‏ Matthew 19

Айрылышув акъкъында Исанынъ огретюви

1 ^aИса бу сёзлерни айтып битиргенинен, Галилеядан кетип, Иордан озенининъ артындаки Еудие топракъларына кельди. 2Онынъ пешинден чокъ адамлар кеттилер, ве О оларны анда тедавийледи.

3Исаны сынамакъ ниетинен, фериселер Онынъ алдына келип:

– Акъайгъа олур-олмаз себепке коре озь апайындан Къанун боюнджа айырылмакъ мумкюнми? – деген суальни бердилер. 4 ^bИса оларгъа шойле джевап берди:

– Я сиз окъумадынъызмы? Яратыджы тап башындан адамларны эр киши ве къадын киши оларакъ яратты 5 ^cве: «Шу себептен акъай ана-бабасыны къалдырып, озь апайына япышаджакъ, ве олар экиси бир вуджут оладжакълар», – деди. 6 ^dБойледже, олар энди эки дегиль, бир беден сайылалар. Алла къошкъаныны адам айырмасын.

7 ^eОлар Исагъа:

– Ойле олса, Муса не ичюн, акъай апайындан айырылса, айрылышув кягъытыны язып бермеге эмир эткен? – дедилер. 8О оларгъа:

– Юреклеринъиз таш киби олгъаны ичюн, Муса сизлерге апайларынъыздан айырылмагъа рухсет берген, – деди. – Лякин башта бойле дегиль эди.

9 ^f– Мен сизлерге айтам: ким аиле садыкълыгъыны бозувдан башкъа себеп тапып, озь апайындан айырылса ве башкъасына эвленсе, садыкълыкъны бозып гуна япа, – деди Иса. 10Шегиртлери Исагъа:

– Эгер акъай эвленювге шойле бакъса, эвленмегени яхшы олур эди! – дедилер. 11 ^gИса оларгъа:

– Бу айткъанны эр кес къабул этип оламай. Оны тек Алла къабилиет берген адамлар анълай. 12Базы адамлар догъгъан кунюнден акъайлыгъыны косьтерип оламайлар. Башкъаларыны исе адамлар ойле япалар. Даа башкъалары Кок Падишалыгъы ичюн озьлери эвленювден вазгечелер. Ким буны къабул этип олса, къабул этсин! – деди.

Иса ве балалар

13 ^hО вакъытта Исагъа, башларына къолларыны къойып дува окъусын деп, балаларны кетирдилер. Шегиртлери исе оларгъа ёл бермедилер. 14 ⁱИса оларгъа:

– Балаларгъа кельмеге ёл ачынъыз, оларны токътатманъыз, Меним алдыма кельсинлер. Алланынъ Падишалыгъы оларнынъкидир, – деди 15ве оларнынъ башларына къолларыны къойгъан сонъ, о ерден кетти.

Бай огълан

16 ^j‌ ^kБир кунь Онъа бир адам келип:

– Оджа! Эбедий аяткъа кирмек ичюн насыл яхшылыкъ япайым? – деп сорады. 17 ^lИса онъа:

– Сен Менден яхшылыкъ акъкъында не сорайсынъ? Тек бир Алла яхшыдыр. Эгер эбедий аяткъа кирмеге истесенъ, эмирлерни беджер, – деди.

18– Къайсыларны? – деп сорады о. Иса онъа:

– Адамнынъ джаныны алма, аиле садыкълыгъыны бозма, хырсызлама, ялан шаатлыкъ этме, 19 ^mана-бабанъны урьмет эт ве якъын адамны озюнъни севгенинъ киби сев, – деди. 20 ⁿЙигит Онъа:

– Мен буларнынъ эписини япам. Манъа даа не етишмей? – деди. 21 ^oИса онъа:

– Эгер эксиксиз олмагъа истесенъ, бар, эписи мал-мулькюнъни сатып, акъчасыны фукъарелерге болип бер. О вакъыт зенгинлигинъ кокте оладжакъ. Сонъ кель де, артымдан юр, – деди.

22Йигит бу сёзлерни эшитип, къайгъы ичинде о ерден чыкъып кетти. Онынъ байлыгъы буюк эди де.

23 ^pИса исе шегиртлерине:

– Сизге догърусыны айтам: зенгин адамнынъ Кок Падишалыгъына киргени къыйын оладжакъ. 24Даа сизге айтам: зенгин адамнынъ Алла Падишалыгъына киргенинден девенинъ ине тешигинден кечкени къолайдыр, – деди.

25Шегиртлер буны эшитип, джандан тааджиплендилер ве:

– Ойле олса, ким къуртарыладжакъ экен? – деп сорадылар.

26 ^qИса оларгъа дикъкъатнен бакъып:

– Адамларнынъ имкяны ёкъ, лякин Алланынъ ярдымынен эр шей олмакъ мумкюн, – деди.

27 ^rБу сёзге джевап берип, Пётр Исагъа:

– Мына, биз эр шейни къалдырып, Сенинъ артынъдан кеттик. Бунынъ ичюн бизге не оладжакъ? – деди. 28 ^sИса оларгъа:

– Сизге догърусыны айтам: дюньянынъ янъы догъувында Инсан Огълу шан-шуретли тахткъа отургъанда, Меним артымдан кельген сизлер де он эки тахткъа отурып, Исраильнинъ он эки къабилесине укюм этерсиз. 29 ^tМен ичюн эв-баркъ, агъа-къардаш, тата-къызкъардаш, ана-баба, апай-бала ве ер-мулькюни ташлап кеткен эр бир адам булардан юз кере чокъ тападжакъ ве эбедий аятны мирас киби аладжакъ. 30 ^uЛякин шимди биринджи олгъан чокъ адамлар сонъунда оладжакъ, сонъунда олгъанлар исе биринджи оладжакълар, – деди.