Proverbs 25
Сулейманнынъ икметли сёзлери
1 aМына Сулейманнынъ башкъа икметли сёзлери. Оларны Ехуда падишасы Хизкиянынъ адамлары топлады. 2 bШейлерни гизлеген Аллагъа шан-шурет!Гизли шейлерни ачкъан падишаларгъа да шан-шурет!
3Кокнинъ юксеклиги, ернинъ теренлиги,
падишанынъ юрегинде не олгъаны да билинмез.
4Кумюшке къошулгъаныны айыр,
ве къуюмджы бир савут япар.
5 cПадишанынъ янындан яманларны узакълаштыр,
ве падишанынъ тахты акъикъатта темеллешир.
6 dПадишанынъ огюнде озюнъни юксек тутма,
буюк адамларнынъ еринде де турма.
7Сен корьген мырзаларнынъ огюнде ашаланмакътан,
санъа: «Якъынджа келип отур», – дегенлери яхшыдыр.
8Судгъа даванъны еткизмеге ашыкъма.
Сонъунда башкъасы сени масхара этсе, не япаджакъсынъ?
9Башкъа адамнен даванъны юзьме-юзь чез
ве башкъасынынъ сырларыны ачма.
10Ёкъса буны эшиткен сени утандырыр,
ве яман намдан къуртулып оламазсынъ.
11 eЕринде айтылгъан сёз
кумюш оймаларында алтын алма кибидир.
12 fДинълеген къулакъ ичюн икметли адамнынъ опькеси –
алтын купе, темиз алтындан япылгъан ильван кибидир.
13 gИшанчлы эльчи оны ёллагъан саиби ичюн –
оракъ вакътында къар салкъыны киби,
эфендисининъ джанына о, кучь-къувет къайтара.
14 hЯгъмурсыз булутнен ель насыл олса,
«бахшыш берерим» деп макътангъан,
амма бермеген адам да ойледир.
15Сабырнен укюмдарны да къандырмакъ мумкюн,
йымшакъ тиль кемикни де сындырыр.
16 iБал тапсанъ, къарарынен аша,
арткъач ашасанъ, къусарсынъ.
17Достунънынъ эвине сыкъ-сыкъ барма,
ёкъса сенден безер ве сени кореджек козю олмаз.
18 jБашкъа адамгъа къаршы ялан шаатлыкъ эткен адам
чокъмар, къылыч ве сюйрю окъ кибидир.
19Агъыр кунюнъде ишанчсыз адамгъа ишанч –
чюрюк тиш я да сакъат аякъ кибидир.
20Юреги агълагъан адамгъа тюркю айтмагъа –
сувукъ авада урбаны чыкъармакъ,
я да содагъа сирке къоймакъ кибидир.
21 kДушманынъ ач олса, онъа аш бер,
сувсагъан олса, сув бер.
22 lБойле япып, башына янгъан куллер киби топларсынъ,
РАББИ исе санъа къайтарыр.
23Шимальден эскен ель ягъмур кетиргени киби,
ошекчининъ тили де ачувлы бакъышларгъа ёл ачар.
24 mТаваннынъ бир кошечигинде отурмакъ
къавгъаджы апайнен эвде яшамакътан яхшыдыр.
25 nУзакъ мемлекеттен кельген яхшы хабер –
пек сувсагъан джан ичюн салкъын сув кибидир.
26Яман адамнынъ огюнде къалтырагъан инсафлы адам –
суву булангъан чокъракъ, кирленген чешме кибидир.
27Пек чокъ бал ашамакъ – яхшы дегиль,
шанлы адамларнынъ шуретини къыдырмакъ да ойледир.
28Озюни тутып оламагъан адам –
диварсыз, йыкътырылгъан шеэр кибидир.
Copyright information for
CrhCTB