‏ Numbers 34

Ваде этильген топракънынъ сынъырлары

1РАББИ Мусагъа бойле деди:

2– Исраиль огъулларына эмир эт, оларгъа бойле айт:

Ханаан топрагъына киргенинъизде, сизге мульк оларакъ тюшеджек топракъ, кенарларынен берабер Ханаан топрагъы бойле оладжакъ:

3 ^aДженюбий янынъыз Цин сахрасындан Эдом кенары боюнджа узанаджакъ. Шаркъта дженюбий сынъырынъыз Олю денъизнинъ уджундан башлайджакъ. 4Сынъыр дженюбий тарафкъа, Акъреплер тёпелигине ёл алып, Цин сахрасындан кечеджек ве сонъ Къадеш-Барнеагъа, дженюбий тарафына узанаджакъ, Хацар-Аддаргъа барып, Ацмондан кечеджек, 5Ацмондан сынъыр Мысыр вадийине буруладжакъ ве Акъ денъизге бараджакъ.

6Гъарбий сынъырынъыз Акъ денъиз оладжакъ. Будыр гъарпта оладжакъ сынъырынъыз.

7 ^bШималий сынъырынъыз бойле оладжакъ: сынъырны Акъ денъизден Хор дагълыгъына къадар сызыкъ чекип къайд этинъиз, 8 ^cсонъ оны Хор дагълыгъындан Лево-Хаматкъа къадар чызынъыз, сынъырнынъ уджлары Цедадгъа къадар оладжакъ. 9Сонъ сынъыр Цифронгъа узанаджакъ, ве сынъырнынъ уджлары Хацар-Энанда битеджек. Будыр шимальде оладжакъ сынъырынъыз.

10Шаркъий сынъырынъызны Хацар-Энандан Шефамгъадже узатынъыз. 11 ^dШефамдан сынъыр Айиннинъ шаркъ тарафында Ривлагъадже ашагъы тараф тюшер. Сонъ сынъыр ашагъы кетип, Киннерет денъизининъ шаркъ тарафындаки джапкъа къадар узанаджакъ. 12 ^eСонъ Иордангъа тараф ашагъы кетеджек, ве сынъырнынъ уджлары Олю денъизде токътайджакъ.

Будыр топрагъынъызнынъ эр тарафтан олгъан сынъырлары.

13Муса Исраиль огъулларына бойле буюрды:

– Мульк оларакъ джерепке коре пайлаштыраджакъ топрагъынъыз будыр. РАББИнинъ буюргъанына коре, топракъ докъуз къабилеге ве яры къабилеге пайлаштырылсын, 14чюнки Рубен огъулларынынъ къабилеси сойларынен берабер, Гъад огъулларынынъ къабилеси сойларынен берабер ве Менашше къабилесининъ ярысы озь пайларыны энди алдылар. 15Бу эки къабиле ве ярым къабиле озь топракъ пайларыны Ерихоннынъ къаршысында, Иорданнынъ шаркъ тарафында алдылар.

Пай этмек ичюн джевапкяр адамларнынъ тайинленюви

16РАББИ Мусагъа бойле деди:

17 ^f– Топракъны аранъызда пайлаштыраджакъ акъайларнынъ адлары будыр: руханий Элазар ве Нуннынъ огълу Ехошуа. 18Бундан гъайры, топракъны пайлаштырмакъ ичюн эр къабиледен бирер башлыкъ алынъыз. 19 ^gБу акъайларнынъ адлары будыр: Ехуда къабилесинден – Ефунненинъ огълу Къалев, 20Шимеон огъулларынынъ къабилесинден – Аммихуднынъ огълу Шемуэл, 21Биньямин къабилесинден – Кислоннынъ огълу Элидад, 22Дан огъулларынынъ къабилесинден – Ёглийнинъ огълу башлыкъ Буккий, 23Юсуфнынъ огъулларындан, Менашше огъулларынынъ къабилесинден – Эфоднынъ огълу башлыкъ Ханниэл, 24Эфраим огъулларынынъ къабилесинден – Шифтаннынъ огълу башлыкъ Кемуэл, 25Зевулун огъулларынынъ къабилесинден – Парнакънынъ огълу башлыкъ Элицафан, 26Йиссакъар огъулларынынъ къабилесинден – Аззаннынъ огълу башлыкъ Палтиэл, 27Ашер огъулларынынъ къабилесинден – Шеломийнинъ огълу башлыкъ Ахихуд, 28Нафталий огъулларынынъ къабилесинден – Аммихуднынъ огълу Педахел.

29Ханаан топрагъында Исраиль огъулларына топракъны пайлаштырмагъа РАББИ бу адамларгъа буюрды.