Proverbs 4
Икметтен ве бильгиден файда
1 aБалалар, бабанъызнынъ огютини динъленъиз,акъыллы олмакъ ичюн, къулакъ асынъыз,
2Сизге яхшы акъыл огретем,
огреткенлеримни унутманъыз.
3Мен бабамнынъ севимли огълу эдим,
анамнынъ бирден-бир баласы.
4 bБабам мени огретип, манъа бойле айта эди:
«Айткъанларымны юрегинъе къой,
эмирлеримни тутып яша.
5Икметке саип ол, акъылгъа малик ол!
Айткъанларымны унутма, олардан четке чекильме.
6Икметни къалдырма – о сени къорчалайджакъ,
оны сев – о сени сакълайджакъ.
7Башы – икмет! Икметке саип ол!
Бутюн мал-мулькюнънинъ устюнден акъылгъа саип ол!
8 cОны баш устюнде тут – о да сени юксельтеджек,
онъа япышсанъ – о сени шуретлейджек.
9 dО, башынъа хайырлы чембер къояджакъ,
аджайип таджны санъа кийдиреджек».
10 eДинъле, огълум, ве айткъанларымны къабул эт,
сонъ омрюнънинъ йыллары узаныр.
11Мен санъа икмет ёлуны косьтеририм,
догъру ёлларнен алып кетерим.
12 fЁлдан кеткенде, аякъларынъа ич бир шей кедер этмейджек,
чапкъанда, абынмазсынъ.
13 gОгютни яхшы тут, оны йиберме,
сакъла оны, о – сенинъ яшайышынъ.
14 hЯрамайларнынъ ёлуна аякъ басма,
яманларнынъ ёлундан да юрме.
15О ёлны ташла, ондан кетме,
ондан четке чекиль, янындан кеч.
16 iЯман адамлар яманлыкъ япмагъандже,
юкълап оламайлар,
биревни ёлдан урмагъандже,
оларнынъ козюне юкъу кирмей.
17Олар отьмек ерине яманлыкъ ашайлар,
шарап ерине – зорбалыкъ ичелер.
18 jИнсафлы адамларнынъ ёлу –
нур сачкъан ярыкъ киби,
уйле маали келеята –
о эп парлакъ ола.
19 kЯрамайларнынъ ёлу исе –
зифт къаранлыкъ киби,
олар неге сюрюнеджеклерини бильмейлер.
20Огълум, сёзлериме дикъкъат эт,
айткъанларыма къулакъ ас.
21Олар акъылынъдан чыкъмасын,
оларны юрегинъде сакъла.
22 lОларны тапкъан адам ичюн олар – яшайыш,
бутюн бедени ичюн – шифадыр.
23Эр шейден зияде юрегинъе мукъайт ол,
чюнки яшайыш чокъракълары ондандыр.
24 mАгъзынъдан ялан сёзлер чыкъмасын,
айнеджиликни узакъ ташла.
25Козьлеринъ дос-догъру бакъсын,
бакъышынъ да огге догърулсын.
26 nКетеджек ёлунъны яхшы этип тюшюн,
сонъ эписи ёлларынъ онъундан келир.
27 oСагъгъа-солгъа урулма,
аягъынъны яман ёлдан узакъ тут.
Copyright information for
CrhCTB