‏ Proverbs 24

1 ^aЯман адамларны пахыллама,
оларнен берабер олмагъа истеме.
2 ^bОларнынъ юреклери зорбалыкъ акъкъында тюшюнелер,
дудакълары беля акъкъында лаф этелер.

3Эв икметнен къурулыр
ве анълайышнен темеллешир.
4 ^cБильги эвнинъ козьлерини
паалы ве аджайип шейлерге толдурыр.

5 ^dИкмет саиби кучьлюдир,
бильгили адам кучь-къуветлидир.
6 ^eОнынъ ичюн насиаткъа къулакъ асып дженк эт,
акъыл огреткен адамлар чокъ олса, енъерсинъ.

7Ахмакъ ичюн икмет чыкъып оламайджакъ юксекликтедир,
шеэрнинъ араба къапусы янында о, агъзыны ачмаз.

8Къара ниетли адамгъа
«беля кетириджи» дерлер.
9 ^fАхмакънынъ япкъанлары – гунадыр,
адамлар мыскъылджыдан нефрет этелер.

10 ^gАгъыр куньлерде рухтан тюшсенъ,
кучюнъ аз демектир.

11 ^hОлюм панджасына тюшкен адамларны къуртар,
олюмге кеткенлерни къорчаламакътан къачма.
12 ⁱСен: «Биз буны бильмедик де», – айтарсынъ да,
лякин инсанларнынъ юреклерини Сынагъан эписини анълай,
джанынъны Къорчалагъан эр бир шейни биле
ве эр кеснинъ акъкъыны бере.

13 ^jОгълум, бал аша, чюнки о, леззетлидир,
солакъ балы тамагъынъ ичюн татлыдыр.
14 ^kИкмет де джанынъ ичюн тамам ойледир.
Икметни тапсанъ, келеджегинъ олур,
умютинъ де кесильмез.

15 ^lЭй, яман адам, инсафлы адамнынъ эвине къаршы сакъланып ятма,
раатлангъан ерини ёкъ этме.
16 ^mИнсафлы адам еди кере йыкъылса,
эписи бир аякъкъа турар,
яман адам исе бир сюрюнгенде турамаз.

17 ⁿДушманынъ йыкъылгъанда, къуванма,
о сюрюнгенде, юрегинъ севинмесин.
18 ^oЁкъса буны корьген РАББИ мемнюн къалмаз,
душманынъа къаршы олгъан гъазабы да ятышыр.

19 ^pЯманларгъа къаршы ачувланма,
ярамай адамларны пахыллама.
20 ^qЯманлыкънынъ келеджеги ёкъ олур,
ярамай адамларнынъ чырагъы сёнип кетер.

21 ^rОгълум, РАББИден ве падишадан къоркъ,
фикирлерини тез денъиштирген адамларнен берабер олма.
22Олардан кельген фелякет апансыздан келир,
олардан кельген беляны ким билир?

Икметли адамларнынъ икметли сёзлери

23 ^sБулар да икметли адамларнынъ айткъанларыдыр.

Судда даваны аселет янълыш чезмек – яхшы дегильдир.
24 ^tКъабаатлы адамгъа: «Къабаатынъ ёкъ», – деген адамны
халкълар къаргъар, къабилелер де силип ташлар.
25Къабаатлыны джезалагъан адамлар исе онъар,
РАББИ оларгъа яхшы бахшышлар берер.

26Догъру джевап –
дудакъларгъа опюш кибидир.

27Башта азбардаки ишлерни битирип,
тарланы азырла да, сонъ эвинъни котер.

28 ^uБашкъа адамгъа къаршы ботен шаатлыкъ этме,
агъзынъдан ялан лаф чыкъмасын.
29 ^v«Манъа не япкъан олса, мен де онъа шуны япарым,
япкъанларына коре къайтарырым», – деме.

30Тенбельнинъ тарласы янындан
ве акъылдан эксик адамнынъ юзюм багъы янындан кечкенимде,
31иште, бакъсам не корейим:
эр бир ер когемликке толгъан,
орталыкъны от баскъан,
таш дивары да йыкъылгъан.
32Корьгенлеримден тюшюнджеге далдым,
ве бойле дерс алдым:
33«Азачыкъ юкъласанъ, азачыкъ юкъусырасанъ,
азачыкъ къол къавушып ятсанъ, –
34 ^wбир быралкъы киби, келир сенинъ ёкъсуллыгъынъ,
фукъарелик де, бир айдут киби, келир».