‏ Proverbs 18

1Озь истегини къыдыргъан адам башкъаларындан айырыла,
эр бир акъыл-идракълы шейге къаршы чыкъа.

2Акъылсыз адам бир шейни анъламакътан
озюни акъыллы этип косьтермеге бегенир.

3Яманлыкънынъ артындан – нефрет,
айыпнынъ артындан – масхаралыкъ келир.

4 ^aАдамнынъ агъзындан чыкъкъан сёз – терен сув,
икметнинъ чокърагъы – сув акъымы.

5 ^bЯман адамгъа яхшы бакъмакъ да,
инсафлы адамгъа адалетни бермемек де ямандыр!

6 ^cАкъылсызнынъ тили къавгъагъа ёл ача,
дудакълары да котек чагъыра.

7– 8 ^dАкъылсызнынъ агъзы – онынъ олюми,
дудакълары да – джанына къапкъан.

9 ^eОшекчининъ лафы – пек леззетли тилимлер кибидир,
олар адамнынъ ичине тез кирелер.

10Тенбель йыкъыджы адамгъа къардаштыр.

11 ^fРАББИнинъ Ады – къатты къаледир,
инсафлы адам онъа чапа ве онда хавфсызлыкъта тура.

12Байнынъ малы-мулькю – онынъ пекитильген къалеси,
тасавурында юксек дивар киби корюне.

13 ^gЙыкъылмакътан эвель кибирли юрек озюни юксельте,
алчакъгонъюллик артындан исе шурет келе.

14Динълемезден джевап бермек –
акъылсызлыкъ ве масхаралыкътыр!

15 ^hАдамнынъ руху хасталыкъкъа даяныр,
руху сёнюк олса, оны насыл кечирир?

16Анълагъан акъыл-бильги топлай,
икметлининъ къулагъы да бильги къыдыра.

17 ⁱБерильген бахшыш адамгъа ёл ачар
ве буюк инсанларнынъ огюне алып барар.

18Давада биринджи айткъан акълы корюнир,
лякин башкъасы келип оны сынар.

19Атылгъан джереп даваны токътатыр
ве кучьлю адамларнынъ къавгъасыны чезер.

20Ынджытылгъан къардаш пекитильген шеэрден къавийдир,
къавгъа да къаледе къапу мандалы кибидир.

21 ^jАгъзындан чыкъкъан лафынен адам къурсагъыны тойдурыр,
тилинен не къазанса, оны ашар.

22Эм олюм, эм яшайыш тильге бойсуныр,
оны севген махсулындан ашар.

23 ^kАпайны тапкъан яхшылыкъ тапа
ве РАББИнинъ разылыгъыны къазана.

24Ёкъсул ялварып сорай,
бай исе къаба джевап къайтара.

^lДосту чокъ олгъан адам эляк олур,
амма бир достнынъ севгиси
къардашнынъ севгисинден къавий ола.
25