‏ Psalms 138

Алла эр шейни коре

Баш чалгъыджы ичюн. Давутнынъ зебуры.

1 ^aЯ РАББИ, Сен мени сынадынъ,
эм де билип алдынъ.
2 ^bОтурып-тургъанымны Сен билесинъ,
тюшюнджелеримни узакътан анълайсынъ.
3 ^cЮргенимде де, раатлангъанымда да Сен мени бакъасынъ,
бутюн ёлларымны Сен эвельден билесинъ.
4Даа бир сёзни агъзыма алмаздан эвель,
Сен бутюн айтаджагъымны билесинъ, я РАББИ!
5Огюмден ве артымдан мени сарып аласынъ,
Озь къолунъны устюме къоясынъ.
6 ^dСени бильмек меним ичюн пек аджайип,
юксектир о, акълым етмез онъа.
7 ^eСенинъ Рухунъдан къайда кетмек мумкюним?
Сенинъ огюнъден къайда къачып олурым?
8 ^fЭгер кокке чыкъсам – Сен о ердесинъ,
олюлер дюньясына тюшсем – анда да Сенсинъ.
9Шефакъ къанатларыны алып учсам,
денъизнинъ узакъ четине кочип ерлешсем,
10о ерде де Сенинъ къолунъ манъа ёл косьтерир,
онъ къолунъ мени тутар.
11Эгер мен: «Къаранлыкъ мени къапласын,
этрафымдаки ярыкъ геджеге айлансын», – десем де,
12 ^gкъаранлыкъ биле Сен ичюн къара дегиль,
гедже де куньдюз киби айдын,
къаранлыкъ ве ярыкъ Сен ичюн бирдир.
13 ^hБутюн ичимни Сен яраттынъ,
анамнынъ къурсагъында мени ясадынъ.
14Санъа шукюр этем,
чюнки мен аджайип олып яратылгъаным.
Сенинъ ишлеринъ аджайиптир,
буны джаным толусынен анълай.
15 ⁱГизли оларакъ яратылгъанымда,
ернинъ къурсагъында япылгъанымда,
кемиклерим Сенден гизли дегиль эди.
16 ^jАнамнынъ къурсагъында олгъанымда,
козьлеринъ коре эди мени.
Даа бир кунь биле яшамагъанымда,
Сен куньлеримни тайинлеп,
эписини китабынъа язгъан эдинъ.
17 ^kСенинъ тюшюнджелеринъ манъа пек азиздир,
олар не къадар чокътыр, эй, Алла!
18Оларны сайсам, къумдан да чокъ олып чыкъар эди.
Мен уянгъанымда, але даа Сеннен бераберим.
19 ^lЭй, Алла, Сен ярамай инсанларны ольдюргейдинъ!
Узакълашынъыз менден, къанназ инсанлар!
20Арам ниетнен Сени тильге алалар,
бошуна душманларынъ фитне этелер.
21 ^mЯ РАББИ, Сенден нефретленгенлерден
мен нефретленмейимми?
Санъа къаршы чыкъкъанлардан игренмейимми?
22Бар нефретнен олардан игренем,
озюме душман, деп саям оларны.
23 ⁿЭй, Аллам, мени сынап, юрегимни билип ал!
мени сынап, тюшюнджелеримни огренип ал!
24Бакъ, мен хавфлы ёлда дегилимми?
Эбедийликке баргъан ёлгъа мени догърулт!