‏ Psalms 103

Яратыджыгъа шукюр

1 ^aЭй, джаным, РАББИни алгъышла!
Аллам я РАББИ, Сен пек улусынъ,
шан-шуретке кийингенсинъ!
2 ^bСен ярыкъны урба киби киесинъ,
коклерни перде киби джаясынъ!
3 ^cСарайынънынъ юкъары одаларыны кок къуббеси устюнде къургъансынъ,
булутларны Озюнъе араба этип,
ельнинъ къанатлары устюнде кезесинъ.
4 ^dСен мелеклеринъни еллерге чевиресинъ,
хызметчилеринъни алевленген атешке айландырасынъ.
5 ^eЕр эбедиен тепренмесин деп,
оны къатты темель устюне къойгъансынъ.
6Онъа учурымны урба киби кийдиргенсинъ,
сувлар дагъларнынъ башына етип барды.
7 ^fСенинъ серт эмиринъден олар акъты,
Сесинъ гудюрдисинден тез къачып кеттилер.
8Олар дагъларгъа чыкътылар,
вадийлерге тюштилер,
Сен бельгилеген ерге акътылар.
9 ^gСен оларгъа сынъыр къойдынъ,
сувлар оны кене кечип кетмез,
ерни кене къапламагъа сув ташкъыны къайтмаз.
10Вадийлерде чешмелерни ачып йибердинъ,
олар дагълар арасындан акъа,
11бутюн кийик айванларны сувара,
кийик эшеклер де сувсап сув ичелер.
12Шу сувлар боюнда кок къушлары къона,
олар пытакълар арасындан оте.
13Юкъары эвлеринъден дагъларны суварасынъ,
ер юзю ишлеринънинъ мейвасына тоя.
14 ^hСен айван ичюн от
ве инсан ичюн ешиллик осьтюресинъ.
Инсан ешиллик ишлете – топракъ аш бере.
15 ⁱАдамнынъ юрегини къувандыргъан шарапны,
инсан юзюнинъ йылтыраткъан ягъны,
юрегине къувет берген отьмекни де Сен яратасынъ.
16РАББИнинъ тереклери,
Озю сачкъан Ливан кедрлери сувгъа тоя.
17Оларнынъ пытакъларында къушлар юва ясай,
лейлекнинъ ювасы – чам тереклеринде.
18 ^jЮксек дагълар – дагъ эчкилерине,
къаялар исе – къая къоянларнынъ сыгъынагъы.
19 ^kМевсимлерни косьтермек ичюн О, айны яратты,
ве кунеш батаджакъ ерини биле.
20 ^lОрталыкъкъа къаранлыкъ тюшюресинъ,
гедже ола,
ормандаки айванлар авгъа чыкъа.
21 ^mЯш арсланлар ав къыдырып окюре,
Алладан аш истейлер.
22 ⁿКунеш чыкъкъанда, олар топланалар,
юваларына къайтып, яталар.
23Инсан исе озь ишине чыкъа,
акъшамгъадже чалышмакъ ичюн.
24 ^oЯ РАББИ, Сенинъ ишлеринъ не къадар чокътыр!
Эр шейни икметнен яраттынъ,
ер Сенинъ иджадынънен толу.
25Мына, буюк, уджу корюнмеген денъиз!
Анда махлюкъларнынъ сайысы ёкъ,
уфакъ ве буюк джанлылар бар.
26Денъизде гемилер ялдай,
Сен, анда ойнасын деп, яраткъан ливьятан ▼

▼Ливьятан – денъизде яшагъан пек буюк махлюкъ.

да мында.
27 ^qОларнынъ эписи Санъа умют этелер,
озь вакътында ашымызны берсин деп, беклейлер.
28 ^rОларгъа берсенъ, алалар,
къолунъны ачкъанынъда, эйилигинъе тоялар.
29 ^sЮзюнъни сакълагъанынъда, олар пек къоркъа,
нефеслерини кессенъ, ёкъ олалар
ве кене топракъкъа къайталар.
30 ^tОзь джан берген Рухунъны ёлласанъ, яратылалар,
ер юзюне Сен янъы къыяфет бересинъ.
31 ^uРАББИнинъ шурети эбедий олсун,
Озь ишлерине къувансын РАББИ!
32 ^vО, ерге бакъкъанда, ер титрей,
дагъларгъа тийгенде, олар тютюн чыкъара.
33 ^wОмюрбилля РАББИге йырларым,
мен яшагъан вакътымда Аллама чалгъы чаларым!
34Меним лафым Онъа хош кельсин,
мен РАББИ ичюн къуванырым.
35Гуналылар дюньядан ёкъ олсун,
къанун бозгъанлар ёкъ олып кетсин!
Эй, джаным, РАББИни алгъышла!
Эльхамдюлилля!