Psalms 143
Не де бахтлыдыр Раббиси Алла олгъан халкъ!
Давутнынъ йыры.
1 aРАББИге бинъ шукюрлер олсун!О – меним Къаям,
къолларымны дженкке,
пармакъларымны урушкъа огретир.
2 bО – меним севгим ве къалем,
юксек сакълангъан ерим, къуртарыджым,
къалкъаным, мен Онъа умют багъладым.
О, халкъымны манъа бойсундыра.
3 cЯ РАББИ, инсаннынъ эмиети недир,
не ичюн онъа итибар этесинъ?
Инсан огълунынъ эмиети недир,
не ичюн онъа дикъкъат этесинъ?
4 dАдам бир нефес киби,
онынъ куньлери, бир кольге киби, кечип кете.
5 eЯ РАББИ, коклерни ярып, ашагъы тюш,
дагъларгъа тийип, олардан тютюн чыкъар!
6 fЯшын яшынлатып, душманларны дагъыт,
окъларынъны атып, оларны шашырт!
7 gЮкъарыдан къолунъны узатып, мени къуртар,
терен сувлардан, эджнебийлернинъ къолундан
мени сакъла!
8 hОларнынъ агъзындан бош лафлар таша,
онъ къоллары ялангъа ынтылалар.
9 iЭй, Алла, Санъа янъы бир йыр айтарым,
он телли арфада Санъа чаларым.
10 jСен падишаларгъа къуртулыш бересинъ,
къулунъ Давутны олюм къылычындан къуртарасынъ.
11Сакъла мени,
эджнебийлернинъ къолундан къуртар мени.
Оларнынъ агъзындан бош лафлар таша,
онъ къоллары ялангъа ынтылалар.
12 kОгъулларымыз
яшлыгъында оськен ве къалынлашкъан фиданлар киби,
къызларымыз
сарайда уста япкъан диреклер киби олсунлар!
13Анбарларымыз малымызгъа толу олсун,
эр бир ашларнен толып-ташсын!
Отлакъларымызда къой-эчкилер бинълер
ве он бинълернен чокълашсын!
14 lТуварларымыз семиз олсун,
диварларымызны къыргъан бириси олмасын,
ярдым истеген адам олмасын,
мейданларымызда агълагъан адам къалмасын!
15 mНе де бахтлыдыр бунъа саип олгъан халкъ!
Не де бахтлыдыр Алласы РАББИ олгъан халкъ!
Copyright information for
CrhCTB