Num 11 | CrhCTB | STEP | Сонъ халкъ Аллагъа къаршы сес котерип, шикяет эткен халкъкъа чевирильди. РАББИ буны эшиткенинен, пек ачувланды, ве оларда РАББИнинъ атеши туташып, ордунынъ кенарларыны якъып ёкъ этти.

‏ Numbers 11

Таверада алевленген Раббининъ атеши

1 ^aСонъ халкъ Аллагъа къаршы сес котерип, шикяет эткен халкъкъа чевирильди. РАББИ буны эшиткенинен, пек ачувланды, ве оларда РАББИнинъ атеши туташып, ордунынъ кенарларыны якъып ёкъ этти. 2 ^bХалкъ Мусаны чагъырып ярдым сорады. Муса РАББИге дува этти, ве атеш ятышты. 3 Оларда РАББИнинъ атеши туташкъаны ичюн, о ерге Тавера ^{▼▼Тавера – къ. еуд. бу аднынъ айтылувы «туташып янмакъ» манасыны анълаткъан ибаренинъ айтылувына ошай.} деген ад берильди.

Етмиш акъсакъал

4 ^dАраларындаки ярамай адамлар озь истеклерини анълатып башладылар, Исраиль огъуллары да оларнен берабер агълап башладылар ве бойле айтып отура эдилер: «Ах, бизге этни ким береджек? 5 Мысырда бедава ашагъан балыкъны акъылымызда тутамыз, хыярлар, къавунлар, ешиль согъан, согъан ве сарымсакъ аля даа акъылымызда. 6 ^eШимди джанымыз тарсыкъа, бир шей ёкъ, бу маннадан гъайры бир шей корьмеймиз».

7 Манна кориандр урлугъына ошай эди, корюниши бедолах ^{▼▼Бедолах – мис къокъулы чам сакъызы.} киби эди. 8 ^gХалкъ долашып, оны топлай ве къол дегирменде чеке я да аванда эзе, къазанларда пишире ве ондан пите япа эди. Леззети зейтюн ягъынен пишкен отьмекке ошай эди. 9 Геджесинен ордугъа чыкъ тюшкенде, манна да тюше эди.

10 Муса халкънынъ озь сойларында, чадырларынынъ къапулары янында агълагъаныны эшитти. РАББИ бунъа пек ачувланды, Муса да шуны пек бегенмеди.

11 Муса РАББИге:

– Не ичюн Сен къулунъны къыйнайсынъ? Не ичюн мен Сенинъ козюнъде мерамет тапамадым да, Сен манъа бутюн халкънынъ агъырлыгъыны юклединъ? 12 Бутюн бу халкъны къурсагъымда ташыдыммы, мен оны догъурдыммы? Дая баланы къучакъта ташыгъаны киби, деделерине бермеге емин эткен топрагъынъа мен оларны ташыгъанымны Сен не ичюн истейсинъ? 13 Бутюн бу халкъкъа береджек этни къайдан алайым? Меним огюмде: «Бизге ашамакъ ичюн эт бер», – деп агълайлар. 14 ^hБутюн бу халкъны ташымагъа бир озюмнинъ такъатым ёкъ, мен ичюн бу артыкъ агъырдыр. 15 ⁱМанъа буны япмагъа истесенъ, – эгер козюнъде мерамет къазангъан олсам, – мени ольдюр, башыма тюшкен беляларны корьмейим, – деди.

16 ^jРАББИ Мусагъа бойле деди:

– Исраиль акъсакъалларындан 70 акъайны, сен бильген акъсакъалларны ве башлыкъларны топла. Оларны Корюшюв Чадыры янына кетир, ве анда сеннен берабер турсунлар. 17 ^kМен энеджегим ве анда сеннен лакъырды этеджегим. Сенинъ устюнъдеки Рухтан алып, оларгъа береджегим. Сонъ олар халкънынъ юкюни сеннен берабер ташыйджакълар, сен бир озюнъ шу агъырлыкъны бир даа ташымайджакъсынъ. 18 ^lХалкъкъа исе бойле айт: «Ярынгъа озьлеринъизни элялланъыз, ве эт ашайджакъсынъыз. РАББИ сизинъ: “Бизге этни ким береджек? Ах, Мысырда бизге не де яхшы эди!” – деп агълагъанынъызны эшитти ве сизге ашамакъ ичюн эт береджек. 19 Лякин оны ялынъыз бир кунь, эки кунь, беш, он я да йигирми кунь ашамайджакъсынъыз, 20 бир ай боюнджа, о, бурнунъыздан чыкъып козюнъиз корип оламагъандже ашайджакъсынъыз. Чюнки аранъызда олгъан РАББИден вазгечтинъиз ве Онынъ огюнде: “Неге керек эди бизге Мысырдан чыкъып кетмеге?” – деп агъладынъыз».

