‏ Proverbs 17

1 ^aТынчлыкъ ичинде бир къаткъан тилим отьмек
къавгъа-дава ичинде буюк тойгъа толу эвден яхшыдыр.

2 ^bАкъыл-ферасетли къул
эфендисининъ масхаралыкъ япкъан огълуна эфендилик этер,
онынъ агъа-къардашларынен берабер мирастан пай алыр.

3 ^cАлтын – оджакъта, кумюш – иритильгенде сыналыр,
юрекни сынагъан исе – РАББИдир.

4Яман адам яман лафкъа къулакъ аса,
яланджы йыкъыджы лафларны динълей.

5 ^dФукъарени ашалагъан онынъ Яратыджысыны акъаретлей,
белянынъ устюнден кульген джезасыз къалмаз.

6 ^eКъарт адамларнынъ таджы – торунларыдыр,
балаларнынъ шурети – ана-бабаларыдыр.

7 ^fБудалагъа гузель лафлар ярашмаз,
ондан бетер мырзагъа – ялан лафлар.

8 ^gКъапар берген адам ичюн онынъ бахшышы –
тылсымлы таш кибидир,
къайда айланмаса – эр ерде о онъар.

9Севги къыдыргъан къабаатны багъышлар,
оны кене хатырлагъан исе достуны узакълаштырыр.

10Анълагъан адамны опькелемек,
акъылсызгъа юз таякъ урмакътан яхшыдыр.

11Арабозар тек яманлыкъ къыдыра,
онъа къаршы мераметсиз мелек ёлланыр.

12 ^hЯврусындан айырылгъан аювны расткетирмек
акъылсызны ахмакълыгъында расткетирмектен яхшыдыр.

13 ⁱЭгер адам яхшылыкъкъа яманлыкъ къайтарса,
онынъ эви белядан къуртулмаз.

14 ^jКъавгъанынъ башланувы сув акъувына ошай.
Беля чыкъмаздан эвель, къавгъаны токътат.

15 ^kЭм яманны акълагъан, эм инсафлыны къабаатлагъан адамдан
РАББИ нефретлене.

16Акъылсызгъа хазинеден не файда?
Икметни акъчагъа сатын алмагъа онынъ акъылы ёкътыр.

17 ^lДост эр вакъыт севе,
беля заманында ярдым этмек ичюн агъа-къардаш догъа.

18Акъылдан эксик адам къол узатып,
башкъа адам ичюн кефиль ола.

19 ^mИсьянны севген къавгъаны север,
къапусыны юксек къургъан адам йыкъылмагъа къыдыра.

20Къара юрек яхшылыкъ тапмаз,
яланджы тиль де белягъа огърар.

21 ⁿАкъылсыз огъланны тапкъан ана кунь корьмез,
будаланынъ бабасы да къуванмаз.

22 ^oЮрек къуванчы – гузель шифа,
тюшкюн рух исе беденни къурутыр.

23 ^pЯман адам гизлиден къапар ала
ве адалетнинъ ёлуны боза.

24Акъыллы адам икметтен козюни алмаз,
акъылсыз исе бакъышыны дюньянынъ эр ерине ташлар.

25 ^qАкъылсыз огълан – бабасынынъ дерди,
оны догъгъан ананынъ да кедери.

26Эм къабаатсыз адамны къабаатламакъ,
эм мырзаны, догърусыны айткъаны ичюн, урмакъ –
яхшы дегильдир.

27 ^rБильгили адам бошуна лаф сатмаз,
анълагъан адам да тынч юреклидир.

^sИндемегенде, ахмакъ биле икметли сайылыр,
агъзыны къапаткъан да анълагъан олып корюнир.
28