‏ Proverbs 9

Икмет ве ахмакълыкъ

1Икмет озюне эв къурды,
онынъ еди дирегини тикледи,
2 ^aайванлар сойды, къокъулы шараплар азырлады,
софраны донатты.
3 ^bШеэрнинъ юксек ерлеринден илян этмек ичюн,
хызметчи къызларыны ёллады:
4«Саде олгъанлар, келинъиз манъа!»
Акъылдан эксик олгъанларгъа исе бойле деди:
5 ^c«Келинъиз, ашымдан ашанъыз,
мен азырлагъан къокъулы шарапны ичинъиз.
6Саде ёлларынъызны ташланъыз ве яшанъыз,
анълайыш ёлундан кетинъиз.
7Мыскъылджыны огретсенъ – башынъа сёгюнч къазанырсынъ,
яман адамны опькелесенъ – озюнъе масхаралыкъ олур.
8 ^dМыскъылджыны опькелеме, ёкъса о сенден нефрет этер.
Икмет саибини опькеле, ве о сени север.
9 ^eИкметли адамгъа акъыл огрет – о даа икметли олур,
инсафлы адамны огрет – бильгисини арттырыр.
10 ^fИкметнинъ башы – РАББИден къоркъмакътыр,
Мукъаддесни бильмек – анълайышнынъ манасы!
11 ^gМеним ярдымымнен куньлеринъ чокъ олур,
яшайышнынъ йыллары чокълашаджакълар.
12Икметли олсанъ – икметинъ озюнъе хызмет этер,
мыскъылджы олсанъ – ялынъыз сен зарарыны чекеджексинъ».

13 ^hАкъылсыз къадын шаматаджыдыр,
о саде ве ич бир шей бильмей!
14Эвнинъ къапусы янында,
шеэрнинъ юксек ерлеринде тахтта отура.
15Кельген-кечкенлерни,
озь ёлларынен кеткен адамларны чагъыра:
16«Саде олгъанлар, келинъиз манъа!»
Акъылдан эксиклерге бойле дей:
17 ⁱ«Хырсызлангъан сувлар татлыдыр,
сакъланып ашалгъан отьмек леззетлидир!»
18Амма анда олюлернинъ олгъаныны,
о чагъыргъан адамлар о бир дюньянынъ
теренлигине огърагъаныны бильмей шу адам!