‏

Бу мектюпни Павел аписханеде олгъан вакъытта язды. Римде булунгъанда, Павел Онисим адлы бир къачакъ къулнен таныш олды. Павелден Къуванчлы Хаберни эшитип, Онисим Месихке иман этти. Павел Онисимге, агъыр джеза телюкесине бакъмайып, саиби Филимонгъа кери къайтмагъа керек олгъанына къарар чыкъара. Павел, месихчилер ичюн агъа-къардаш севгиси Римнинъ къуллукъ къанунларындан муим олгъаныны косьтере. Къул ичюн риджа (1 б.).

‏ Philemon

Селямлашув

1 ^aПавел (Иса Месихнинъ мабюси) ве дин къардаш Тимотей –

севимли ишдешимиз Филимонгъа, 2 ^bэм де къызкъардашымыз Апфиягъа, бизнен берабер курешкен аркъадашымыз Архиппке ве эвинъдеки иманлылар джемиетине:

3Алла Бабамыз ве Рабби Иса Месих сизге эйилик ве тынчлыкъ-аманлыкъ берсин!

Филимоннынъ севгиси ве садыкълыгъы

4 ^cСен ичюн дува эткенимде, эр вакъыт Аллама шукюр этем, 5чюнки Рабби Исагъа олгъан иманынъ ве эписи азизлерге олгъан севгинъ акъкъында эшитип турам. 6 ^dБизим сеннен берабер бир олгъан иманымыз Месих бизге берген эр бир эйиликни санъа анъламагъа ярдым этсин.

7Сенинъ севгинъ манъа буюк къуванч берди ве гонълюмни алды, чюнки сен, къардашым, азизлерни юреклендирдинъ.

Онисим ичюн риджа

8 ^eШунынъ ичюн, керек шейни япмагъа мен санъа Месихнинъ Адынен ачыкъ-айдын эмир этип олур эдим, 9лякин севгинен ялварам. Мен, Иса Месихнинъ эльчиси Павел, энди Онынъ мабюси, 10 ^fсанъа огълум Онисим ▼

▼«Онисим» ады «файдалы» манасыны ташый.

ичюн ялварам. Зынджырларда олгъанымда, мен онынъ бабасы киби олдым. 11Бир вакъытта о, санъа файдасыз эди, энди исе санъа да, манъа да файдалыдыр. Оны санъа къайтарып ёллайым. 12Мен оны пек севем. 13Онисим манъа сенинъ еринъе хызмет этсин деп, мен Къуванчлы Хабер ичюн зынджырларда олгъан вакъытта оны янымда алып къалмагъа истер эдим. 14Амма сенден разылыкъ алмайып, ич бир шей япмагъа истемедим. Сен япаджакъ эйилигинъ меджбурий дегиль, гонъюлли олгъаныны истедим. 15Бельки Онисим шимди сенинъ янынъда эбедиен олсун деп, о сенден вакътынджа айырылгъандыр. 16 ^hЛякин энди о, къул киби дегиль, къулдан юкъары, севимли дин къардаш оларакъ сеннен берабер оладжакъ. О меним севимли дин къардашым, даа зияде о сенинъ де севимли дин къардашынъ, эм адам киби, эм Раббиге инангъан къардаш киби.

17Шунынъ ичюн, эгер сен мени аркъадашынъ сайсанъ, Онисимни мени киби къабул эт. 18Эгер исе о санъа бир шейде яманлыкъ япкъан олса я да санъа борджлу олса, буны меним эсабыма юкле. 19 ⁱМен, Павел, буны озь къолумнен язам: мен тёлерим. Лякин сен де озюнъни манъа борджлу олгъанынъны акълынъа кетирмеге керекмей. 20Эбет, къардашым, Рабби ичюн сенден бир файдаланайым! Месих ичюн юрегимни къувандыр!

21Сен меним сёзлериме къулакъ асаджагъынъа ишанып, яздым. Айткъанларымдан зияде япаджагъынъны да билем. 22Бундан гъайры, манъа мусафир олып къалмакъ ичюн бир ер азырла, чюнки дуваларынъызгъа коре кене санъа кельмеге манъа имкян багъышланаджагъына умют этем.

Селямлар

23 ^jЭпафрас санъа селям эте. (О Иса Месих ичюн меннен берабер тюрьмеде ята.) 24 ^kИшдешлерим Марк, Аристарх, Демас, Лукадан да селям. 25Рабби Иса Месихнинъ эйилиги сизинъ рухунъызнен олсун!