‏ Proverbs 26

1 ^aЯзгъа – къар, оракъ вакътына – ягъмур киби,
акъылсызгъа да ойле шурет ярашмаз.

2 ^bКъуш учар, къарылгъач кетер,
акъсыз къаргъыш да тиймейип кечер.

3 ^cАткъа – къамчы, эшекке – юген,
акъылсызнынъ сыртына да – сопа.

4Акъылсызгъа ахмакълыгъына коре джевап къайтарма,
ёкъса сен де о киби ахмакъ олурсынъ.

5 ^dАкъылсыз озюни акъыллы деп саймамакъ ичюн,
онъа ахмакъча джевап къайтар.

6Хабер еткизмекни акъылсызгъа буюргъан
озь-озюни аякътан кесер, озюне зарар кетирир.

7Акъылсызнынъ агъзындан чыкъкъан икметли сёз
топал адамнынъ юрюшине ошар.

8 ^eАкъылсызны шуретлемек –
яйгъа окъны багъламакъ кибидир.

9Акъылсызнынъ агъзындан чыкъкъан икметли сёз –
сархошнынъ къолундаки когемлик киби.

10Адамларны акъылсызджа аткъан окъчу киби,
ёлдан кечкенни я да акъылсызны ишке алгъан адам да ойледир.

11 ^fКъускъагъына къайткъан копек киби,
ахмакълыгъында инатлангъан акъылсыз адам да ойледир.

12 ^gОзюни икметли деп туткъан адамны корьдинъми?
Акъылсыз биле ондан ишанчлыдыр.

13 ^hТенбель: «Ёлда арслан бар!
Мейданларда джанавар юре!» – дер.

14Къапу ильмеклерде саллана,
тенбель де тёшегинде бир янындан башкъа янына айлана.

15 ⁱТенбель ашкъа узангъан къолуны
агъзына къайтармагъа биле эринир.

16Тенбель озюни, тюшюнип джевап къайтаргъан
еди адамдан икметли саяр.

17Башкъасынынъ къавгъасына киришкен адам
кечеяткъан копекни къуйругъындан тарткъан адамгъа ошар.

18Атешли окълар
ве ольдюриджи силя аткъан дели киби,
19башкъа адамны алдатып,
сонъундан: «Шакъа эттим!» – деген адам да ойледир.

20 ^jОдун олмаса – атеш сёнер,
ошекчи олмаса – къавгъа битер.

21Къор ичюн – комюр, атеш ичюн – одун,
къавгъаны да алевлендирмек ичюн – ошекчи керек.

22 ^kОшекчининъ лафы – пек леззетли тилимлер кибидир,
олар адамнынъ ичине тез кирелер.

23 ^lКъара юрекли адамнынъ татлы сёзлери
балчыкътан япылгъан,
кумюшке къошулгъан айырмалардан къаплангъан савуткъа ошар.

24Душман лафларынен разылыкъ бере,
ичинде исе хиянетликни тюшюне;
25 ^mонынъ назик сесине биле инанма,
чюнки юрегинде еди нефретли шей бардыр;
26алдавнен нефретини сакъласа да,
яманлыгъы джемаат арасында ачылыр.

27 ⁿЧукъур къазгъан адам ичине озю тюшер,
ташны юварлаткъан инсан тюбюне озю огърар.

Яланджы тиль ынджынгъан адамлардан нефрет эте,
ялтакълангъан агъыз эляк азырлай.
28