‏ Proverbs 11

1 ^aЯлан теразеден РАББИ нефрет эте,
догъру таштан исе разы къала.

2 ^bКъопайлыкъ артындан – масхаралыкъ келе,
алчакъ гонъюль иле – икмет.

3 ^cДогъру адамларнынъ къусурсызлыгъы оларгъа ёл косьтере,
къара юреклилернинъ айнеджилиги исе башларына ете.

4 ^dГъазап Куню байлыкъ ярдым этмез,
инсафлыкъ исе олюмден къуртарыр.

5 ^eКъусурсыз адамнынъ инсафлыгъы ёлуны тегизлей,
яман адам исе яманлыгъындан йыкъылып тюшер.

6 ^fДогъру адамнынъ инсафлыгъы оны къуртара,
къара юрекли адамларны исе яман истеклери къолгъа ала.

7 ^gЯман адам олер – умюти де кесилир,
фена адамнынъ беклегенлери де гъайып олур.

8 ^hИнсафлы адам белядан къуртула,
онынъ ерине беля яман адамнынъ башына тюше.

9Аллагъа инанмагъан адам озь тилинен башкъа адамны гъайып этер,
инсафлы адамларны исе бильги къуртарыр.

10 ⁱИнсафлы адамнынъ ишлери онъундан кельгенде – шеэр шенълене,
яман адам гъайып олгъанда – адамлар къуванчнен къычыра.

11 ^jДогъру адамларнынъ эйилиги шеэрни къура,
яман адамларнынъ лафлары оны йыкъа.

12Акъылдан эксик адам башкъа адамны ашалай,
анълагъан адам исе сусып тура.

13 ^kОшек ташыгъан адам башкъасынынъ сырларыны ача,
ишанчлы адам исе сырдаш ола.

14 ^lЯхшы насиат эксик олса – халкъ гъайып олур,
чокъ насиат олса исе – къуртулыр.

15Ябанджы адам ичюн кефиль олгъан адам
озюне зарар кетире,
«Келиштик!» демектен къачынгъан адам исе
эсен-аман яшар.

16Яхшы табиатлы апай шурет къазана,
шефкъатсызлар исе байлыкъ алалар.

17Мераметли адам озюнинъ джанына файда кетире,
мераметсиз адам исе – зарар.

18 ^mЯман адамнынъ къазанчы яландыр,
акъикъатны сачкъан адам исе ишанчлы мукяфатны джыя.

19 ⁿАкъикъатен, инсафлыкъ – яшайыштыр,
яманлыкъ этмеге ашыкъкъан адам исе олюмге ашыкъа.

20 ^oКъара юрекли адамлардан РАББИ нефрет эте,
ёллары къусурсыз адамлардан исе разы къала.

21 ^pКерчектен, яман адам джезасыз къалмайджагъына
баш бермек мумкюн,
инсафлы адамларнынъ эвлятлары исе
сагъ къуртурылыр.

22Акъыл-ферасеттен эксик апайнынъ дюльберлиги –
домуз бурнундаки алтын алкъа.

23Инсафлы адамларнынъ истеклери яхшылыкънен бите,
яман адамларнынъ умюти исе – Алланынъ гъазабынен.

24 ^qДжан-юректен берген джумерт адамгъа даа чокъ бериле,
ачкозь адамгъа исе ёкъсуллыкъ келе.

25 ^rДжумерт адам боллукъта яшар,
башкъасына сув ичирген адам сувсуз къалмаз.

26 ^sАшлыгъыны сакълап къойгъан адамны халкъ къаргъай,
ашлыгъыны саткъанны исе – макътай.

27 ^tЯхшылыкъкъа ынтылгъан разылыкъ къыдыра,
яман къыдыргъаннынъ башына исе яманлыкъ тюшер.

28 ^uБайлыгъына ишангъан йыкъылыр,
инсафлы адамлар исе япракъ киби ешерир.

29Къорантасыны йыкъкъан адамнынъ къысмети ель олур,
ве ахмакъ – икметли адамнынъ къулу олур.

30 ^vИнсафлы адамнынъ махсулы – омюр терегидир,
икметли адам адамларнынъ юреклерини къазана.

^wБу дюньяда инсафлы адам биле джезаланса,
яман адам ве гунакяр исе ондан бетер джезаланыр.
31