‏ Proverbs 5

Къоранта садыкълыгъыны бозмакътан тенбиелев

1 ^aОгълум, икметиме дикъкъат эт,
фикириме къулакъ ас.
2 ^bСонъ сен ферасетни сакълап къалырсынъ,
дудакъларынъ да бильгини сакълар.
3 ^cБашкъасынынъ апайынынъ агъзындан бал тамлай,
онынъ лафы да – эльвадан татлы.
4 ^dОнынъ сонъу исе, юшан оту киби, аджджы,
эки агъызлы къылыч киби кескин.
5 ^eАякълары олюмге алып баралар,
табанлары о бир дюньягъа догъру кетелер.
6Яшайыш ёлуны о ич тюшюнмей,
ёллары насыл саллангъаныны о озю бильмей.

7Балаларым, мени динъленъиз!
Айткъанларымны ред этменъиз!
8Шу апайдан узакъ тур,
эвининъ къапусына якъын барма!
9Ёкъса, сагълыгъынъны башкъасына берип,
йылларынъны да шефкъатсыз адамларгъа масраф этерсинъ,
10кучюнъден ят адамлар такъатланырлар,
япкъанларынъ да – башкъасынынъ эви ичюн олур.
11Омрюнънинъ сонъки куньлеринде исе,
беденинъ азып-тозып, инъильдемеге башларсынъ:
12«Ах, не ичюн огютни кореджек козюм олмады?
Юрегим де не ичюн опькелерни бир шей ерине корьмеди?
13Оджаларымнынъ сёзлерини динълемедим,
мени огреткенлернинъ айткъанларына да къулакъ асмадым!
14Джемаат ве топлашувнынъ козю огюнде
аз къалдым масхара олмагъа!»
15 ^fСувны озь хавузынъдан,
озь къуюнъдан ич.
16Сувларынъны сокъакълар бою,
сув акъымларынъны мейданларда акъызма.
17Олар тек сенинъ олсунлар,
башкъаларынен пайлашма.
18 ^gЧешменъ берекетли олсун,
яшлыгъынъда эвленген апайынънен бахтлы ол.
19Севимли ала кийик, назик бир къараджа о –
кокюслери даима сени мемнюн этсин,
онъа олгъан севгинъден эр вакъыт зевкъ ал.
20Огълум, санъа башкъасынынъ апайынен кейф чатмагъа,
бирев апайынынъ белине сарылмагъа не керек?

21 ^hАдамнынъ ёллары – РАББИнинъ козю огюндедир,
эр баскъан адымны О, биле.
22Ярамайны озь яманлыкълары сарып аладжакъ,
озь гуналарынынъ къапкъаны оны тутып багълайджакъ.
23Огют эксиклиги оны гъайып этер,
буюк акъылсызлыгъы оны ёлдан урар.