Mat 17 | CrhCTB | STEP | ‌ Алты кунь кечкен сонъ, Иса янына Пётрны, Якъупны ве онынъ къардашы Юханны алды ве тек оларнен берабер бир дагъгъа котерильди.

‏ Matthew 17

Исанынъ корюниши денъише

1 ^a‌ ^bАлты кунь кечкен сонъ, Иса янына Пётрны, Якъупны ве онынъ къардашы Юханны алды ве тек оларнен берабер бир дагъгъа котерильди. 2 ^cИсанынъ бутюн корюниши оларнынъ козьлери огюнде денъишти: Онынъ бети кунеш киби парылдады, урбасы исе козь къамаштырып бем-беяз олды. 3 ^dБакъса, оларнынъ огюнде Муса ве Ильяс пейда олдылар да, Исанен субетлешип башладылар.

4 Пётр Исагъа:

– Раббим, бу ерде бизге не яхшы я! Эгер истесенъ, мен мында учь чалаш къурайым: бириси Санъа, бириси Мусагъа ве бириси Ильяскъа олсун, – деди.

5 ^eПётр бу сёзлерни даа айткъанда, апансыздан бир нур сачкъан булут пейда олып, оларны кольгесинен къапатты. Шу булут ичинден бир сес чыкъты:

– Бу Меним севимли Огълумдыр, Мен Ондан разым! Оны динъленъиз!

6 Бу сесни эшиткен шегиртлер буюк бир къоркъуда юзьлерини ерге берип йыкъылдылар. 7 Иса оларнынъ янына келип, оларгъа тийди де:

– Къоркъманъыз, турунъыз! – деди.

8 Шегиртлер козьлерини котерип, янларында Исадан гъайры кимсени корьмедилер. 9 ^fДагъдан тюшкенде, Иса шегиртлерине:

– Инсан Огълу олюлерден тирильмегендже, мында корьген шейлерни кимсеге айтманъыз, – деп буюрды.

10 Шегиртлери Ондан:

– Не ичюн Къанун оджалары: «Башта Ильяс кельмек керек», – дейлер? – деп сорадылар. 11 ^gИса оларгъа джевап берип:

– Бу керчек, башта Ильяс келип, эр шейни азырламакъ керек, – деди. 12 ^h– Мен сизлерге айтам: Ильяс энди кельди, амма оны танымадылар ве онен истеген шейлерни яптылар. Шойле де Инсан Огълу оларнынъ къолларындан чокъ азап чекмеге меджбур.

13 ⁱО вакъытта шегиртлер, Иса оларгъа Сувгъа Батырыджы Ягъя акъкъында айткъаныны анъладылар.

Иса джин ургъан баланы тедавийлей

14 ^jОлар халкъкъа къайтып кельгенде, Исагъа бир адам якъынлашып, тиз чёкти де:

15 – Эфендим, огълума мерамет эт! Онда тутарыкъ хасталыгъы бар, о пек чекише. Сыкъ-сыкъ де атешке, де сувгъа дала, – деди. 16 – Баламны Сенинъ шегиртлеринъе кетирдим, амма олар оны тедавийлеп оламадылар.

17 – Эй, имансыз ве бозукъ адамлар! Не вакъыткъадже сизлернен оладжам?! Не къадаргъадже сизлерге даянаджам?! Баланы бу ерге, Меним алдыма кетиринъиз! – деди Иса.

18 ^kИса джинге чыкъмагъа эмир берди, ве джин чыкъты, бала исе шу ань тедавийленди. 19 Сонъ шегиртлер, Иса бир Озю къалгъанда, Онъа якъынлашып:

– Биз джинни не ичюн къувып чыкъаралмадыкъ? – деп сорадылар. 20 – 21 ^lИса оларгъа:

– Сизинъ иманынъыз аз. Сизге догърусыны айтам: сизинъ бир хардал урлугъы къадар иманынъыз олгъанда, сиз мына бу дагъгъа: «Бу ерден о ерге кочь», – дейджексиз, ве о кочеджек. Сонъ сиз япалмайджакъ шей олмайджакъ, – деди.

Иса кене Озь олюми ве тирилюви акъкъында айта

22 ^mИса шегиртлеринен Галилеяда олгъанда, О, оларгъа:

– Инсан Огълуны адамларнынъ къолуна тутып береджеклер 23 ⁿве ольдюреджеклер, амма учюнджи куню О, тириледжек, – деди. Сонъ шегиртлерни буюк бир гъам басты.

Алла Сарайынынъ салымы акъкъында

24 ^oОлар Къафарнаумгъа кельгенлеринде, Алла Сарайынынъ салымыны ^{▼▼Алла Сарайынынъ салымы – къ. юн. «дидрахмон», яни эки драхме. Еудийлер Алланынъ Сарайы ичюн эр йыл эки куньлюк иш акъкъына тенъ кельген салымны бере эдилер.} топлайыджылар Пётрнынъ алдына келип:

– Сизлернинъ Оджанъыз Сарай салымыны береми? – деп сорадылар. Пётр:

– Бере! – деди.

25 О эвге кирген сонъ, Иса биринджи лаф ачты:

– Симон, сенинъ фикиринъ насыл? Бу дюнья падишалары салым я да бергини кимден алалар? Озь огъулларынданмы я да ябанджыларданмы?

26 – Ябанджылардан, – деди Онъа Пётр.

– Ойле олса, озь огъуллары салымдан азат экен де, – деди Иса. 27 ^q– Амма салым топлайыджыларнынъ джаныны агъыртмамакъ ичюн, сен гольге барып балыкъ къармагъы ташла. Биринджи тутулгъан балыкъны алып, агъзыны ачсанъ, бир акъча ^{▼▼Акъча – къ. юн. «статер», демек, дёрт драхме.} тапарсынъ. Акъчаны алып, экимиз ичюн оларгъа салым бер, – деди Иса.