‏ Proverbs 1

Икметли сёзлернинъ макъсады

1 ^aИсраиль падишасы, Давут огълу Сулейманнынъ икметли сёзлери:

2Бу икметли сёзлер – икметнинъ ве огютнинъ манасына етмеге
ве акъыллы лафларны анъламагъа,
3 ^bакъыл-ферасет, инсафлыкъ, адалетлик ве
догърулыкъ акъкъында огютлерни алмагъа истеген адамлар ичюн.
4 ^cСаде адамгъа олар зекяны,
яш огълангъа – бильги ве ферасетни берерлер.
5Оларны эшитип, икметли адам бильгилерини арттырыр
ве акъыллы адам яхшы насиатлар тапар.
6Сонъ о, икметли сёзни ве кинаели икяени,
акъыл саиплерининъ лафларыны ве оларнынъ тапмаджаларыны анълар.

Яшларгъа насиат

7 ^dБильгининъ башы – РАББИден къоркъмакътыр,
огютни ве икметни бир шей ерине корьмеген адам – ахмакътыр.

8 ^eДинъле, огълум, бабанънынъ огютини
ве ананънынъ эмирини ташлама.
9 ^fОлар башынъа – гузель тадж,
бойнунъа да – ильвандыр.
10 ^gОгълум, эгер гуналы адамлар сени яманлыкъ япмагъа къандырсалар,
разы олма.
11 ^hЭгер олар санъа: «Юр бизнен, тузакъта сакъланып,
къабаатсыз адамны бир манасы олмайып беклермиз, ольдюрирмиз оны.
12 ⁱО бир дюнья – тири алда адамларны,
мезар – бутюн алда онъа тюшкенлерни киби,
бойле де биз оларны тири ютармыз.
13Чешит тюрлю къыйметли мал-мульк алып,
эвлеримизни гъаниметке толдурып-ташырармыз.
14Бизнен берабер джереп чекерсинъ,
эпимизнинъ пара кисеси бир оладжакъ», – деселер,
15 ^jогълум, оларнен берабер ёлгъа чыкъма,
оларнынъ ёлуна аягъынъ басмасын,
16 ^kчюнки оларнынъ аякълары яманлыкъкъа чапалар,
олар къан тёкмеге ашыкъалар.
17Къушларнынъ козю огюнде тузакъны къоймакъ бошунадыр,
18олар исе озьлерининъ къаныны тёкмек ичюн, тузакъ япалар,
сакъланып, джанларыны гъайып этелер.
19 ^lАдалетсиз къазанчкъа къызгъан эр кимнинъ сонъу бойледир:
бу къазанч, онъа саип олгъан адамларнынъ джаныны ала.

Икмет чагъыра

20 ^mИкмет сокъакъларда къычыра,
мейданларда сесини котере,
21топлашувларынынъ баш ерлеринде чагъыра,
шеэрлернинъ араба къапусында бойле сёзлерни айта:

22 ⁿ«Эй, саде адамлар, саделикни не вакъыткъадже севеджексинъиз?
Мыскъылджылар не вакъыткъадже
мыскъылламакътан кейф чатаджакълар?
Акъылсызларнынъ не вакъыткъадже
бильгини корьмеге козьлери олмайджакъ?
23Меним опькеме къулакъ асынъыз,
сонъ мен сизге озь рухумны тёкеджегим,
сёзлеримни айтаджагъым.
24 ^oМен чагъырдым – сиз эшитмединъиз,
къолумны узаттым – абайлагъан адам олмады.
25 ^pЭписи насиатларымны ред эттинъиз,
опькелеримни де къабул этмединъиз.
26 ^qОнынъ ичюн мен де сизинъ белянъыз устюнден кулерим,
сизни дешет баскъанда, мен де сизни мыскъылларым.
27Сизни дешет фуртуна киби баскъанда
ве беля къасыргъа киби сарып алгъанда,
къайгъы ве сыкъынты тюбюнде къалгъанынъызда, къуванырым.
28 ^rО заман мени чагъыраджакълар,
лякин мен эшитмейджегим,
саба-танъдан мени къыдыраджакълар,
лякин тапалмайджакълар.
29Олар бильгиден нефрет эттилер
ве РАББИден къоркъуны озьлерине сайлап алмадылар.
30Олар насиатымны къабул этмедилер,
опькелеримни де аякъ асты эттилер.
31 ^sОнынъ ичюн туткъан ёлларынынъ мейвасыны ашайджакълар,
озь тюшюнджелеринден тояджакълар.
32Саделернинъ инатлыгъы озьлерини гъайып этеджек,
акъылсызларнынъ гъамсызлыгъы озьлерининъ башына етеджек.
33Мени динълеген адам исе,
яманлыкътан къоркъмайып,
раат ве тынч яшайджакъ».