‏ Matthew 7

Башкъаларны къабаатлав акъкъында

1 ^a‌ ^bКимсени укюм этменъиз, сизни де укюм этмезлер. 2 ^cНасыл укюм этсенъиз, шойле де укюм этилирсиз. Насыл ольчювнен ольчесенъиз, ана шу ольчювни де алырсыз.

3Сен не ичюн къардашынънынъ козюндеки чёпке бакъасынъ, озь козюнъде исе агъачны корьмейсинъ? 4Насыл этип, къардашынъа: «Бер, козюнъдеки чёпни чыкъарып алайым», – дейсинъ? Бакъса, сенинъ козюнъде агъач бар! 5Эй, экиюзьлю! Башта агъачны озь козюнъден чыкъарып ал да, сонъ чёпни къардашынънынъ козюнден насыл чыкъараджагъынъны корерсинъ.

6 ^dМукъаддес олгъан шейни копеклерге берменъиз – олар устюнъизге атылып, сизни парчаларлар. Инджилеринъизни домузлар огюне сепменъиз – оларны таптап ташларлар.

Соранъыз, къыдырынъыз, къакъынъыз

7 ^eСоранъыз – сизге бериледжек. Къыдырынъыз – тападжакъсыз. Такъырдатынъыз – сизге ачыладжакъ. 8 ^fЭр бир сорагъан ала, къыдыргъан тапа, такъырдаткъангъа къапуны ачалар.

9Огълу бабасындан отьмек сорагъанда, сизинъ аранъызда онъа таш берген адам тапылырмы? 10Балыкъ сораса исе, онъа йылан берген сою бармы? 11 ^gСиз, яман адамлар олып, балаларынъызгъа яхшы бир шей бере билесинъиз. Коклердеки Бабанъыз да Ондан сорагъангъа яхшы шейлерни багъышлар. 12 ^hШунынъ ичюн, адамлар сизге не япкъаныны истесенъиз, сиз де оларгъа шуны япынъыз. Бунда бутюн Къанун ве Пейгъамберлернинъ Язылары тура.

Тар къапу

13 ⁱТар къапудан киринъиз! Олюмнинъ къапусы кенъ, ве анда алып баргъан ёл пек бол. Шу ёлдан юргенлер де чокъ. 14 ^jОмюр къапусы исе пек тарашлыкъ, ёлу да тар, бу ёлны тапкъанлар да аз.

Терек ве онынъ мейвалары

15 ^k‌ ^lЯлан пейгъамберлерден сакът олунъыз! Олар сизинъ алдынъызгъа къозу терисинен къапланып келелер, лякин ичинде йыртыджы къашкъырлардыр. 16 ^mОларны япкъан ишлери мейваларындан танырсыз. Когемден юзюм, я да тикенектен инджир джыялармы? 17 ⁿЭр бир яхшы терек яхшы мейва бере, ярамай терек исе ярамай мейва бере. 18Яхшы терек ярамай мейва бермей, ярамай терек исе яхшы мейва бермей. 19 ^oЯхшы мейва бермеген эр бир терекни пычып, атешке ташлайлар. 20Бойледже, ялан пейгъамберлерни ишлерининъ мейваларындан танырсыз.

Къанун бозгъанлар акъкъында

21 ^p‌ ^qМанъа: «Раббим, Раббим!» – дегенлернинъ арасындан Кок Падишалыгъына тек базылары кирип оладжакъ. Анда тек Коклердеки Бабамнынъ истегенини беджергенлер киреджеклер. 22 ^rШу куню чокъ адамлар Манъа: «Раббим, Раббим! Биз Сенинъ Адынънен пейгъамберлик этмедикми? Сенинъ Адынънен джинлерни къувып чыкъармадыкъмы? Сенинъ Адынънен чокъ аджайип шейлер япмадыкъмы?» – дейджеклер. 23 ^sО вакъыт Мен оларгъа: «Мен сизни бир вакъыт бильмедим. Эй, Къанунны бозгъанлар, Меним янымдан кетинъиз!» – деп джевап береджем.

Эки эв къуруджы акъкъында

24 ^tЭнди, ким Меним бу сёзлеримни эшитип, оларны беджерсе, озь эвини таш устюнде къургъан акъыллы адамгъа ошайджакъ. 25Ягъмур ягъып, озенлер ташып, еллер эсип, эвнинъ устюне тюшселер биле, таш устюнде къурулгъаны ичюн, эв бозулмаз. 26Ким Меним сёзлеримни эшитип, оларны беджермесе, озь эвини къум устюнде къургъан акъылсыз адамгъа ошайджакъ. 27 ^uЯгъмур ягъып, озенлер ташып, еллер эсип, эвнинъ устюне тюшселер, эв эшилип, дагъылып кетеджек.

28Иса бу сёзлерни айтып битиргенинен, адамлар Онынъ огреткенине шаштылар. 29 ^vИса оларны Къанун оджалары киби дегиль, буюк къудрет берильген адам киби огрете эди.