Psalms 106
Раббининъ Озь халкъына севгиси
1 aРАББИге шукюр этинъиз!О, хайырлыдыр ве эбедийдир Онынъ севгиси!
2 bРАББИ сатын алгъан адамлар бойле айтсынлар!
О, оларны душман къолундан къуртарды,
3тюрлю мемлекетлерден топлап алды:
шаркътан ве гъарптан, шималь ве дженюптен!
4Олар сахрада, адам олмагъан ёлларда юре эдилер,
адам яшагъан бир шеэр тапамадылар.
5Ач олып, сувсуз къалгъан эдилер,
джанлары ичлеринде иримекте эди.
6Беляда РАББИни чагъырдылар,
ве О, оларны азапларындан къуртарды.
7О, оларны догъру ёлгъа чыкъарды,
олар ерлешеджек ерге алып кетирди.
8РАББИге шукюр этсинлер буюк севгиси ичюн,
инсан огъулларына косьтерген аджайип ишлери ичюн!
9 cО, сувсагъан джанны тойдурды,
ач олгъан джанны эйиликнен толдурды.
10 dКъаранлыкъта, олюм кольгесининъ тюбюнде къалдылар,
демир зынджырларында азап чеке эдилер,
11 eчюнки Алланынъ эмирлерине къаршылыкъ косьтердилер,
Юдже Алланынъ ирадесине хор бакътылар.
12 fО, агъыр ишнен оларнынъ юрегини йымшакъ этти,
олар абынды, ярдымджылары исе ёкъ эди.
13Беляда РАББИни чагъырдылар,
ве О, оларны азапларындан къуртарды.
14Къаранлыкъ ве олюм кольгесинден оларны азат этти,
бугъавларыны сындырып ташлады.
15РАББИге шукюр этсинлер буюк севгиси ичюн,
инсан огъулларына косьтерген аджайип ишлери ичюн!
16 gО, бакъыр араба къапуларны парча-парча этти,
демир пармакълыкъларны сындырып ташлады.
17Къанунсыз ёллардан кетип, олар ахмакъ олдылар,
япкъан яманлыкълары ичюн азап чектилер.
18 hДжанлары эр бир ашны ред этти,
олюм араба къапусына якъынлаша эдилер.
19Беляда РАББИден ярдым истедилер,
ве О, оларны азапларындан къуртарды.
20 iСёзюни ёллап, оларны тедавийледи,
оларны мезарларындан чыкъарып алды.
21РАББИге шукюр этсинлер буюк севгиси ичюн,
инсан огъулларына косьтерген аджайип ишлери ичюн!
22 jРАББИге шукюр къурбаныны кетирсинлер,
Онынъ ишлерини къуванчнен къычырып бильдирсинлер!
23Гемилерде денъизге чыкъкъанлар да,
буюк сувларда иш япкъанлар да
24РАББИнинъ ишлерини,
теренликлерде косьтерген аджайип шейлерини корьдилер.
25 kО, эмир этти ве кучьлю боран кетирди,
денъиз далгъаларыны юкъарыгъа котерди.
26Далгъалар коклерге чыкъып,
теренликке йыкъылды,
шу белядан гемиджилер
рухтан тюшти.
27 lОлар сархош киби салланып айланды,
бутюн акъыллары башындан учты.
28Беляда РАББИни чагъырдылар,
ве О, оларны азапларындан къуртарды.
29 mРАББИ боранны тындырды,
сув далгъаларыны да ятыштырды.
30Сувлар ятышкъаны ичюн, адамлар севинди,
ве О, оларны арзу эткен ялыгъа алып кельди.
31РАББИге шукюр этсинлер буюк севгиси ичюн,
инсан огъулларына косьтерген аджайип ишлери ичюн!
32Халкъ топлашувларында Оны юксельтсинлер,
акъсакъаллар джемиетинде Оны макътасынлар!
33 nРАББИ озенлерни сахрагъа айландырыр,
чокъракъларны исе – къуру топракъкъа.
34 oЕрнинъ сакинлерининъ яманлыгъы ичюн,
берекетли топракъны тузлу ерге чевирир.
35 pО, сахраны гольге айландырыр,
ве къуру топракъны – чокъракъларгъа.
36Ач олгъанларны шу ерге ерлештирир,
олар яшамакъ ичюн шеэр къурарлар.
37Тарлаларны экерлер, юзюм багъларыны сачарлар,
андан буюк берекет алырлар.
38 qРАББИ оларнен разы олур,
олар пек чокълашыр,
маллары да ич эксильмез.
39Олар азлашып къалдылар,
зулум, беля ве къайгъыдан йыкъылдылар.
40 rО, мырзаларны масхара этти,
ёлсуз сахрада оларны юрсетти.
41 sФукъарени исе факъырлыкътан чыкъарыр,
несилини къой сюрюси киби чокълаштырыр.
42 tДогъру олгъанлар буны корип къуваныр,
бутюн арам олгъанлар агъзыны къапатып отурыр.
43 uКимде акъылы олса, буларны акъылында тутаджакъ,
РАББИнинъ буюк севгисини анълайджакъ.
Copyright information for
CrhCTB