Micah 6
Алла Исраильни къабаатлай
1Энди РАББИнинъ сёзлерини динъленъиз:– Тур, дагъларнынъ огюнде озь даванъ акъкъында айтып бер,
байырлар сенинъ сёзлеринъни эшитсин!
2 aЭй, дагълар ве ернинъ сарсылмаз темеллери!
РАББИнинъ къабаатлавыны эшитинъиз, –
РАББИ Озь халкъынен, Исраильнен давалаша.
3 bЭй, халкъым! Мен санъа не яптым?
Санъа насыл агъырлыкъ эттим?
Манъа джевап бер.
4 cМен сени Мысыр топракъларындан чыкъардым,
къуллукъ еринден сени сатын алдым,
сенинъ огюнъде Мусаны, Харунны ве Мерьемни йибердим.
5 dЭй, халкъым! Акълынъа кетир:
Моав падишасы Балакъ сизге къаршы нелер тюшюнди?
Беорнынъ огълу Белам онъа насыл джевап берди?
Шиттимден Гилгалгъа къадар не олды?
Мен, РАББИ, сизге ишанчлыгъымны косьтердим.
6 eРАББИни насыл къаршылайым?
Юдже Аллагъа насыл ибадет этейим?
Онынъ огюне бутюнлей якъыладжакъ къурбанларнен,
бир йыллыкъ таналарнен чыкъайыммы?
7 fБинълернен къочкъар кетирсем,
дерья-дерья зейтюн ягъыны акъызсам,
РАББИнинъ разылыгъыны къазанырыммы?
Къанунсыз ишлерим ичюн биринджи огълумны берейимми?
Джаным ишлеген гуналары ичюн Онъа балаларымны алып кетирейимми?
8 gЭй, инсан! Эйилик не олгъаны санъа бильдирильди,
РАББИ сенден не истегени де хабер этильди:
адалетли арекет этмек, мераметни севмек
ве Алланънынъ огюнде юваш юрекнен яшамакъ.
9РАББИ шеэрни чагъыра.
Сенинъ Адынъдан къоркъмагъа – акъыллы шейдир.
Къолунда падишанынъ акимиети олгъанны
ве шу акимиетни онъа берген Биревнинъ сёзлерини динъленъиз.
10 hЯрамайларнынъ эвлери арам къазангъан байлыкъкъа толу,
анда да пис яланджы теразелери.
11 iЯланджы теразелерини ве ялан ташларыны Мен къабул этмем.
12 jШеэр байлары залымлыкъкъа толу,
анда яшагъанлар ялан айталар,
озь тиллеринен алдаталар.
13Шунынъ ичюн Мен гуналарынъыз ичюн ойле урарым ки,
бир даа аякъкъа турып оламазсынъ.
Сени бутюнлей ёкъ этеджегим.
14 kАшайджакъсынъ, амма тоймайджакъсынъ,
ашкъазанынъ бош къаладжакъ.
Сакълайджакъсынъ, амма сакълап оламайджакъсынъ.
Сакъланып къалгъанны да сизден къылычнен тартып аладжакълар.
15 lУрлукъ сачаджакъсынъ, амма берекет алмайджакъсынъ,
зейтюн сыкъаджакъсынъ,
амма ягъынен сюртюнмейджексинъ.
Юзюм шырасыны сыкъаджакъсынъ,
амма шарап ичмейджексинъ.
16 mСизлер Омрийнинъ низамнамелерини беджере эдинъиз,
Ахав эвининъ бутюн япкъанларыны япа эдинъиз,
оларнынъ ишлерине коре яшай эдинъиз.
Шунынъ ичюн Мен сени ёкъ этмеге,
сакинлеринъни мыскъылламагъа ёл береджегим,
сизлер Меним халкъым олсанъыз да,
ашаланаджакъсынъыз.
Copyright information for
CrhCTB