Mat 16 | CrhCTB | STEP | ‌ Фериселер ве саддукийлер Исаны сынамакъ макъсадынен Онынъ алдына келип, коктен бельги косьтергенини талап эттилер.

‏ Matthew 16

Фериселер ве саддукийлер бельги талап эте

1 ^a‌ ^bФериселер ве саддукийлер Исаны сынамакъ макъсадынен Онынъ алдына келип, коктен бельги косьтергенини талап эттилер. 2 Иса исе оларгъа джевап берип:

– Акъшам тюшкенде, сиз: «Кок къырмызы тюсте, ава ачыкъ оладжакъ», – дейсиз. 3 Саба эрте исе: «Кок къою къырмызы тюсте ве оны булутлар къапаткъан, бугунь фуртуна оладжакъ», – дейсиз. Сиз кок юзюне бакъып, оладжакъ аваны айта билесиз, заманнынъ аляметлерини исе айырып оламайсызмы? 4 ^cЯрамай ве ороспу несиль бельги къыдыра, лякин Юнуснынъ бельгисинден гъайры оларгъа бельги берильмейджек, – деди ве оларны къалдырып кетти.

Фериселернинъ ве саддукийлернинъ «маясы»

5 ^dБашкъа ялыгъа етип кельген шегиртлер янларына отьмек алмагъа унуткъанлар. 6 ^eИса оларгъа:

– Бакъынъыз, фериселернен саддукийлернинъ маясындан сакъынынъыз! – деди.

7 Олар исе озьара: «Буны отьмек алмагъанымыз ичюн айтты», – дедилер. 8 ^fИса, бу акъта билип, оларгъа:

– Эй, иманы аз олгъанлар! Сиз не ичюн озьара, янымызда отьмек ёкъ, дейсиз? 9 ^gБуны даа анъламайсынъызмы? Беш дане отьмекни беш бинъ адам ашап, даа не къадар сепет отьмек парчаларыны джыйып алгъанынъыз акъылынъыздамы? 10 ^hЯ еди отьмек дёрт бинъ адам ичюн? О вакъыт къач буюк сепет джыйдынъыз? 11 Мен сизлерге: «Фериселер ве саддукийлернинъ маясындан сакът олунъыз», – дегеним отьмек акъкъында олмагъаныны насыл анъламайсынъыз? – деди.

12 Шундан сонъ шегиртлер, Иса оларгъа отьмек маясындан дегиль, фериселер ве саддукийлернинъ огретювинден сакът олмакъ кереклигини айткъаныны анъладылар.

Пётр Исагъа «Месих» дей

13 ⁱФилипнинъ Кайсареясы этрафларына кельген Иса Озь шегиртлеринден:

– Адамлар Инсан Огълуны ким деп саялар? – деп сорады.

14 ^j– Базылары Сени Сувгъа Батырыджы Ягъя, башкъалары – Ильяс, дигерлери исе – Йирмея, я да пейгъамберлерден бириси деп саялар, – деди шегиртлер. 15 Иса олардан:

– Я сиз Мени ким деп саясыз? – деп сорады.

16 ^kСимон Пётр джевап берип:

– Сен – Месихсинъ, Тири Алланынъ Огълусынъ! – деди. 17 ^lИса онъа:

– Сен бахтлы адамсынъ, Симон Бар-Йона! Бу сырны санъа къан ве беден дегиль, Меним Коклердеки Бабам ачты. 18 ^mШунынъ ичюн Мен санъа айтам: сен – Пётрсынъ ^{▼▼Пётр – къ. юн. «петрос» сёзю «къая» манасыны ташый.}, ве бу къаянынъ устюнде Мен Озь Топлашувымны ^{▼▼Топлашув – Аллагъа инангъан ве Исанынъ огретювини къабул эткен адамларнынъ топлашувы.} къураджам. Оны олюлер дюньясынынъ кучьлери биле енъип оламайджакълар. 19 ^pСанъа Кок Падишалыгъынынъ анахтарларыны береджем. Нени ер юзюнде ясакъ этсенъ, шуны коклерде де ясакъ этеджеклер. Нени ер юзюнде рухсет этсенъ, шуны коклерде де рухсет этеджеклер, – деди.

20 ^qСонъ Иса шегиртлерине Озюни Месих олгъаны акъкъында кимсеге айтмагъа кесен-кес ясакъ этти.

Иса Озь азаплары, олюми ве тирилюви акъкъында эвельден айта

21 ^r‌ ^sШу вакъыттан башлап, Иса шегиртлерине Онъа Ерусалимге бармагъа кереклигини, анда акъсакъаллар, баш руханийлер ве Къанун оджалары къолунда чокъ азап чекип, ольдюриледжегини, амма учюнджи куню тириледжегини ачыкъ-айдын айтып башлады.

22 Пётр Оны четке чекип:

– Алла сакъласын, Раббим! Сеннен бойле шей ич бир вакъыт олмаз! – деп, Оны азарлап башлады.

23 ^tИса исе айланып:

– Ёкъ ол козюмден, Шейтан! Сен Мени ёлдан урасынъ! Сен Алланынъ ишлерини дегиль, адам ишлерини тюшюнесинъ, – деди Пётргъа.

24 ^uСонъ Иса Озь шегиртлерине:

– Эгер ким Меним артымдан кетмеге истесе, озюнден вазгечип, озь хачыны котерип, Меним артымдан юрсюн! – деди. 25 ^v– Ким озь джаныны къуртармагъа истесе, оны джояджакъ. Лякин ким Мен ичюн джаныны берсе, о, джаныны тападжакъ. 26 ^wЭгер инсан бутюн дюньяны басып алса да, озь джанына зарар кетирсе, бунынъ файдасы не олур? Инсан, озь джаныны къуртармакъ ичюн, не берер? 27 ^xИнсан Огълу Озь Бабасы Шуретининъ нурунда, Онынъ мелеклеринен берабер келеджек ве эр кимни япкъанына коре мукяфатлайджакъ. 28 ^yСизге догърусыны айтам: бу ерде тургъанлардан базылары даа олюм не олгъаныны бильмейип, Инсан Огълунынъ Озь Падишалыгъынен берабер кельгенини кореджеклер.