Num 19 | CrhCTB | STEP | РАББИ Мусагъа ве Харунгъа бойле деди:

‏ Numbers 19

Къунанджын акъкъында низамнаме

1 РАББИ Мусагъа ве Харунгъа бойле деди:

2 ^a– РАББИ буюргъан къануннынъ низамнамеси будыр:

Исраиль огъулларына айтынъ, олар сизге къусурсыз, минсиз, боюндырыкъ такъмагъан къырмызы бир къунанджын кетирсинлер. 3 Оны руханий Элазаргъа беринъиз. О, оны ордудан тыш чыкъарсын. Сонъ оны Элазарнынъ огюнде сойсунлар. 4 ^bРуханий Элазар озь пармагъынен къунанджыннынъ къанындан алып, еди кере Корюшюв Чадырынынъ огюне септирсин. 5 ^cСонъ Элазарнынъ козю огюнде къунанджынны озь терисинен, этинен, къанынен ве кубресинен берабер якъсынлар. 6 ^dРуханий бираз кедр терегинден, эзов отундан ве ачыкъ къырмызы юнь йипини алсын ве янгъан къунанджыннынъ устюне атсын. 7 ^eСонъ руханий озь урбаларыны ювсун, озь беденини де сувнен ювсун ве ордугъа къайтсын. Акъшамгъа къадар руханий арам оладжакъ. 8 Къунанджынны якъкъан адам урбаларыны сувнен ювсун, озь беденини де сувнен ювсун. О акъшамгъа къадар арам оладжакъ.

9 ^fЭлял сайылгъан бир кимсе къунанджыннынъ кулюни топласын ве ордудан тыш темиз сайылгъан бир ерге къойсун. Бу куль Исраиль джемааты ичюн, темизлев суву ичюн, сакълансын. Бу, гуналар ичюн къурбандыр. 10 ^gКъунанджыннынъ кулюни топлагъан адам озь урбаларыны ювсун ве акъшамгъадже арам оладжакъ. Бу, Исраиль огъуллары ве араларында яшагъан кельмешеклер ичюн эбедий низамнаме олсун.

Адам олюсине токъунув акъкъында

11 Насылдыр адамнынъ олюсине токъунгъан эр адам еди кунь арам оладжакъ. 12 ^hУчюнджи ве единджи куньлеринде о озюни темизлев сувунен элялласын ве о вакъыт элял оладжакъ. Эгер учюнджи ве единджи куньлери о озюни элялламаса, о элял олмайджакъ. 13 ⁱНасылдыр адамнынъ олюсине токъунгъан ве озюни элялламагъан адам РАББИнинъ Мескенини арамлар. О адам Исраильден ёкъ этильсин, чюнки о, темизлев сувунен септирильмеген ве арам къалгъан, онынъ арамлыгъы устюнде къалды.

14 Мына чадырда ольген адам акъкъында къанун: чадыргъа кирген эр бир адам ве чадырда олгъан бутюн шей еди кунь арам оладжакъ. 15 ^jКъапакънен къапалмагъан, агъзы ачыкъ эр бир савут арам оладжакъ.

16 Тарлада къылычнен ольдюрильген я да озь олюминен ольген бирине, адам кемигине я да къабирге эр токъунгъан адам еди кунь арам оладжакъ.

17 Арам олгъан адам ичюн бир савутнынъ ичине якъылгъан гуна къурбанынынъ кулюни къойсунлар ве устюне чокъракъ сувуны тёксюнлер. 18 ^kЭлял олгъан адам эзов отуны алсын, оны сувгъа батырсын, сонъ чадыргъа, ичиндеки эписи савутларгъа ве эписи адамларгъа септирсин. Кемикке, ольдюрильген адамгъа, я да озь олюминен ольген адамгъа, я да къабирге токъунгъан адамнынъ устюне сувны септирсин. 19 ^lУчюнджи ве единджи куньлери элял олгъан адам арам олгъан адамгъа сув септирсин. Единджи куню о, оны элялласын. Сонъ озь урбаларыны ювсун, озь беденини де сувнен ювсун. Акъшам о, элял оладжакъ. 20 ^mАрам олгъан адам озюни элялламаса, шу адам халкънынъ арасындан ёкъ этильсин, чюнки о, РАББИнинъ Мукъаддес Ерини арамлады. Темизлев сувуны устюне септирмегени ичюн, о, арамдыр. 21 Олар ичюн бу, эбедий низамнаме олсун. Темизлев сувуны септирген адам озь урбаларыны ювсун. Темизлев сувуна токъунгъан адам акъшамгъа къадар арам оладжакъ. 22 ⁿАрам олгъан адам токъунгъан эр шей арам оладжакъ. Токъунгъан адам акъшамгъа къадар арам оладжакъ.