Num 21 | CrhCTB | STEP | Исраиль Атарим ёлунен барды. Негев еринде яшагъан, ханаанлы олгъан Арад падишасы шуны эшиткенде, оларнен дженклешти ве базыларыны эсирге алды.

‏ Numbers 21

Ханаанлыларнынъ енъильмеси

1 ^aИсраиль Атарим ёлунен барды. Негев еринде яшагъан, ханаанлы олгъан Арад падишасы шуны эшиткенде, оларнен дженклешти ве базыларыны эсирге алды. 2 ^bИсраиль РАББИге шу адакъны берди: «Эгер Сен бу халкъны бизим къолумызгъа берсенъ, оларнынъ эписи шеэрлерини Санъа багъышлап, бутюнлей ёкъ этеджекмиз». 3 РАББИ Исраильнинъ сесини эшитти ве ханаанлыларны къолуна берди. Исраиллилер оларны да, шеэрлерини де бутюнлей ёкъ эттилер. Бу ернинъ адыны Хорма ^{▼▼Хорма – къ. еуд. бу аднынъ айтылувы «харам» (бутюнлей ёкъ этмек) фиилине бенъзей.} деп къойдылар.

Бакъыр йылан

4 ^dСонъ исраиллилер Хор дагълыгъындан ёлгъа чыкътылар. Эдом топрагъынынъ четинден кечмек ичюн, олар Къызыл денъиз ёлунен бардылар. Лякин ёлда халкъ сабырсызланды. 5 ^eХалкъ Аллагъа ве Мусагъа къаршы айтып башладылар:

– Бизни Мысырдан не ичюн чыкъардынъыз? Бизге сахрада ольмек ичюнми? Мында не отьмек бар, не сув. Бу бир шейге кечмеген аштан да джанымыз безди.

6 О вакъыт РАББИ халкъкъа къаршы зеэрли йыланларны ёллады. Олар халкъны тишлемеге башладылар, ве Исраиль огъулларындан пек чокъу ольди. 7 Халкъ Мусагъа келип:

– Бизлер РАББИге ве санъа къаршы айткъанымыз ичюн гуна къазандыкъ. РАББИге дува эт, О бизден йыланларны алсын, – деди.

Муса халкъ ичюн дува этти.

8 Сонъ РАББИ Мусагъа:

– Озюнъе йылан яп ве оны бир байракъ дирегине къой. Тишленген эр кес онъа бакъып, сагъ къалыр, – деди.

9 ^fМуса бакъыр йыланны япты ве байракъ дирегининъ устюне къойды. Эгер йылан адамны тишлеген олса, о адам йылангъа бакъып, сагъ къала эди.

Сахра бою долашув

10 ^gИсраиль огъуллары ёлгъа чыкъып, ордуларыны Овотта ерлештирдилер. 11 ^hОвоттан ёлгъа чыкъып, ордуларыны Ийе-Аваримде, Моавнынъ къаршысындаки сахрада, кунь догъгъан тарафта ерлештирдилер. 12 ⁱАндан чыкъып, ордуларыны Зеред вадийинде ерлештирдилер. 13 ^jАндан чыкъып, ордуларыны Арноннынъ башкъа тарафында сахрада ерлештирдилер. Анда шу озен аморлыларнынъ топрагъындан тыш акъа. Арнон озени – Моавнынъ кенарыдыр, озен Моав ве аморлылар арасында акъа. 14 Онынъ ичюн РАББИнинъ дженклери китабында бойле язылгъандыр:

15 ^k«Шевет-Ар шеэрине баргъан ве Моав сынъырына узангъан вадийлер башлары ^{▼▼Базы эльязмаларда бу аетнинъ башында даа бойле сёзлер бар: «Суфадаки Вахев шеэри, Арнондаки вадийлер».}».

16 Мындан Беэр къуюсына ёл алдылар. Бу къуюнынъ янында РАББИ Мусагъа: «Халкъны бир ерге топла, оларгъа сув береджегим», – деди.

