‏ Proverbs 7

1 ^aОгълум, айткъанларымны акъылынъда тут,
эмирлеримни унутма.
2 ^bЭмирлеримни тут ве яша,
огреткенлеримни, козь бебеги киби, сакъла.
3 ^cОларны пармакъларынъа багъла,
таш устюне киби, юрегинънинъ устюне яз.
4Икметке: «Сен – меним татамсынъ!»,
акъылгъа да: «Сой-акърабамсынъ!» – айт.
5 ^dОлар сени башкъасынынъ апайындан,
татлы-татлы лаф эткен биревнинъ апайындан къорчаласынлар.

Акъылдан эксик огълан ве ороспу акъкъында

6Куньлерден бири пенджеремден тышары,
пенджере пармакълыгъындан сокъакъкъа бакътым.
7 ^eСаде адамларнынъ, яш огъланларнынъ арасында
бир акъылдан эксик огъланны корьдим.
8– 9 ^fО огълан акъшам устю, кунь баткъанда,
гедже къаранлыгъы тюшкен вакъытта,
бир апай отургъан сокъакъ бою,
онынъ эвине тараф кете эди.

10 ^gИште, онынъ къаршысына апай чыкъты,
къара юрекли, устюнде – ороспу урбасы.
11Шаматаджы ве инат бу апай,
бир дакъкъа биле эвде отурып оламаз.
12 ^hДе сокъакъта, де мейданда,
эр кошеде авлап отургъан апай.
13Япышып тутты, опьти огъланны,
утанмаз бетинен онъа бойле деди:

14«Аманлыкъ къурбанларымны чалдым,
адагъымны мен бугунь ерине кетирдим.
15Онынъ ичюн огюнъе чыкътым,
къыдырдым сени ве таптым!
16Тёшегиме дюльбер орьтюлерни,
тюрлю ренкте олгъан Мысыр басмаларыны тёшедим.
17 ⁱЯткъан еримни мюр, алоэ ве тарчыннен къокъулаттым.
18Кель, сабагъадже бири-биримизни тойгъандже севейик,
севгиден зевкъ алайыкъ.
19Акъайым эвде ёкъ,
узакъ ёлгъа кетти,
20акъчасы олгъан кисени де янына алды,
ай толмагъандже эвге къайтмаз».

21 ^jЧокъ назик сёзлернен оны къандырды,
татлы лафынен артындан алып кетти.
22 ^kШу дакъкъа кетти огълан онынъ пешинден.
Бойле шекильде де бугъа – бойнагъа
ве сыгъын – къапкъангъа кете,
23анда атылгъан окъ джигерини ура.
Бойле де джаныны гъайып этеджегинден хабери олмагъан,
учкъан къуш тузакъкъа кете.

24Демек, балалар, динъленъиз мени,
сёзлериме дикъкъат этинъиз:
25сакъын, о къадынгъа юрегинъ айланмасын,
онынъ ёлларындан юрменъиз.
26Чокъ адам яраланып, онъа ола гъайып олдылар,
чокъ адамларны о йыкътырды.
27 ^lОнынъ эви – о бир дюньягъа алып кеткен ёлдыр,
олюм эвининъ одаларына тюшкен ёлдыр.