‏ Numbers 2

Орду ичинде къабилелернинъ ерлешюви

1РАББИ Мусагъа ве Харунгъа бойле деди:

2– Исраиль огъуллары айры-айры озь ордуларыны озь байрагъы тюбюнде ве озь къоранталарынынъ бельгилеринен къойсунлар, озь ордуларыны Корюшюв Чадырынынъ этрафында ерлештирсинлер.

3 ^aКунь догъгъан тарафта, шаркъта озь байрагъы тюбюнде Ехуда ордусы озь болюклеринен ерлешсин. Амминадавнынъ огълу Нахшон ехудалыларнынъ башлыгъы олсун. 4Онынъ аскерлери – 74 600 сайылгъан акъай. 5Ондан сонъ Йиссакъар къабилеси озь ордусыны ерлештирсин. Цуарнынъ огълу Нетанэл йиссакъарлыларнынъ башлыгъы олсун. 6Онынъ аскерлери – 54 400 сайылгъан акъай. 7Сонъ Зевулун къабилеси озь ордусыны ерлештирсин. Хелоннынъ огълу Элиав зевулунлыларнынъ башлыгъы олсун. 8Онынъ аскерлери – 57 400 сайылгъан акъай. 9 ^bЕхуда ордусынен сайылгъан аскерлер, болюклерине коре, эписи олып, 186 400 адам. Олар ёлгъа биринджи чыкъаджакълар.

10Дженюпке тараф озь байрагъы тюбюнде Рубен ордусы озь болюклеринен ерлешсин. Шедеурнынъ огълу Элицур рубенлилернинъ башлыгъы олсун. 11Онынъ аскерлери – 46 500 сайылгъан акъай. 12Онынъ янына Шимеон къабилеси озь ордусыны ерлештирсин. Цуришаддайнынъ огълу Шелумиэл шимеонлыларнынъ башлыгъы олсун. 13Онынъ аскерлери – 59 300 сайылгъан акъай. 14Сонъ Гъаднынъ къабилеси озь ордусыны ерлештирсин. Деуэлнинъ огълу Эльясаф гъадлыларнынъ башлыгъы олсун. 15Онынъ аскерлери – 45 650 сайылгъан акъай. 16 ^cРубен ордусынен сайылгъан аскерлер, болюклерине коре, эписи олып, 151 450 адам. Олар ёлгъа экинджи чыкъаджакълар.

17 ^dКорюшюв Чадыры ёлгъа чыкъкъанда, левийлилернинъ ордусы башкъа ордуларнынъ ортасында олсун. Эр орду, тургъаны киби, озь байрагъы тюбюнде ёлгъа чыкъсын.

18Гъарпкъа тараф озь байрагъы тюбюнде Эфраим ордусы озь болюклеринен ерлешсин. Аммихуднынъ огълу Элишама эфраимлилернинъ башлыгъы олсун. 19Онынъ аскерлери – 40 500 сайылгъан акъай. 20Онынъ янына Менашшенинъ къабилеси озь ордусыны ерлештирсин. Педацурнынъ огълу Гъамалиэл менашшелилернинъ башлыгъы олсун. 21Онынъ аскерлери – 32 200 сайылгъан акъай. 22Сонъ Биньяминнинъ къабилеси озь ордусыны ерлештирсин. Гидонийнинъ огълу Авидан биньяминлилернинъ башлыгъы олсун. 23Онынъ аскерлери – 35 400 сайылгъан акъай. 24 ^eЭфраим ордусынен сайылгъан аскерлер, болюклерине коре, эписи олып, 108 100 адам. Олар ёлгъа учюнджи чыкъсынлар.

25Шимальге тараф озь байрагъы тюбюнде Дан ордусы озь болюклеринен ерлешсин. Аммишаддайнынъ огълу Ахиэзер данлыларнынъ башлыгъы олсун. 26Онынъ аскерлери – 62 700 сайылгъан акъай. 27Онынъ янына Ашернинъ къабилеси озь ордусыны ерлештирсин. Окъраннынъ огълу Пагиэл ашерлилернинъ башлыгъы олсун. 28Онынъ аскерлери – 41 500 сайылгъан акъай. 29Сонъ Нафталийнинъ къабилеси озь ордусыны ерлештирсин. Энаннынъ огълу Ахира нафталийлилернинъ башлыгъы олсун. 30Онынъ аскерлери – 53 400 сайылгъан акъай. 31 ^fДан ордусынен сайылгъан аскерлер, болюклерине коре, эписи олып, 157 600 адам. Олар озь байракълары тюбюнде ёлгъа сонъки чыкъсынлар.

32 ^gКъоранталарына коре сайылгъан Исраиль огъуллары булардыр. Ордуларда сайылгъан аскерлер, болюклерине коре, эписи олып, 603 550 адам. 33 ^hЛевийлилерни исе, РАББИ Мусагъа буюргъаны киби, башкъа исраиллилернен берабер саймадылар.

34Исраиллилер РАББИ Мусагъа эр буюргъан шейни беджердилер. Олар озь байракълары тюбюнде ордуларыны ерлештире эдилер ве эр кес, озь сойларынен ве къоранталарынен бирликте ёлгъа чыкъа эдилер.