Proverbs 3
Огъулларгъа насиат
1 aОгълум, огреткенлеримни унутма,эмирлеримни юрегинъде сакъла.
2 bОлар омрюнънинъ куньлерини
ве йылларыны узатаджакълар,
санъа муаббетлик кетиреджеклер.
3 cМерамет ве садыкълыкъ сени къалдырмасын:
оларны бойнунъа сар,
пиляки таш устюне киби, юрегинънинъ устюне яз.
4Сонъ Алланынъ ве адамларнынъ козьлери огюнде
санъа хайыр ве акъыл-ферасет оладжакълар.
5 dРАББИге джан-юректен ишан,
озь акъылынъа таянма.
6 eЭписи ёлларынъда РАББИни бильмеге тырыш,
ве О, сенинъ ёлларынъны догъру япаджакъ.
7 fОзюнъни икметли сайма,
амма РАББИден къоркъ ве яманлыкътан узакъ тур.
8Бу, беденинъе – сагълыкъ,
кемиклеринъе де – къувет олур.
9 gМал-мулькюнъден ве эр бир ишинънинъ
биринджи берекетинъден РАББИге пай айырып,
Оны урьмет эт.
10 hСонъ анбарларынъны мал басар,
фычыларынъ да яш шарапнен толып-ташар.
11 iОгълум, РАББИнинъ огютини ред этме
ве опькесинден нефретленме.
12 jБаба севимли огълуны джезалагъаны киби,
РАББИ де кимни севе, оны да джезалай.
13Икметке иришкен адам,
анълайышкъа саип олгъан адам не бахтлыдыр!
14 kОны къазангъаны кумюш къазангъанындан яхшыдыр,
онынъ келири алтындан олгъан келирден берекетлидир,
15 lо, дегерли ташлардан паалыдыр,
бутюн истегенлеринъден ич бир шей онъа тенъ олмаз.
16 mОнынъ онъ къолунда – узакъ омюр,
сол къолунда исе – байлыкъ ве шурет.
17Онынъ ёллары – гузель ёллардыр,
ве эписи ёлчыкълары – муаббетликтир.
18 nИкметни тапып алгъан адам ичюн, о – омюр терегидир,
оны яхшы туткъан – бахтлыдыр!
19 oРАББИ ернинъ темелини икметнен къойды,
усталыкънен коклерни ерлештирди.
20 pОнынъ бильгиси теренликлер яра
ве булутлардан чыкъ тюшюре.
21Огълум, буны козь огюнъден къачырма,
идракъ ве ферасетинъни даима сакъла.
22Олар джанынъ ичюн – омюр,
бойнунъ ичюн – хайырлы ильван олур.
23 qО вакъыт ёлунъ хавфсыз олур,
аягъынъ да абынмаз.
24 rЮкъламагъа къоркъусыз ятарсынъ,
юкълап къалгъанынъдан сонъ да юкъунъ татлы олур.
25 sАпансыз белядан ве ярамайларгъа кельген къазадан къоркъма,
26чюнки РАББИ сенинъ ишанчынъ оладжакъ,
аягъынъны къапкъандан О, сакълайджакъ.
27 tЭлинъден кельсе,
адамнынъ акъкъыны бермектен къачынма.
28 uЯнынъда олып да, башкъа адамгъа:
«Кет, ярын келирсинъ, о вакъыт берерим», – деме.
29Сенден хавф беклемеген къомшугъа къаршы
бир яманлыкъ япмагъа тюшюнме.
30Санъа яманлыкъ этмеген адамнен
бош ерде къавгъа этме.
31 vЗорбалыкъ эткен адамны пахыллама,
онынъ ёлларындан ич бирини сайлама.
32РАББИ къара юрекли адамдан нефретлене,
догъру адамларгъа исе О, ишана.
33 wГунакярнынъ эвини РАББИ къаргъай,
инсафлы адамларнынъ эвини исе багъышлай!
34 xМыскъылджыларны О, мыскъыллайджакъ,
алчакъгонъюллилерге исе эйилик япаджакъ.
35Икмет саиплери мирас оларакъ шурет аладжакълар,
акъылсызлар исе – масхаралыкъ.
Copyright information for
CrhCTB