‏ Matthew 21

Исанынъ Ерусалимге тантананен киргени

1 ^a‌ ^bЕрусалимге якъынлашкъанда, Зейтюн дагъы этегиндеки Бетфаге шеэрине етип кельдилер. Иса эки шегиртини ёллап:

2– Къаршынъыздаки койге барынъыз, анда бир кереден багълы тургъан эшекни ве онынъ янында эшечикни корерсиз. Оларны чезип, Меним алдыма кетиринъиз. 3Эгер бир кимсе сизге бир шей айтса, «Булар Раббимизге керек», – деп джевап беринъиз, ве о шу ань сизге оларны алмагъа рухсет этер, – деди.

4 ^cБу олгъан шей пейгъамбер аркъалы айтылгъан сёзлер беджерильмеси ичюн олды: 5Сион къызына ▼

▼Сион къызы – Ерусалим шеэри. О, Сион дагъы устюнде ерлешкен эди.

айтынъыз:
– Мына, Озю алчакъгонъюлли,
яш эшекнинъ ве юк ташыгъан эшекнинъ баласы устюнде
янынъа сенинъ Падишанъ келе.

6Шегиртлер ёлгъа чыкъып, Исанынъ оларгъа буюргъаныны яптылар. 7Эшекнен баласыны кетирип, оларнынъ устюне кийимлерни тёшедилер, ве урбалар устюне Иса минди. 8 ^eХалкънынъ чокълугъы озь урбаларыны ёлгъа джайдырды. Базылары исе терек пытакъларыны кесип, ёлгъа тёшедилер. 9 ^fОнынъ огюнде ве артында юргенлер:

– Давут Огълуна шукюр! Раббининъ Ады иле Келеяткъанны шуретленъиз! Коклерде Аллагъа бинъ шукюрлер! – деп къычыра эдилер.

10Иса Ерусалимге кирип кельгенде, бутюн шеэр:

– Бу ким я? – деп арекетке кельди. 11 ^gХалкъ исе:

– Бу – Галилеянынъ Назарет шеэринден олгъан Иса пейгъамбер! – деп джевап берди.

Иса Алланынъ Сарайында

12 ^h‌ ⁱИса Алланынъ Сарайына келип, анда алыш-вериш япкъанларнынъ эписини къувып чыкъарды. Акъча алмаштырыджыларнынъ масаларыны, гогерджин сатыджыларнынъ курсюлерини авдарып йиберди. 13 ^jИса оларгъа:

– Языда: «Эвиме “Ибадет Эви” дейджеклер», – деп язылгъан. Сизлер исе оны айдутлар къобасына чевиргенсиз! – деди.

14Сарайда Исанынъ алдына сокъурлар ве топаллар кельди. О оларны тедавийледи. 15 ^kЛякин баш руханийлер ве Къанун оджалары Исанынъ япкъан аджайип ишлерини ве Сарайда: «Давут Огълуна шукюр олсун!» – деп къычыргъан балаларны корип, ачувландылар 16 ^lве Исагъа:

– Булар не айталар, эшитесинъми? – дедилер. Иса оларгъа:

– Эбет! Я сизлер: «Сени сабийлер ве уфакъ балалар макътай», – деген сёзлерни окъумадынъызмы? – деди.

17 ^mСонъ Иса оларны къалдырып, шеэрден чыкъты ве Бетаниягъа барып, о ерде геджеледи.

Къуруп къалгъан инджир тереги

18 ⁿ‌ ^oСаба эрте Иса шеэрге къайтып келеяткъанда ач олды. 19 ^pЁл четинде бир инджир терегини корип, онынъ янына барды. Иса япракълардан гъайры ич бир шей тапмайып, терекке:

– Энди сенинъ мейванъ эбедий олмасын! – деди. Инджир тереги исе шу ань къуруп къалды. 20Буны корьген шегиртлер шашып:

– Насыл этип инджир тереги бирден къуруп къалды? – дедилер.

21 ^qИса оларгъа джевап берип:

– Сизлерге догърусыны айтам: эгер иманлы олсанъыз ве шубеленмесенъиз, тек инджир терегинен япкъанымны дегиль де, мына бу дагъгъа: «Еринъден котерилип, денъизге атыл!» – десенъиз, айткъанынъыз киби оладжакъ. 22 ^rСизлер дува окъугъанда, ишанчнен не сорасанъыз, оны аладжакъсыз, – деди.

