Mat 1 | CrhCTB | STEP | ‌ Ибраимнинъ ве Давутнынъ союндан олгъан Иса Месих акъкъында ривает. Мына Онынъ баба-деделери:

‏ Matthew 1

Иса Месихнинъ несиллер джедвели

1 ^a‌ ^bИбраимнинъ ве Давутнынъ союндан олгъан Иса Месих акъкъында ривает. Мына Онынъ баба-деделери:

2 ^cИбраим – Исхакънынъ бабасы, Исхакъ – Якъупнынъ бабасы, Якъуп – Ехуданынъ ве агъа-къардашларынынъ бабасы эди. 3 ^dЕхудадан ве Тамардан Перец ве Зерах догъулдылар. Перец – Хецроннынъ бабасы, Хецрон – Рамнынъ бабасы, 4 ^eРам – Амминадавнынъ бабасы, Амминадав – Нахшоннынъ бабасы, Нахшон – Салмоннынъ бабасы эди. 5 ^fСалмондан ве онынъ апайы Рахавдан Боаз догъулды. Боаздан ве онынъ апайы Руттан Овед догъулды. Овед – Йишайнынъ бабасы, 6 ^gЙишай – Давут падишанынъ бабасы эди. Давут падишадан ве Уриянынъ сабыкъ апайындан Сулейман догъулды. 7 ^hСулейман – Реховоамнынъ бабасы, Реховоам – Авиянынъ бабасы, Авия – Асанынъ бабасы, 8 ⁱАса – Ехошафатнынъ бабасы, Ехошафат – Ехорамнынъ бабасы, Ехорам – Уззиянынъ бабасы, 9 Уззия – Ётамнынъ бабасы, Ётам – Ахазнынъ бабасы, Ахаз – Хизкиянынъ бабасы, 10 Хизкия – Менашшенинъ бабасы, Менашше – Амоннынъ бабасы, Амон – Ёшиянынъ бабасы эди.

11 ^jИсраиллилер Вавилонгъа сюргюн этильгенде, Ёшиядан Еконья ве онынъ агъа-къардашлары догъулды. 12 ^kВавилонгъа сюргюн этильгенден сонъ, Еконьядан Шеалтиэл догъулды. Шеалтиэлден Зеруббавел, 13 Зеруббавелден Авиуд, Авиуддан Эльяким, Эльякимден Азор, 14 Азордан Цадокъ, Цадокътан Ахим, Ахимден Элиуд, 15 Элиуддан Элазар, Элазардан Маттан, Маттандан Якъуп догъулды. 16 ^lЯкъуптан Мерьемнинъ акъайы Юсуф догъулды. Мерьемден Месих деп адлангъан Иса догъулды.

17 Бойледже, эписи олып, Ибраимден Давуткъа къадар – он дёрт несиль, Давуттан Вавилонгъа сюргюнликкедже – он дёрт несиль, Вавилонгъа сюргюнликтен сонъ Месих догъгъандже – он дёрт несильдир.

Иса Месихнинъ догъувы

18 ^m‌ ⁿИса Месих бойле догъды:

Онынъ анасы Мерьем Юсуфкъа нишанлы эди. Амма оларнынъ никяхларындан эвель Мерьемнинъ Мукъаддес Рухтан бала беклегени белли олды. 19 ^oОнынъ киеви Юсуф инсафлы адам олгъаны себебинден, Мерьемден айырылмакъ ниетине кельди, лякин гизли, чюнки къадынны масхара этмеге истемеди. 20 Бойле фикирге кельген вакъытта, гедже онынъ тюшюнде Раббиден бир мелек келип:

– Эй, Давутнынъ огълу Юсуф! Сен Мерьемге эвленмектен асыл къоркъма. Онынъ къарнындаки Бала – Мукъаддес Рухтандыр. 21 ^pМерьем огъул догъаджакъ, ве сен Онынъ Адыны Иса къояджакъсынъ. О, Озь халкъыны гуналарындан къуртараджакъ, – деди.

22 ^qБуларнынъ эписи, Раббининъ пейгъамбер ярдымынен айткъан сёзлери ерине кельмеси ичюн олды: 23 «Бакъынъыз, къыз юклю олып, огъул догъаджакъ, Адыны Иммануэл къояджакълар». Иммануэл – «Алла бизнен» демектир.

24 Юсуф уянгъанынен, Раббининъ мелеги онъа буюргъаныны япты ве Мерьемге эвленди, 25 амма апайы огъул тапмагъандже онен ятмады. Догъгъан огълунынъ Адыны Иса къойды.