‏ Proverbs 19

1 ^aКъусурсыз яшагъан фукъаре
яланджы акъылсыздан яхшыдыр.

2 ^bАдамгъа бильгисиз олмагъа яхшы дегиль,
ашыкъкъан аякълар ёлдан урулырлар.

3 ^cАдамнынъ ахмакълыгъы онынъ ёлуны къыйыш эте,
юреги де РАББИге къаршы гъазаплана.

4 ^dЗенгинлик чокъ дост къоша,
фукъарени исе бир досту биле ташлай.

5 ^eЯланджы шаат джезасыз къалмаз,
ялан айткъан адам да къуртулып оламаз.

6 ^fЧокъ адам мырзаларнынъ мераметини къыдыра,
эр кес бахшыш берген адамнынъ досту олмагъа тырыша.

7 ^gФукъареден эписи агъа-къардашлары нефрет эте,
достлары да олардан бетер ондан узакълаша.
Оларнен лаф этмеге фукъаре ашыкъа,
лякин оларнынъ эсери биле къалмады.

8 ^hАкъыл къыдыргъан адам джаныны севе,
анъламагъа тырышкъан яхшылыкъ тапа.

9 ⁱЯланджы шаат джезасыз къалмаз,
ялан айткъан да ёкъ олур.

10 ^jАкъылсызгъа гузель яшамагъа яхшы дегиль,
къулгъа башлыкъларгъа укюм этмек ондан да бетер.

11 ^kАкъыл-ферасет адамгъа тез ачувланмагъа ёл бермей,
башкъасынынъ къабаатыны багъышламакъ исе онъа шурет кетире.

12 ^lПадишанынъ гъазабы арсланнынъ окюрюгине ошай,
онынъ разылыгъы исе – отнынъ устюнде чыкъ кибидир.

13 ^mАкъылсыз огълан – бабасынынъ башына беля,
къавгъаджы апай исе токътамайып тамлагъан сув кибидир.

14 ⁿЭв ве байлыкъ – ана-бабадан мирастыр,
акъыл-ферасетли апай исе – РАББИдендир.

15 ^oТенбеллик терен юкъугъа далдыра,
иштен къачкъан адам да ач къала.

16 ^pЭмирлерни туткъан адам джаныны къорчалар,
кеткен ёлуны тюшюнмеген исе ёкъ олур.

17 ^qФукъарени аджыгъан адам РАББИге борджкъа бере,
РАББИ де онынъ яхшылыгъыны къайтарыр.

18 ^rУмют олгъаны къадар огълунъны тербиеле,
амма онынъ олюмини истеме.

19Тез гъазаплангъан адам джезасыны чексин,
оны бир кере къуртарсанъ, кене шуны япмагъа керек олурсынъ.

20Акъыл огреткенлерине къулакъ ас, огютни къабул эт
ве сонъра икметли олурсынъ.

21 ^sАдамнынъ юрегинде чокъ ниет бар,
лякин РАББИнинъ мурады ерине келир.

22Адамнынъ садыкълыгъы пек къыйметлидир,
фукъаре де яланджыдан яхшыдыр.

23 ^tРАББИден къоркъкъан адам омюрни ала,
тойып ашай ве раат юкълай, яманлыкъ онъа кельмей.

24 ^uТенбель ашкъа батыргъан къолуны
агъзына къайтармагъа биле эринир.

25 ^vМыскъылджыны джезаласанъ, саде адамлар зекялы олур,
анълагъан адамны опькелесенъ исе, о, бильгисини арттырыр.

26 ^wБабасына къол котерген
ве анасыны эвден къувгъан огълан –
къоранта ичюн айып ве масхаралыкътыр.

27Огълум! Огютни динълемесенъ,
бильги сёзлеринден узакълашырсынъ.

28 ^xЯрамай шаат адалетни мыскъыллай,
яманларнынъ агъзы исе яланны юта.

^yМыскъылджылар ичюн джеза,
акъылсызларнынъ сырты ичюн котек азырдыр.
29