Micah 1
Алла Озь халкъына ачувлана
1 aЕхуда падишалары Ётамнынъ, Ахазнынъ ве Хизкиянынъ заманларында РАББИ морешетли Микъагъа Самарие ве Ерусалим акъкъында берген хабер ве руя. 2 b– Эй, халкъларнынъ эписи, эшитинъиз!Дюнья ве дюньяда яшагъан эр ким, къулакъ асынъыз!
РАББИ-ТААЛЯ сизлерге къаршы шаат олсун,
Рабби Озюнинъ Мукъаддес Сарайындан шаатлыкъ берсин!
3 cРАББИ Озь еринден чыкъаджакъ,
ашагъы энеджек,
ернинъ ибадет тёпелерини басаджакъ, –
4 dОнынъ аягъы астында дагълар ирип кетеджек,
вадийлер, атештен ириген балавуз киби,
юксек къаядан тюшкен сувлар киби,
дагъылып кетеджеклер.
5Буларнынъ эписи Якъупнынъ яман ишлери ичюн,
Исраиль эвининъ гуналары ичюн оладжакъ.
Якъуп нечюн яман ишлер япты?
Бунынъ себепчиси Самарие дегиль эдими?
Ехудада ибадет тёпелерини ким къурды?
Ерусалим дегильми?
6Шунынъ ичюн Самариени ачыкъ чёльдеки чёплюк обасына чевиреджегим,
оны юзюм сачыладжакъ ер япарым,
онынъ ташларыны вадийге ташларым
ве шеэрнинъ диварларыны темеллерине къадар бозарым.
7 eОнынъ эписи таш путлары къырыладжакъ,
ороспулыкънен къазангъан бахшышларнынъ эписи атеште якъыладжакъ.
Онынъ бутюн путларыны ёкъ этеджегим.
О, путларны ороспулыкънен къазангъан бахшышлардан топладылар,
ве олар кене ороспуларнынъ къазанчы оладжакъ.
Микъа Исраильнинъ ве Ехуданынъ енъильгени ичюн агълай
8 fШунынъ ичюн мен окюр-окюр агълайджагъым,чыплакъ ве ялынаякъ юреджегим,
шакъал киби улуйджагъым,
байкъуш киби къычыраджагъым.
9 gСамариенинъ яралары яхшы олмаз;
хасталыкъ Ехудагъа да кельди,
меним халкъымнынъ къапусына,
Ерусалим шеэрине якъынлашты.
10 hБу хаберни Гъат шеэринде бильдирменъиз,
анда къычырып агъламанъыз.
Бет-Леафрада къасеветнен тоз ичинде юварланып ятынъыз.
11Эй, Шафирде яшагъанлар,
чыплакъ ве масхара олып кетинъиз.
Цаананда яшагъанлар шеэринден чыкъмайлар.
Бет-Эцел шеэри агълавгъа толгъан,
о да сизге ярдым этмез.
12 iМаротта яшагъанлар агърыдан дёрт буклене,
теселли келеджегини беклейлер.
РАББИден кельген беля Ерусалим къапусында тура.
13 jЭй, Лакиш халкъы, атларны арабаларгъа ек.
Сен Исраильнинъ яманлыкъларыны япып башладынъ
ве биринджи олып, Сион къызыны ▼
▼Сион къызы – Ерусалим шеэри ве анда яшагъан халкъ.
гунагъа батырдынъ.14 lШунынъ ичюн сен сагълыкълашкъанда,
Морешет-Гъат шеэрине бахшышлар йибереджексинъ,
Акъзив шеэри Исраиль падишаларыны алдатаджакъ.
15 mЭй, Мареша шеэринде яшагъанлар,
Мен сизни запт этеджек биревни алып келеджегим.
Исраильнинъ намлы башлыкълары Адуллам шеэрине къачып кетеджек.
16 nСевимли балаларынъны тартып алгъанлары ичюн сачларынъны тыраш эт.
Сенинъ башынъ, леш къарталынынъ башы киби, таз олсун,
чюнки балаларынъ сенден сюргюн этиледжек.
Copyright information for
CrhCTB