‏ Proverbs 21

1 ^aПадишанынъ юреги РАББИнинъ элиндедир,
акъымдаки сув киби, оны истегени киби чевирир.

2 ^bАдам озюнинъ эр алгъан ёлуны догъру саяр,
амма РАББИ адамларнынъ юреклерини сынар.

3 ^cИнсафлы ве адалетли шейлерни япмакъ
РАББИнинъ огюнде къурбандан яхшыдыр.

4 ^dКозьлернинъ кибирлилиги, юрекнинъ магърурлыгъы,
яманларнынъ нуру – гунадыр.

5 ^eИшкир адамнынъ тюшюнгени оны боллукъкъа алып кетирир,
эр бир ашыкъыш исе адамны ёкъсул этер.

6 ^fЯлан тильнен къазанылгъан байлыкъ –
тез гъайып олгъан думан, олюм тузагъыдыр.

7Яман адамларнынъ зорбалыгъы оларны гъайып этер,
чюнки олар адалетни ред эттилер.

8Къабаатлы адамнынъ ёлу къыйыш,
къабаатсызнынъ япкъанлары исе дос-догърудыр.

9 ^gТаваннынъ бир кошечигинде отурмакъ
къавгъаджы апайнен эвде яшамакътан яхшыдыр.

10Яман адамнынъ джан истеги – яманлыкътыр,
досту биле онынъ козюнде мерамет тапамаз.

11 ^hМыскъылджыны джезаласалар, саде адам икмет топлар,
акъыл-ферасетли адамгъа бир шей анълатсалар, о, бильгини джыяр.

12Инсафлы адам яманларнынъ эвине анълайышнен бакъа
ве оларнынъ белягъа тюшкенини коре.

13 ⁱФукъаренинъ къыяметине къулакъ къапаткъан,
бир кунь ола озю къыямет къопарыр, лякин онъа кимсе джевап бермез.

14 ^jГизли берильген бахшыш – гъазапны,
къоюнгъа сокъулгъан къапар исе – къызгъын ачувны ятыштыра.

15Адалет ерине кельсе – инсафлы адам къуваныр,
яман адам исе дешет тюбюне къалыр.

16 ^kАкъыл-ферасет ёлундан узакълашкъан адам
олюлернинъ топлашувында тынчлыкъ тапар.

17Шенълик севген ёкъсуллыкъ корер,
шарапнен зейтюн ягъыны севген зенгин олмаз.

18 ^lДогъру адам ичюн одеме – яман адам,
догърусыны айткъан адам ичюн одеме – къара юрекли адам.

19 ^mСахрада отурмакъ
джарис ве къавгъаджы апайнен яшамакътан яхшыдыр.

20Икметли адамнынъ эви паалы шейлерге ве зейтюн ягъына толудыр,
акъылсыз исе бутюн малыны тез юта.

21Инсафлыкъкъа ве садыкълыкъкъа ынтылгъан адам
яшайыш, инсафлыкъ ве шурет тапар.

22 ⁿИкметли адам къараманларнынъ шеэрине кире,
олар ишангъан къалени йыкъа.

23 ^oАгъзыны ве тилини туткъан адам
башыны белядан къуртара.

24 ^pКибирли ве магърур адамнынъ ады – мыскъылджы,
къызгъын къопайлыгъында арекет эте.

25 ^qТенбельнинъ нефисхорлыгъы оны ольдюрир,
чюнки къоллары чалышмагъа истемез.

26 ^rКунь-куньден истеклеринден джаны яна,
инсафлы адам исе аджымайып бере.

27 ^sЯман адамларнынъ чалгъан къурбаны пистир,
къара ниетнен чалынгъан къурбан ондан бетердир.

28 ^tЯлан айткъан шаат ёкъ олур,
дикъкъатнен динълеген адамнынъ исе айткъаны олур.

29Яман адам озюни кибирли тута,
догъру адам исе озь ёлунда къатты тура.

30 ^uАдамларнынъ икмети, анълайышы, насиаты –
РАББИнинъ огюнде бош шей.

^vАтны дженк ичюн азырларлар,
гъалебе исе РАББИдендир.
31