‏ Proverbs 27

1 ^aЯрынки куннен макътанма,
чюнки не кетиреджегинден хаберинъ ёкъ.

2Озь тилинъ дегиль – башкъасынынъ тили,
озь дудакъларынъ дегиль – чет дудакълар сени макътасын.

3 ^bТаш – бир юктир, къум – енгиль дегиль,
ахмакънынъ агъырткъаны исе экисинден агъыр.

4 ^cГъазап мераметсиз, афакъанны баш эталмазсынъ,
лякин куньджюликке ким даянып олур?

5 ^dАчыкъ бир опьке
сакълы севгиден яхшыдыр.

6 ^eСевген адамдан кельген яралар,
нефретленген адамнынъ чокъ опюшинден яхшыдыр.

7 ^fТокъ адамнынъ джаны солакъ балны истемез,
ач адамгъа исе аджджы шей биле татлы келир.

8Тувгъан ерини къалдыргъан адам
ювасындан узакъ учкъан къуш кибидир.

9Гузель ягълар ве къокъулар юрекни къувандыра,
достнынъ джан-юректен берген насиаты да татлы келе.

10 ^gЭм озюнънинъ достларынъны,
эм бабанънынъ достларыны къалдырма,
башынъа беля тюшкенде, сой-соп къыдырма,
якъын къомшу узакъ сойдан яхшыдыр.

11 ^hОгълум, икметли ол ве бойледже юрегимни къувандыр,
сонъ мени опькелегенлерге мен джевап берип олурым.

12 ⁱЗекялы адам беляны корьгенинен сакъланыр,
саде адамлар исе чыкъып джезаланыр.

13 ^jБир кимсе ябанджыгъа кефиль олса, онынъ урбасыны ал,
чет адам ичюн ондан залог ал.

14Саба танъда достны кучьлю сеснен макътагъан адамны
къаргъагъан инсан киби саярлар.

15 ^kКъавгъаджы апай –
ягъмурлы куньде токътамайып тамлагъан сув кибидир;
16бойле апайны тынчландырмакъ –
ельни тутмакъ я да ягъны авучнен алмакъ кибидир.

17Демирни демир къайрай,
адамгъа исе башкъа адам акъыл огретир.

18 ^lИнджир терегини бакъкъан адам мейвасындан ашар,
эфендисини къорчалагъан исе шурет къазаныр.

19Адамнынъ бети сувда корюнгени киби,
адамнынъ юреги де башкъа адамнынъ юрегинде корюнир.

20 ^mО бир дюнья ве эляк дияры адамгъа тоймаз,
бойле де адамнынъ козю бакъмагъа ёрулмаз.

21 ⁿАлтын – оджакъта, кумюш – иритильгенде сыналыр,
адам исе макъталып сыналыр.

22Ахмакъны аванда богъдайнен берабер
аван токъмагъынен тюйсенъ биле,
онынъ ахмакълыгъы ондан айырылмаз.

23Къой-эчкилеринъни яхшы бакъ,
сюрюлеринъе мукъайт ол.
24 ^oБайлыкъ омюрлик дегильдир,
тадж да эр вакъыт несильден несильге кечмез.
25От солгъанынен тазе ешиллик пейда олур,
дагълардаки отлар да джыйылыр;
26къойлар сени кийиндирир,
текелер де тарланынъ фиятыны котерир;
эчкилеринънинъ сютю санъа да ашамагъа етер,
эвдекилеринънен хызметчи къызларынъны да тойдурыр.
27