‏ Psalms 108

Белягъа огърагъан адамнынъ шикяети

Баш чалгъыджы ичюн. Давутнынъ зебуры.

1 ^aЭй, мен макътагъан Аллам, сесинъни кесме!
2 ^bЯрамайлар ве хаинлер агъызларыны ачып,
манъа ялан айталар.
3 ^cОлар нефрет сёзлеринен мени сарып алдылар,
себепсиз манъа къаршы силяландылар.
4Севгим ичюн манъа душманлыкъ япалар,
мен исе дува окъуйым.
5 ^dЯхшылыгъым ичюн яманлыкъ этелер,
севгиме къаршы нефрет берелер.
6 ^eБойле адамнынъ башына ярамай адамны къой,
къабаатлайыджы турсун онынъ онъ тарафында.
7 ^fО, суд къаршысына кельгенде,
къабаатлы олып чыкъсын,
дувасы гуна киби эсаплансын.
8 ^gОмрю къыскъа олсун,
онынъ ерине башкъасы отурсын.
9 ^hБалалары оксюз къалсын,
апайы тул олсун.
10 ⁱОгъуллары доланып тиленджилик япсын,
озь виранелеринде отьмек сорасын.
11Бутюн малыны борджкъа берген адам тутып алсын,
ишлерининъ махсулларындан башкъалары файдалансын.
12Онъа кимсе мерамет косьтермесин,
оксюзлерине кимсе аджып бакъмасын.
13 ^jОнынъ сою къырылып ташлансын,
келеджек несильде адлары къалмасын.
14 ^kБабаларынынъ къабаатлары РАББИнинъ акъылына кельсин,
аналарынынъ гуналары унутылмасын.
15 ^lОларнынъ къабаатлары эр вакъыт РАББИнинъ огюнде олсун,
озюнинъ хатырасыны исе ер юзюнден сильсин.
16О, яхшылыкъ этмеге ич тюшюнмеди,
лякин фукъаре, факъырны ве алчакъ гонъюллини эзиетледи,
оны ольдюрмеге истеди.
17Лянетни севгеннинъ башына лянет тюшер,
эйилик истемеген адамдан яхшылыкъ узакълашыр.
18 ^mЛянетни о, урба киби кийсин,
къаргъыш онынъ ичини сув киби урсун,
кемиклерине зейтюн ягъы киби кирсин.
19Лянет онъа эр вакъыт кийген урба,
эр вакъыт къушангъан къушакъ олсун.
20Джаныма яманлыкъ тилегенлерни,
душманларымны РАББИ бойле джезаласын!
21 ⁿРАББИ-ТААЛЯ, Адынънынъ урьмети ичюн манъа эйилик косьтер,
чюнки Сенинъ севгинъ хайырлыдыр!
Къуртар мени,
22 ^oчюнки мен фукъаре ве факъырым,
ичимде юрегим яралы.
23 ^pАкъшам кольгеси киби тез кечип кетем,
сарынчкъа киби къувалар мени.
24Тизлерим аштан вазгечмектен титрей,
терим кемигиме япышып къалды.
25Адамларнынъ акъаретине нишан олдым,
манъа козь ташлап, башыны саллайлар.
26Я РАББИ, меним Аллам,
ярдым эт манъа!
Буюк севгинъни косьтерип, мени къуртар!
27Бильсинлер ки, бу Сенинъ къолунъдыр,
буны беджерген Сенсинъ, я РАББИ!
28Олар лянет этсе де, Сен эйилик япарсынъ!
Олар уджюмге атылса да, масхара олурлар!
Сенинъ къулунъ исе севинир!
29 ^qДушманларым намуссызлыкъ урбасыны кийсин,
утанчнен урба киби орьтюльсинлер.
30Дудакъларым РАББИни чокъ шуретлер,
чокъ адам ичинде мен Оны макътарым!
31 ^rРАББИ фукъаренинъ онъ тарафында турар,
оны къабаатлагъанлардан джаныны О, къуртарыр.