17 О вакъыт Исраиль шу тюркюни йырлады: «Эй, къую, толып-таш!
Онъа йыр йырланъыз!
18 Башлыкълар бу къуюны къазды,
халкънынъ мырзалары
оны озь акимиет таякъларынен къаздылар».

Сахрадан олар Маттанагъа, 19 Маттанадан – Нахалиэлге, Нахалиэлден – Бамоткъа, 20 Бамоттан – вадийге бардылар. Шу вадий Моав топрагъында, сахранынъ къаршысында олгъан Фисга дагъынынъ тёпесинде ерлешкендир.

Сихоннынъ ве Огнынъ енъильмеси

21 Исраиль аморлыларнынъ падишасына Сихонгъа эльчилернен бу хаберни ёллады:

22 ^m– Топрагъынъдан кечмеге разылыкъ бер. Тарлаларгъа ве юзюмликлерге кирмейджекмиз, ич бир къуюдан сув ичмейджекмиз. Сенинъ топрагъынъдан кечмегендже, Падиша ёлундан кетеджекмиз.

23 Лякин Сихон исраиллилерге озь топрагъындан кечмеге разылыкъ бермеди. О, бутюн халкъыны топлады ве Исраильге къаршы сахрагъа кетти. Яхацкъа кельген сонъ, о, исраиллилернен дженк этти. 24 ⁿИсраиллилер оны къылычларынен урып енъдилер ве Арнон озенинден Яббокъ озенине къадар, аммонлыларнынъ топрагъына къадар узангъан топракъларыны басып алдылар. Аммонлыларнынъ сынъырлары къавий эди. 25 Исраиллилер эписи андаки шеэрлерни запт этти. Сонъ олар аморлыларнынъ эписи шеэрлеринде, Хешбон шеэринде ве этрафындаки койлерде яшамагъа башлады. 26 Хешбон аморлы Сихон падишанынъ шеэри эди. Сихон эвельки Моав падишасына къаршы дженк эткен ве элинден Арнонгъа къадар узангъан топракъларыны алгъан эди. 27 Бунынъ ичюн кедайлар бойле айталар: «Хешбонгъа келинъиз, Сихоннынъ шеэри янъыдан къурулсын ве пекитильсин.
28 ^oХешбондан атеш, Сихоннынъ шеэринден алев чыкъты
ве Моавнынъ Ар шеэрини, Арнон тёпеликлерининъ саиплерини якъып ёкъ этти.
29 ^pВай санъа, эй, Моав! Кемошнынъ ^{▼▼Кемош – моавлылар табынгъан алланынъ ады.} халкъы, сен ёкъ олдынъ!
Огъуллары тараф-тараф къачтылар,
къызлары аморлыларнынъ падишасы Сихоннынъ эсирлери олды.
30 ^rБиз исе оларны окънен урдыкъ, Хешбон Дивонгъа къадар ёкъ олды.
Медевагъа узангъан Нофахгъадже оларны дарма-дагъын этип бошаттыкъ».

31 Бойледже, Исраиль аморлыларнынъ топрагъында яшап башлады.

32 ^sМуса Язерни бакъып чыкъмакъ ичюн адамларны ёллады. Исраиллилер Язернинъ этрафындаки койлерни запт эттилер ве анда яшагъан аморлыларны къувдылар. 33 ^tСонъ айланып, Башан ёлунен кеттилер. Башан падишасы Ог бутюн халкъынен берабер оларгъа къаршы Эдрейде дженк этмек ичюн чыкъты.

34 ^uРАББИ Мусагъа:

– Ондан къоркъма! Оны да, бутюн халкъыны да, бутюн топрагъыны да сенинъ къолунъа энди бердим. Хешбонда яшагъан аморлыларнынъ падишасы Сихонгъа япкъанларынъны онъа да япаджакъсынъ, – деди.

35 Бойледже, исраиллилер Огны, онынъ огъулларыны ве бутюн халкъыны ёкъ этти, кимсени сагъ къалдырмады, топрагъыны да басып алдылар.