a Сай 33.49; Ехо 2.1; 3.1
bЧыкъ 34.15
cСай 31.16; Ехо 22.17; Збр 105.28-29; Хош 9.10
dТекр 4.3; 21.22
eЧыкъ 6.25
fСай 16.48; 2 Пад 24.25; Збр 105.30
gЕш 54.10; Ехез 34.25; 37.26; Хош 2.18
h1 Тар 6.4-15
iСай 31.8
j Сай 31.2, 7

‏ Numbers 25

Шиттимде олгъан Исраильнинъ путперестлиги

1 aИсраиллилер Шиттимде яшагъанда, халкъ моавлы къызларнен ороспуланмагъа башладылар. 2 bБу къызлар исраиллилерни озь аллаларына къурбан чалмагъа чагъырдылар. Исраиль халкъы къурбан этини ашай ве оларнынъ аллаларына табына башладылар. 3 cИсраиль Баал-Пеоргъа табынып башладылар. Бунынъ ичюн РАББИ Исраильге пек гъазапланды. 4 dРАББИ Мусагъа:

– Халкънынъ эписи башлыкъларыны ал да, куньдюз оларны Меним огюмде ас. О вакъыт Исраильге къаршы олгъан РАББИнинъ гъазабы ятышыр, – деди.

5Муса Исраиль къадыларына:

– Эр биринъиз озь адамларынъыз арасында Баал-Пеоргъа табынгъанларны ольдюринъиз, – деди.

6О арада Исраиль огъулларындан бир адам кельди ве агъа-къардашларына Мусанынъ ве Исраильнинъ бутюн джемаатынынъ козю огюнде мидьянлы бир къызны кетирди. Олар исе о вакъыт Корюшюв Чадырынынъ киришинде агъламакъта эдилер. 7 eРуханий Харуннынъ торуны, Элазарнынъ огълу Пинехас буны корьгенде, турды да, джемааттан айырылды ве къолуна бир мызракъ алды. 8 fИсраиллининъ артындан чадыргъа кирди ве мызрагъыны экисине бирден саплады. Мызракъ эм исраиллини, эм де къызнынъ къарыныны тешип чыкъты. Сонъ Исраиль огъулларынынъ ёкъ этилюви токътады. 9Ёкъ этилювден ольгенлернинъ сайысы 24 000 адам эди.

10РАББИ Мусагъа:

11– Руханий Харуннынъ торуны, Элазарнынъ огълу Пинехас Меним гъазабымны Исраиль огъулларындан къайтарды, оларнынъ арасында о, Меним ичюн гъайрет косьтерди. Шунынъ ичюн Мен куньджюлигимде Исраиль огъулларыны ёкъ этмедим. 12 gШу себептен онъа айт ки, Мен онъа аманлыкъ васиетимни береджегим. 13 hШу васиет онъа ве онынъ эвлятларына эбедий руханийлик васиети оладжакъ. О, Алласы ичюн гъайретни косьтерди ве Исраиль огъуллары ичюн одеме этти, – деди.

14Мидьянлы къызнен берабер ольдюрильген исраиллининъ ады Зимрий эди. О, Салунынъ огълу, шимеонлыларнынъ къоранта башлыгъы эди. 15 iОльдюрильген мидьянлы къызнынъ ады исе – Козбий. О, Цурнынъ къызы, Цур исе халкъларнынъ башы, мидьянлы сой башлыгъы эди.

16РАББИ Мусагъа:

17 j– Мидьянлыларгъа уджюм этинъиз ве оларны ёкъ этинъиз. 18Олар озь айнеджиликлеринен сизге къаршы душманджа арекет эттилер, Пеорнен ве озь къызкъардашынен, мидьянлы башлыкънынъ къызы Козбийнен сизлерни алдаттылар. Лякин Пеор ичюн ёкъ этилюв кунюнде бу къыз ольдюрильди, – деди.
Copyright information for CrhCTB