‏ Proverbs 2

Огют ве насиатлар

1 ^aОгълум, эгер айткъанларымны къабул этип,
эмирлеримни акъылынъда тутсанъ,
2икметке къулакъ асып,
юрегинъни анълайыш тарафкъа чевирсенъ,
3акъылны чагъырып,
анълайышкъа ынтылсанъ,
4 ^bкумюш пара киби, оны къыдырсанъ,
сакълангъан хазине киби, оны тапмагъа тырышсанъ,
5 ^cо заман РАББИ къоркъусыны анълап,
Алла акъкъында бильгини тапарсынъ.
6 ^dРАББИ икметни бере,
бильгинен анълайыш Онынъ агъзындан чыкъалар.
7 ^eДогъру адамлар ичюн – Онда енъиш бар,
къусурсыз яшагъанлар ичюн – къалкъан.
8 ^fО, адалет ёлуны къорчалай,
садыкъ олгъанларнынъ ёлларыны сакълай.

9 ^gО заман сен инсафлыкъ, адалет, догърулыкъ,
эр бир яхшылыкънынъ ёлуны анъларсынъ.
10Юрегинъе икмет киреджек,
джанынъ ичюн бильги гузель оладжакъ.
11Ферасет сени сакълайджакъ,
акъыл сени къорчалайджакъ.

12Олар сени яман ёлдан,
ялан сёзлер айткъан адамдан къуртараджакъ,
13къаранлыкъ ёлдан юрмек ичюн
догъру ёлны ташлагъан адамлардан,
14 ^hяманлыкъ япып къувангъан,
яман куфюрликтен кейф чаткъан адамлардан,
15 ⁱкъыйыш ёлларда юрген,
ёлларыны шашыргъан адамлардан къорчалайджакъ.

16 ^jОлар да сени башкъасынынъ апайындан,
акъайы олгъан, сёзлерини татлы-татлы айткъан къадындан,
17яшлыгъынынъ омюр-къардашыны ташлагъан,
озь Алласынынъ васиетини унуткъан апайдан къуртараджакълар.
18 ^kОнынъ эви – олюм къапкъаныдыр,
юрген ёлу да – олюлернинъ дюньясына алып баргъан ёлдыр.
19Онъа кирген эр ким арткъа къайтмайджакъ,
яшайышкъа алып баргъан ёлгъа иришип оламайджакъ.

20Бунынъ ичюн яхшы адамларнынъ ёлундан юр,
инсафлыларнынъ ёлларыны тут.
21 ^lДогъру адамлар ер юзюнде яшайджакъ,
къусурсызлар онынъ устюнде къаладжакълар.
22 ^mЯрамазлар исе ер юзюнден ред этиледжек,
къара юрекли олгъанлар ондан къырыладжакълар.