Obd | CrhCTB | STEP |

‏

Бу къыскъа пейгъамберлик, бесе-белли, Ерусалимнинъ Вавилон ордусы тарафындан йыкътырылмасындан сонъ м.э. 586-нджы сенеси язылгъандыр. Пейгъамберлик Эдомгъа мураджаат эте. Эдомлылар исраиллилер ичюн тувгъан халкъ эди, олар исраиллилернинъ эдждаты Якъупнынъ агъасы Исавдан келип чыкътылар. Эки халкъ къомшу яшай эдилер. Лякин Ерусалимнинъ йыкътырылувы вакътында, къан къардашларына ярдым этмек я да аджымакъ ерине, эдомлылар ох чала ве шеэрнинъ дарма-дагъын этилювине къувана эдилер. Алла Эдом халкъыны Онынъ сечип алгъан халкъына къаршы япкъан гуналары ичюн джезалайджагъы акъкъында Овадья пейгъамберлик эте.

Керчектен де, бир къач асырдан сонъра, исраиллилер озь топрагъына къайтып кельдилер, эдомлылардан исе Инджиль заманында энди тек бир виляетнинъ ады сакъланып къалды. Эдом халкъынынъ озю исе къомшу халкъларнынъ арасында, шу джумледен, еудийлер арасында да къарышып кетти. Эдом устюнден суд. Сионнынъ къуртулышы (1 б.).

‏ Obadiah

Эдомнынъ ёкъ этилюви акъкъында Раббининъ айткъанлары

1 ^aОвадьянынъ руясы.

РАББИ-ТААЛЯнынъ Эдом акъкъында айткъанлары будыр.

– Биз РАББИден бир хабер алдыкъ, халкъларгъа хаберджи ёллангъан:
«Турунъыз, Эдомгъа къаршы дженкке чыкъайыкъ!»

2 Мына, Мен сени халкълар арасында кучьсюз япаджагъым,
ве санъа хор бакъаджакълар.
3 Юрегинъдеки къопайлыкъ сени алдатты.
Юксек ерде, къая чатлакъларында яшайсынъ, ичинъден:
– Мени ерге ким тюшюрип олур? – дейсинъ.

4 ^b– Лякин сен, къартал киби, юксек котерильсенъ де,
юванъны йылдызлар арасында къурсанъ да,
андан да сени ашагъы тюшюририм, – дей РАББИ.
5 – Сен бус-бутюн ёкъ этиледжексинъ!
Хырсызлар келип, гедже сени чайпагъан олсалар,
тек кереклерини алыр эди.
Юзюм джыйгъан адамлар санъа кельген олсалар,
бир къач салкъым къалдырыр эди.
6 Амма Исавнынъ ^{▼▼Исав – Эдомнынъ башкъа ады.} эр шейи хырсызланыр,
гизли хазинелери акътарылыр!
7 Сеннен бирлик япкъанларнынъ эписи сени топрагъынъдан къуваджакълар.
Сеннен дост олып яшагъанлар сени алдатаджакъ ве енъеджеклер.
Сенинъ отьмегинъни ашагъанлар сени ураджакъ.
Бунынъ не себептен олгъаныны бир кимсе анъламаз.

8 – О куню Мен Эдомнынъ икметли адамларыны,
Исавнынъ дагъларындаки акъыллы адамларны ёкъ этеджегим, – дей РАББИ.
9 ^d– Эй, Теман ^{▼▼Теман – Эдом мемлекетининъ баш шеэрлеринден ве районларындан бири.} ери, сенинъ джесюр аскерлеринъ пек къоркъаджакълар,
Исавнынъ дагъларында булунгъанларнынъ эписи ольдюриледжек.

Исав джезасынынъ себеплери

10 Сен Якъуп къардашынъа яманлыкъ яптынъ.
Шунынъ ичюн масхара оладжакъсынъ,
эбедиен къырылып битеджексинъ.
11 ^fО куню ябанджылар Якъупнынъ ордусыны эсирликке алып кетти,
кельмешеклер шеэр къапуларындан ичери кирди
ве Ерусалим акъкъында джереп чекти.
Сен исе о куню якъын турып, ярдым этмединъ,
оларнынъ бири киби олдынъ.
12 ^gКъардашынъ белягъа огърагъан куню
онъа къара къуванчнен бакъмагъайдынъ;
Ехуда огъуллары ёкъ этильген куню кульмегейдинъ;
онынъ агъыр кунюнде агъыз кермегейдинъ.
13 ^hО, белягъа огърагъан куню
халкъымнынъ шеэрине къапуларындан кирмегейдинъ;
беля куню онынъ яманлыкъкъа огърагъанына бакъмагъа санъа керекмей эди;
беля куню онынъ барлыгъына токъунмагъайдынъ.
14 Ёл чатышмаларында турмагъа
ве къачмагъа тырышкъанларны ольдюрмеге санъа керекмей эди,
онынъ агъыр кунюнде сагъ къалгъанларны душманнынъ къолуна бермегейдинъ.

Эписи халкъларнынъ суд этилюви

15 ⁱБутюн халкълар ичюн РАББИнинъ куню якъынлашты.
Не япкъан олсанъ, санъа да айнысы япыладжакъ.
Япкъанларынъ сенинъ башынъа тюшеджек.
16 ^jАзиз дагъымда ачувыма толу къадени насыл ичкен олсанъыз,
бутюн халкълар да оны ичип-ичип, ичип битиреджеклер
ве санки де асыл олмагъан киби оладжакълар.

Сионнынъ къуртулышы ве Раббининъ Падишалыгъы

17 ^kСион дагъында исе къуртулгъанлар топланаджакъ ^{▼▼Я да «Сион дагъында исе къуртулыш оладжакъ».}.
Шу дагъ азизлик оладжакъ,
ве Якъупнынъ эвлятлары озь пайларынынъ сабысы оладжакъ.
18 ^mЯкъупнынъ эви атеш киби оладжакъ,
ве Юсуфнынъ эви – алев.
Исавнынъ эви исе тобангъа ошайджакъ.
Якъуп ве Юсуф Исавны якъып ёкъ этеджеклер.
Исав эвинден ич бир адам къалмайджакъ.
Бу – РАББИнинъ сёзлери.

19 Негевде яшагъан халкъ Исавнынъ дагъларыны тартып аладжакъ,
Шефелада яшагъанлар Фелестин топрагъыны запт этеджек.
Олар Эфраим ве Самарие топракъларыны басып аладжакълар.
Биньямин Гиладнынъ сабысы оладжакъ.
20 ⁿСюргюн этильген Исраиль огъулларынынъ ордусы къайтаджакъ
ве Ханаан топрагъыны Царефаткъа къадар тартып аладжакъ.
Ерусалимден сюргюн этильген ве Сефарадда ерлешкенлер Негев шеэрлерининъ сабылары оладжакъ.
21 ^oЕнъгенлер ^{▼▼Я да «къуртарылгъанлар».} Сион дагъына чыкъаджакъ
ве Исавнынъ дагъында яшагъанларны суд этеджек.
Сонъра РАББИ падишалыкъ япаджакъ.