде тургъанлардан базылары буны эшитип:

– О, Ильясны чагъыра, – дедилер.

48 ^afОлардан бириси тез-тез чапып барып, сюнгерни экши шарапкъа батырып, таякъ уджуна илиштирди де, Исагъа узатты. 49Башкъалары исе:

– Токъта бакъайыкъ, Ильяс келип Оны къуртараджакъмы? – дедилер.

50Иса исе даа бир кере къатты сеснен къычырып, сонъки нефесини чыкъарды.

51 ^agШу ань Алла Сарайындаки перде тёпеден ашагъадже йыртылып, экиге болюнди. Ер титреди, къаялар ярылды. 52 ^ahКъабирлер ачылды ве чокъ раметли азизлер тирильди. 53 ^aiОлар къабирлеринден чыкъып, Иса тирильген сонъ мукъаддес шеэрге кирдилер ве чокъ адамларгъа корюндилер.

54Исаны къаравуллагъан юзбашы ве онынъ аскерлери ер титрегенини ве башкъа вакъиаларны корип, пек къоркътылар ве:

– Акъикъатен О – Алланынъ Огълу экен! – дедилер.

55Анда чокъ къадынлар да узакътан бакъып турмакъта эдилер. Олар Галилеядан башлап Исанынъ пешинден кетип, Онъа хызмет эткен эдилер. 56 ^ajОларнынъ арасында магдалалы Мерьем, Якъупнен Юсуфнынъ анасы Мерьем эм де Зебедай огъулларынынъ анасы бар эди.

Исанынъ дефн этилюви

57 ^akАкъшам Ариматея шеэринден олгъан Юсуф адлы бир зенгин адам кельди. О да Исанынъ шегирти эди. 58Пилатнынъ огюне барып, Исанынъ беденини сорады. Пилат беденни онъа берильмесини буюрды. 59Юсуф джесетни алып, темиз кетен безге сарды 60 ^alве озюнинъ къаяда оюлгъан янъы къабринде дефн этти. Къабирнинъ агъзыны балабан бир ташнен къапатып, кетти. 61Магдалалы Мерьемнен башкъа Мерьем исе къабирнинъ къаршысында отурмакъта эдилер.

Къабир янында сакъчылар

62Эртеси куню – раатлыкъ куню – баш руханийлер ве фериселер Пилаткъа кельдилер ве:

63 ^am– Эфендимиз, шу яланджы даа сагъ олгъанда: «Мен учь куньден олюлер арасындан турарым», – дегенини хатырладыкъ. 64Шунынъ ичюн учюнджи куню кечмегендже, Онынъ мезарыны къорумагъа эмир эт. Ёкъса, Онынъ шегиртлери келип, джеседини хырсызлар да, халкъкъа: «О олюлер арасындан тирилип турды», – дерлер. Эм бу ялан биринджисинден де бетер олур, – дедилер.

65Пилат оларгъа:

– Сизде сакъчылар бар. Барып, бильгенинъиз киби къабирни къаравулланъыз, – деди.

66 ^anОлар барып, къабир ташына муурь бастылар ве къабирни къорумагъа къаравулларны къойдылар.