‏ Micah 4

Ер юзюндеки Раббининъ падишалыгъы

1Сонъки куньлерде РАББИнинъ Эви тургъан дагъ
дагъларнынъ башы оладжакъ,
байырлардан юксек котериледжек,
ве онъа тараф халкълар, озенлер киби, акъып келеджеклер.
2 ^aХалкъларнынъ чокъусы барып, шойле дейджек:
«Айдынъыз, РАББИнинъ дагъына котерилейик,
Якъупнынъ Алласынынъ Эвине кирейик.
О бизге Озь ёлларыны корьсетеджек,
ве бизлер Онынъ ёлларындан юреджекмиз».
О заман РАББИ Сиондан Къанунны огретеджек,
Ерусалимден Озь Сёзюни ёллайджакъ.
3 ^bРАББИ чокъ халкъны суд этеджек,
узакъ ерлердеки чокъ миллетнинъ даваларыны чезеджек.
Сонъра олар къылычларындан сабан тишлерини дёгеджек,
мызракъларындан пычакъларны япаджакъ.
Бир даа халкъ халкъкъа къаршы къылыч котермейджек,
энди дженк этмеге огренмейджек.
4 ^cЛякин эр кес озь юзюм пытагъы тюбюнде,
озь инджир тереги тюбюнде отураджакъ,
ве оларны къоркъутаджакъ киши олмайджакъ.
Ордуларнынъ РАББИси шойле айтты.

5 ^dЭр бир халкъ озь алласынынъ адынен юрсе де,
бизлер омюрлик Алламыз РАББИнинъ Адынен юреджекмиз.

Исраильнинъ гъурбетликтен къайтувы акъкъында

6 ^eРАББИ бойле дей:
– Шу куню Мен топал халкъымны топлайджагъым,
сюргюн этильгенлерни ве Мен джезалагъанларны арткъа къайтараджагъым.
7Топал халкъымны сагъ къалдыраджагъым,
узакъларгъа сюргюн этильгенлерни кучьлю халкъкъа чевиреджегим.
Шу куньден башлап, РАББИ оларгъа Сион дагъындан
омюрбилля падишалыкъ япаджакъ.
8Эй, Сион къызы, Ерусалим шеэри,
къойлар ичюн къаравуллыкъ къуллеси,
сен, эвельки киби, падишалыкънынъ баш шеэри оладжакъсынъ,
ве Ерусалим халкъы падишалыкъ этеджек.

9 ^fНе ичюн сен о къадар къычырып агълайсынъ?
Сенинъ падишанъ ёкъмы?
Не ичюн догъураяткъан къадын киби къычырасынъ?
Сенинъ меслеатчынъ гъайып олдымы?
10 ^gЭй, Ерусалим халкъы! Догъураяткъан къадын киби,
чекиш ве агърыдан дёрт буклен;
шимди сен шеэрден чыкъаджакъсынъ
ве тарлада яшайджакъсынъ.
Сен Вавилонгъа кетеджексинъ,
анда сен къуртуладжакъсынъ.
Анда РАББИ сени душманларынънынъ къолундан
сатын аладжакъ.

11Шимди чокъ халкъ санъа къаршы чыкъты ве:
«Сион арамлансын,
козьлеримиз де бунъа бакъып тойсун», – дейлер.
12 ^hАмма олар РАББИнинъ тюшюнджелерини бильмейлер,
Онынъ ниетлерини анъламайлар.
О исе оларны, армангъа богъдай культелери киби, топлады.
ⁱЭй, Сион къызы! Тур да, арманны бас.
Мен сени кучьлю япарым.
Сен, демир бойнузлары ве бакъыр туякълары олгъан бугъа киби,
кучьлю оладжакъсынъ.
Сен чокъ халкъны къырып ташлайджакъсынъ,
оларнынъ арам мулькюни ве байлыгъыны
РАББИге, дюньянынъ Эфендисине багъышлайджакъсынъ.
13