‏ Psalms 134

Макътав гимни

1Эльхамдюлилля! РАББИнинъ Адыны макътанъыз,
Оны макътанъыз, РАББИнинъ къуллары,
2 ^aРАББИнинъ Эвинде
ве Алламызнынъ Эви азбарларында тургъанлар!
3РАББИни макътанъыз, чюнки О, хайырлыдыр!
Адына йырланъыз, чюнки бу шей татлыдыр!
4 ^bРАББИ Озюне Якъупны,
Озь шахсий мулькиети оларакъ Исраильни сайлады.
5 ^cМен бильдим ки, РАББИ улудыр,
Раббимиз бутюн аллалардан устюн.
6 ^dЕр ве коклерде,
денъизлер ве бутюн теренликлерде
РАББИ истегенини япа.
7 ^eЕрнинъ четинден О, булутларны котере,
ягъмур ичюн яшын ярата,
Озь хазинелеринден ельни чыкъара.
8 ^fО, инсанлардан тап айвангъа къадар
Мысырнынъ биринджи догъгъан балаларыны къырды,
9 ^gМысыр ортасында фыравунгъа
ве онынъ бутюн къулларына къаршы
бельги ве аджайип аляметлер йиберди.
10 ^hО, чокъ халкъларны ольдюрди,
къудретли падишаларны ёкъ этти.
11 ⁱАморлыларнынъ падишасы Сихонны да,
Башаннынъ падишасы Огны да,
бутюн Ханаандаки падишалыкъларыны да
О, ёкъ этип ташлады
12 ^jве оларнынъ топракъларыны
Озь халкъы Исраильге мирас этип берди.
13 ^kЯ РАББИ, Сенинъ Адынъ эбедийдир!
Несиллернинъ эписи Сени хатырлар, я РАББИ!
14 ^lРАББИ Озь халкъыны акълайджакъ,
Озь къулларына мерамет этеджек!
15 ^mХалкъларнынъ путлары – кумюш ве алтындыр,
инсан къолларынынъ ишидир.
16 ⁿАгъызлары бар, амма лаф этмезлер,
козьлери бар, амма корьмезлер.
17 ^oКъулакълары бар, амма эшитмезлер,
агъызларындан нефес чыкъмаз.
18 ^pОларны ясагъан адамлар,
оларгъа ишангъанларнынъ эписи
оларгъа ошап къаладжакъ.
19Эй, Исраиль сою, РАББИни алгъышланъыз!
Эй, Харуннынъ сою, РАББИни алгъышланъыз!
20 ^qЭй, Левийнинъ сою, РАББИни алгъышланъыз!
Эй, РАББИден къоркъкъанлар, Оны алгъышланъыз!
21 ^rЕрусалимде отургъан РАББИге
Сиондан шукюрлер олсун!
Эльхамдюлилля!