‏ Nehemiah 5

Факъыр-фукъарелернинъ борджларыны багъышлайлар

1 aБир кунь акъайлар ве оларнынъ апайлары озь ехудалы къардашларына къаршы чыкътылар. 2Базылары:

– Бизлер, огъулларымыз ве къызларымыз чокъмыз. Бизлерге яшамакъ, сагъ къалмакъ ичюн, ашлыкъ керек, – дедилер.

3Башкъалары:

– Ачлыкъ себебинден ашлыкъ сатын алмакъ ичюн, биз тарлаларымызны, юзюмликлеримизни, эвлеримизни залоггъа бермеге меджбур олдыкъ, – дедилер.

4Даа башкъалары исе:

– Биз падишагъа берги тёлемек ичюн, тарлаларымызны ве юзюмликлеримизни залоггъа берип, борджкъа кумюш алмагъа меджбурмыз.
5 bБиз де ехудалы къардашларымыз кибимиз! Огъулларымызнынъ оларнынъ огъулларындан фаркъы ёкъ! Бизлер исе огъул-къызларымызны къул оларакъ бермек керекмиз. Къызларымызнынъ базылары энди къуллукъкъа берильди. Лякин биз бир шей япып оламаймыз, чюнки бизим тарла ве юзюмликлеримиз энди башкъаларнынъ къолундадыр! – дедилер.

6Мен оларнынъ ярдым истегенини ве бойле сёзлерини эшитип, пек ачувландым. 7 cЮрегим сызлады, мен мырзаларны ве башлыкъларны сёгдим ве оларгъа серт-серт:

– Сизлер къардашларынъыздан фаиз аласынъыз! – дедим.

Сонъ оларгъа къаршы буюк топлашув чагъырдым
8 dве бойле дедим:

– Биз къолумыздан кельгени къадар ябанджы халкъларгъа сатылгъан озь къардашларымыз ехудалыларны кери сатын алмагъа тырышамыз. Сизлер исе озь къардашларынъызны сатасынъыз. Кене бизге сатылсынлар депми?

Олар исе индемей, бир шей айтып оламай эдилер.
9 eСонъ мен:

– Япкъанынъыз яхшы шей дегиль. Душманларымыз олгъан башкъа халкълар сизни масхара этмесин деп, Алламыздан къоркъып яшамакъ керек дегильсизми? – дедим.
10– Мен де, агъа-къардашларым да, хызметчилерим де халкъкъа борджкъа кумюш ве отьмек бердик. Шу борджлардан фаиз алмайыкъ! 11Шимди оларгъа тарлаларыны, юзюмликлерини, зейтюн багъларыны ве эвлерини къайтарып беринъиз. Олардан кумюш ве ашлыкътан, шарап ве зейтюн ягъындан алынгъан фаизлерни де къайтарынъыз!

12 fО вакъыт олар:

– Къайтарып берермиз ве башкъа сорамамыз. Сен айткъанынъ киби япармыз, – дедилер.

Мен руханийлерни чагъыртып, оларны руханийлернинъ огюнде ант эттирдим.
13 gСонъра мен урбаларымны къакътым ве бойле дедим:

– Алла сёзюни тутмагъан эр кимни бойле этип озь эвинден къакъсын, малыны-мулькюни элинден алсын! Эр шейи къакъылып алынсын, бом-бош къалсын! – дедим. Бутюн джемаат да бунъа:

– Амин! – деди, РАББИге шукюр этти, ве халкъ сёзлерини тутты.

Нехемья – мераметли виляет башлыгъы

14 hБундан да гъайры, мен Ехуда топрагъынынъ виляет башлыгъы олып тайинленген куньден, Артахшаста падишалыгъынынъ 20-нджи йылындан 32-нджи йылына къадар, 12 йыл девамында мен ве агъа-къардашларым виляет башлыгъынынъ ашларыны ашамадыкъ. 15Менден эвель олгъан виляет башлыкълары исе халкъкъа юк эдилер, 40 кумюш
40 кумюш – къ. еуд. «40 шекель».
берги алып, бундан гъайры ашлыкъ ве шарап ала эдилер. Оларнынъ хызметчилери биле халкъкъа башчылыкъ япа эдилер. Амма мен, Алладан къоркъып, бойле япмадым.
16Мен Ерусалим диварыны къурмагъа девам эттим. Эписи хызметчилерим анда ишке топланды. Тарлаларны исе биз сатын алмадыкъ.

17Софрамда 150 ехудалы ве башлыкъ, бундан да гъайры, къомшу халкълардан кельген адамлар ашай эдилер. 18Бир куньде бир баш бугъа, алты баш семиз къой ве бир къач къуш союла эди. Он куньде чешит шараплар бол-бол ичиле эди. Бунъа къошма оларакъ, халкънынъ япкъан иши пек агъыр олгъаны ичюн, мен озюме виляет башлыгъы ашыны сорамадым.

19 jАллам! Шу халкъкъа япкъан эйиликлеримни унутма!
Copyright information for CrhCTB