‏ Psalms 104

Алла ве Онынъ халкъы

1 ^aРАББИге шукюр этинъиз, Онынъ Адыны чагъырынъыз,
халкълар арасында ишлерини айтып беринъиз!
2 ^bОнъа йырланъыз, Онъа чалгъы чалынъыз,
бутюн аджайип шейлери акъкъында айтынъыз!
3Мукъаддес Адынен макътанынъыз,
РАББИни къыдыргъанларнынъ юреги къувансын!
4 ^cРАББИни ве Онынъ къудретини къыдырынъыз,
Онынъ юзюни эр вакъыт аранъыз!
5 ^dОнынъ яраткъан аджайип шейлерини ве аляметлерини,
агъзындан чыкъкъан къарарларыны хатырланъыз!
6Эй, Онынъ къулу Ибраимнинъ сою,
Озю сайлагъан Якъупнынъ огъуллары!
7 ^eО – Алламыз олгъан РАББИдир,
бутюн ер юзюнде Онынъ падишалыгъы кече.
8 ^fО, берген васиетни эбедий акъылында тута,
берген сёзюни – бинъ несиллер девамында.
9 ^gО, сёзюни – Ибраимге
ве антыны – Исхакъкъа берген эди.
10Буны Якъупкъа низамнаме деп къойды,
Исраильге эбедий васиет деп берди.
11 ^h«Ханаан ерини санъа береджегим,
о, сенинъ топракъ мирасынъ олур», – деди.
12 ⁱО вакъытта оларнынъ сайысы пек аз,
о ерде исе кельмешеклер эди.
13Бир халкътан башкъа халкъкъа,
бир падишалыкътан башкъа девлетке кече эдилер.
14 ^jАлла оларнынъ джаныны агъыртмагъа кимсеге ёл бермеди,
олар ичюн падишаларгъа сертликнен дей эди:
15 ^k«Меним сайлагъанларыма тийменъиз,
пейгъамберлериме яманлыкъ этменъиз!»
16 ^lЕрге ачлыкъ кетирди,
бутюн ашлыкъны къурутып ташлады.
17 ^mЛякин олардан алдын бир адамны,
къул олып сатылгъан Юсуфны ёллагъан эди.
18Онынъ аякъларыны бугъавлады,
бойнуны демир алкъанен сарды.
19 ⁿОнынъ сёзю беджерильгендже,
РАББИнинъ сёзю оны сынады.
20 ^oПадиша адам ёллап, оны къуртарды,
халкъларнынъ укюмдары оны азат этти.
21 ^pОны озь эвинде эфенди этип къойды,
бутюн мал-мулькюне башлыкъ этип къойды,
22джаны истегени киби, везирлерини огютлесин,
акъсакъалларына исе икметни огретсин.
23 ^qО вакъытта Исраиль Мысыргъа кельди,
Якъуп Хам топрагъына кочьти.
24 ^rАлла халкъыны пек чокълаштырды,
душманларындан кучьлю япты.
25 ^sСонъ оларнынъ юреклеринде Озь халкъына къаршы нефрет,
къулларына къаршы фитнеджилик догъурды.
26 ^tО, Озь къулу Мусаны
ве Озю сайлагъан Харунны ёллады.
27 ^uОларнынъ арасында РАББИнинъ аляметлерини,
Хам топрагъында аджайип ишлерини косьтерди.
28 ^vРАББИ къаранлыкъ йиберди,
ве къаранлыкъ этрафны къаплады,
олар Онынъ эмирине къаршы чыкъмады.
29 ^wОларнынъ сувларыны къангъа чевирди
ве балыкъларыны ольдюрди.
30 ^xТопракъларыны къыр бакъалары басты,
тап падишаларынынъ яткъан одасы толды.
31 ^yОнынъ эмирине коре тюрлю боджеклер кельди,
мемлекетнинъ дёрт тарафыны чиркийлер басып алды.
32 ^zБашларына ягъмур ерине бурчакъ ягъдырды,
топракъларына куйдюрген атеш ёллады.
33Багъларыны ве инджир тереклерини урып йыкъты,
эм оларнынъ ерлеринде тереклерни парчалады.
34 ^aaОнынъ эмирине коре сарынчкъалар пейда олды,
сайысы олмагъан чегерткилер чыкъты.
35Топракъларынынъ бутюн отларыны ашап ташладылар,
тарладаки берекетни ашап битирдилер.
36 ^abБутюн мемлекетинде биринджи догъгъанларны,
эркеклик гъурурларыны ольдюрди.
37 ^acОзь халкъыны исе алтын ве кумюшнен чыкъарды,
къабилелеринде ич бир хаста ёкъ эди.
38 ^adОларнынъ чыкъкъанына Мысыр севинди,
чюнки олардан къоркъу оларны къаплады.
39 ^aeРАББИ булутны перде киби джайды,
гедже ярыкъ олсун деп, атеш берди.
40 ^afОлар истеди, ве Алла оларгъа боденелерни ёллады,
ве коктеки отьмекнен оларны тойдурды.
41 ^agРАББИ къаяны ярып, сув акъызды,
къуру ерлер ортасында озен киби сув акъты.
42 ^ahО, Озь къулу Ибраимге сёз берген эди
ве акъикъатен бу мукъаддес сёзюни хатырлады.
43 ^aiОзь сайлагъан халкъыны къувандырып,
шенълендирип чыкъарды.
44 ^ajОларгъа халкъларнынъ топракъларыны берди,
башкъа миллетлернинъ эмегининъ махсуллары оларгъа мирас олды,
45олар Алланынъ низамнамелерини беджерсинлер,
Онынъ къанунына бойсунсынлар!
Эльхамдюлилля!