21 ^mМуса бойле деди:

– Меним халкъымнынъ арасында 600 000 джаяв юрген акъай бардыр, Сен исе: «Мен оларгъа эт берерим де, олар оны бир ай девамында ашарлар», – дейсинъ. 22 Олар ичюн къой-эчкилер ве туварлар союлса, олар тоярмы? Денъиздеки бутюн балыкъ тутулса, олар тоярмы?

23 ⁿРАББИ Мусагъа:

– Меним къудретим сынъырлымы, аджеба? Санъа айткъанларым ерине келип-кельмейджегини шимди кореджексинъ, – деди.

24 Муса тышарыгъа чыкъып, халкъкъа РАББИнинъ сёзлерини бильдирди. Халкънынъ акъсакъалларындан 70 акъай сайлады ве оларны Корюшюв Чадырынынъ чевресине ерлештирди. 25 Сонъ РАББИ булутнынъ ичинде энди ве Мусанен лакъырды этти. Мусанынъ устюндеки Рухтан алып, 70 акъсакъалгъа берди. Рух оларнынъ устюне энгенде, олар пейгъамберлик этип башладылар, амма ондан сонъ пейгъамберлик этмедилер.

26 Эки акъай ордуда къалгъан эди, бирисининъ ады Элдад, экинджисининъ ады Медад. Оларгъа да Рух энди, ве олар ордуда пейгъамберлик эттилер. Олар джедвельде язылгъан эдилер, лякин Чадыргъа кетмеген эдилер. 27 Бир яш огълан чапып кельди ве Мусагъа:

– Элдад ве Медад ордуда пейгъамберлик этелер, – деген хабер кетирди.

28 Муса сайлап алгъан ярдымджыларындан бири Нуннынъ огълу Ехошуа:

– Муса-эфендим, оларгъа буны япмагъа ёл берме! – деди.

29 Лякин Муса онъа бойле джевап къайтарды:

– Сен меним адымдан куньлейсинъми? РАББИнинъ бутюн халкъы пейгъамбер оладжагъыны ве РАББИ оларгъа Озь Рухуны береджегини истер эдим!

30 Сонъ Муса ве Исраиль акъсакъаллары ордугъа къайттылар.

Боденелер ве пек яман хасталыкъ

31 ^oСонъра РАББИ ель котерди. Ель денъизден боденелерни кетирди ве оларны ордунынъ чевре-четинде, эр тарафындан бир куньлюк ёл къадар узакълыкъта, ерден бир метр ^{▼▼Бир метр – къ. еуд. «эки аммах».} юксеклигинде ташлады. 32 Халкъ котерилип, бутюн кунь, бутюн гедже ве бутюн эртеси куню боденелерни джыя эди. Энъ аз джыйгъан сойлары элли чувалдан ^{▼▼Элли чувал – къ. еуд. «10 хомер».} зияде джыйды. Боденелерни озьлери ичюн ордунынъ чевре-четине тёшедилер. 33 Эт даа халкънынъ тишлеринде олып чайналмагъан вакъытта, РАББИнинъ ачувы халкъкъа тюшти, ве РАББИ халкъны пек яман хасталыкънен урды. 34 Анда башкъа ашны истеген халкъны джыйгъанлары ичюн, бу ерге Киврот-Хаттаава ^{▼▼Киврот-Хаттаава – къ. еуд. бу ибаренинъ айтылувы «ачкозь адамларнынъ мезарлары» манасыны анълаткъан ибаренинъ айтылувына ошай.} ады берильди.

35 ^sХалкъ Киврот-Хаттаавадан Хацероткъа ёл алды ве Хацеротта токътады.