‏ Psalms 113

Тири Алла ве путлар акъкъында

1 ^aИсраиль Мысырдан чыкъкъанда,
Якъупнынъ сою ябанджы тильде лаф эткен халкътан айырылгъанда,
2Ехуда РАББИнинъ мукъаддес мескени олды,
Исраиль де – Онынъ падишалыкъ эткен ери.
3 ^bДенъиз суву бакъты да, къачты,
Иордан озени артына акъты.
4 ^cДагълар къой киби секирди,
байырлар къозу киби сычрады.
5Эй, денъиз, санъа не олды да, къачасынъ?
Иордан, не ичюн артынъа къайтасынъ?
6Эй, дагълар, не ичюн къой киби секиресинъиз?
Эй, байырлар, не ичюн къозу киби сычрайсынъыз?
7 ^dЭй, ер юзю, Раббининъ алдында,
Якъупнынъ Алласы алдында къоркъудан титре!
8 ^eО, къаяны сув хавузына айландырды,
чакъмакъташны исе – сув чокърагъына.

9Бизлерге дегиль, я РАББИ, бизлерге дегиль,
лякин Сенинъ буюк севгинъ ве вефадарлыгъынъ ичюн
Озь Адынъа шурет бер!

10 ^fНе ичюн халкълар:
«Къана оларнынъ Алласы?» – дейлер.
11 ^gБизим Алламыз коклердедир,
О, истегенини япа.
12 ^hОларнынъ путлары исе – кумюш ве алтындыр,
инсан къолларынынъ ишлеридир.
13 ⁱАгъызлары бар, лякин лаф этмейлер,
козьлери бар, амма корьмейлер.
14Къулакълары бар – эшитмейлер,
бурунлары бар – къокъу алмайлар.
15 ^jКъоллары бар – сезмейлер,
аякълары бар – юрмейлер,
ве богъазларындан давуш чыкъмай.
16 ^kОларны ясагъан эр бир адам,
оларгъа умют багълагъан эр кес
олар киби олсун.

17Эй, Исраиль, РАББИге умют багъла!
О, сенинъ ярдымджынъ ве къалкъанынъдыр.
18 ^lЭй, Харуннынъ сою, РАББИге умют багъла!
О, сенинъ ярдымджынъ ве къалкъанынъдыр.
19Эй, РАББИден къоркъкъанлар, РАББИге умют багъланъыз!
О, сизинъ ярдымджынъыз ве къалкъанынъыздыр.
20РАББИ бизни эсинде тута.
О, эйилик косьтерир:
О, Исраиль халкъына эйилик япар,
Харуннынъ союна эйилик япар,
21РАББИден къоркъкъанларгъа –
кучюк ве буюк олгъанларгъа –
РАББИ эйилик япар!
22 ^mРАББИ сизлерни ве огъулларынъызны
къоша-къоша чокълаштырсын!
23Ер ве кокни яраткъан РАББИ
сизлерге эйилик япсын!
24Коклернинъ коклери – РАББИнинъдир,
амма ерни О, инсан огъулларына берген.
25 ⁿОлюлер, сюкюнет диярына кеткенлер
РАББИни макътамаз.
26 ^oБиз исе, шимдиден башлап эбедиен
РАББИни алгъышлармыз!
Эльхамдюлилля!