Исанынъ къувети акъкъында суаль

23 ^s‌ ^tИса Алланынъ Сарайына кирип, адамларны огреткенде, Онынъ алдына халкътан баш руханийлер ве акъсакъаллар келип:

– Бу ишлерни япмагъа Сенинъ акъкъынъ бармы? Санъа бу акъны ким берди? – деп сорадылар. 24Иса оларгъа джевап берип:

– Мен де сизлерге бир суаль береджем. Манъа джевап берсенъиз, бу ишлерни япмагъа насыл акъкъым олгъаныны сизлерге айтарым. 25 ^uЯгъя халкъны сувгъа батырып чыкъаргъаны кимден эди? Алладан я да адамларданмы? – деди.

Олар исе озьара давалашып башладылар: «Эгер “Алладан”, – десек, О бизлерден: “Не ичюн Ягъягъа инанмадынъыз?” – деп сорайджакъ. 26 ^vЭгер “Адамлардан”, – десек…? Биз халкътан къоркъамыз. Эписи Ягъяны пейгъамбер деп саялар». 27Олар Исагъа:

– Бильмеймиз, – деп джевап бердилер. Иса оларгъа:

– Мен де буларны япмагъа насыл акъкъым олгъаныны сизлерге айтмам, – деди.

Эки огъул акъкъында кинаели икяе

28– Сизлернинъ фикиринъиз насыл? Бир адамнынъ эки огълу бар экен. О биринджисине барып: «Огълум, бугунь барып юзюм багъымызда ишле», – дей. 29Амма о: «Истемейим!» – деп сёз къайтара. Сонъ пешман этип, бара. 30О адам экинджи огълуна барып, онъа да шойле дей. Огълу онъа джевап берип: «Барам, эфендим», – дей, лякин бармай. 31Экисинден къайсы бири бабасынынъ истегини беджере?

Исагъа:

– Биринджиси, – дедилер. О оларгъа:

– Сизге догърусыны айтам: салым топлайыджылар ве ороспулар сизден эвель Алланынъ Падишалыгъына кирерлер, – деди. 32 ^w– Ягъя сизге догъру ёлны косьтерип кельди, лякин сизлер онъа инанмадынъыз. Салым топлайыджылар ве ороспулар исе онъа инандылар. Сизлер буны корьген сонъ да, пешман этмединъиз ве инанмадынъыз, – деди.

Яман юзюмджилер акъкъында кинаели икяе

33 ^x‌ ^y– Энди башкъа бир кинаели икяе динъленъиз: бир ер саиби бар экен. О, юзюм багъы сачып, этрафыны къоралады, юзюм сыкъмакъ ичюн чукъур къаздырды, сонъ къаравул къуллесини къурып, багъны юзюмджилерге кирагъа берди, ве озю ёлгъа чыкъты. 34Юзюмлер пишкен вакъты кельгенде, о озюнинъ берекетини алмакъ ичюн, юзюмджилернинъ алдына хызметчилерини ёллады. 35 ^zЮзюмджилер исе онынъ хызметчилерини туттылар ве бирисини котекледилер, даа бирисини ольдюрдилер, учюнджисини ташларнен урдылар. 36Багънынъ саиби башкъа хызметчилерини, биринджи кереден зияде хызметчилерини ёллады. Юзюмджилер исе оларнен де шойле яптылар. 37 ^aaСонъунда багъ саиби: «Огълумдан утанырлар», – деп, оларнынъ алдына озь огълуны ёллады. 38 ^abЛякин юзюмджилер онынъ огълуны корип, бир-бирине: «Бу – мирасчы! Барып, оны ольдюрейик ве мирасыны алайыкъ», – дедилер. 39 ^acОны тутып, багъдан тышарыгъа чыкъарып, ольдюрдилер. 40Юзюм багъынынъ саиби къайтып кельгенде, бу юзюмджилернен не япар экен?

41 ^adДинълегенлер Исагъа:

– Бу яман адамларны къоркъунчлы ольдюреджек, багъыны исе башкъа, онъа махсулларны озь вакътында берген юзюмджилерге берер, – дедилер.

42 ^aeИса оларгъа айтты:

– Я сиз Языда: «Къуруджылар келишиксиз деп четке ташлагъан таш
бинанынъ темельташы олды.
Козюмиз огюнде япылгъан аджайип шей –
Алланынъ ишидир!» – денильгенини окъумадынъызмы?

43Шунынъ ичюн сизлерге айтам: Алланынъ Падишалыгъы сизден алынып, махсул кетирген халкъкъа бериледжек. 44 ^afБу ташкъа тюшкенлер эписи парчаланып кетеджек. Таш кимнинъ устюне тюшсе, оны эзип ташлайджакъ.

45Баш руханийлер ве фериселер Исанынъ кинаели икяелерини динълеген сайын, олар акъкъында айтылгъаныны анъладылар. 46 ^agОлар Исаны якъаламагъа истедилер, амма халкътан къоркътылар, чюнки халкъ Исаны пейгъамбер деп сая эди.