Numbers 12
Мерьемнинъ джезасы
1Муса хушлу бир апайгъа эвленген эди. Мерьем ве Харун Мусаны онынъ хушлу апайы ичюн сёге башладылар 2ве: – РАББИ ялынъыз Мусанен лакъырды эттими? О бизлерге де айтмадымы ёкъса? – дедилер. РАББИ буны эшитти. 3Муса ер юзюнде яшагъан адамлардан энъ юваш адам эди. 4РАББИ апансыздан Мусагъа, Харунгъа ве Мерьемге бойле деди: – Сиз, учевинъиз, Корюшюв Чадырына келинъиз. Учеви кельдилер. 5РАББИ булут дирегинде энди, Чадырнынъ кириши янында турды ве Харуннен Мерьемни чагъырды. Экиси якъынлаштылар. 6 aРАББИ оларгъа бойле деди: – Сёзлериме къулакъ асынъыз: аранъызда бир пейгъамбер олгъанда, Мен, РАББИ, онъа руяда корюнем, тюшюнде онен лакъырды этем. 7 bАмма къулум Муса ойле дегильдир, о, бутюн эвимде ишанчлыдыр. 8 cМен онен юзьме-юзь лакъырды этем, кинаенен дегиль, ачыкъ сёзлернен онен лаф этем. О, РАББИнинъ сыфатыны коре. Насыл олды да, сизлер къулум Мусаны сёгмектен къоркъмадынъыз? 9РАББИ оларгъа пек ачувлангъаны ичюн, андан кетти. 10 dБулут да Чадырдан узакълашты. Апансыздан Мерьем тери хасталыгъына огърады, къар киби бем-беяз олды. Харун Мерьемге бакъты ве онынъ тери хасталыгъына огърагъаныны корьди. 11Харун Мусагъа: – Эфендим, ялварам! Ахмакъча озюмизни туттыкъ, гуна къазандыкъ! – деди. – Амма бизни гунамыз ичюн джезалама. 12Мерьем олю киби олмасын, анасынынъ къурсагъындан чыкъкъан, тенининъ ярысы гъайып олгъан балагъа ошамасын. 13Муса къычырып, РАББИден ярдым сорады: – Эй, Алла! Ялварам, тедавийле оны! 14 eРАББИ Мусагъа: – Эгер бабасы онынъ бетине тюкюрген олса, о, еди кунь девамында масхаралыкъта олмаз эдими? Еди кунь девамында оны ордудан тышарыда къапатынъыз, сонъ арткъа къайтсын, – деди. 15Бойлеликнен, Мерьем еди кунь девамында ордудан тышарыда къапатылды. Мерьем ордугъа къайтмагъандже, халкъ ёлгъа чыкъмады.
Copyright information for
CrhCTB